މިހާރު ކުރިއަށްދާ ޓީ20 ވޯލްޑް ކަޕުގައި އަންގާރަ ދުވަހު ކުޅުނު މެޗުތަކުން ނިއު ޒީލެންޑް އަތުން ޕާކިސްތާން މޮޅުވިއިރު، ސައުތު އެފްރިކާ އަތުން އެންމެ ފަހުގެ ޗެމްޕިއަން ވެސްޓް އިންޑީޒް ބަލިވެއްޖެއެވެ.

ގްރޫޕް ދޭއްގައި ހިމެނޭ ޕާކިސްތާނުން މި މުބާރާތުގައި ކުޅުނު ދެވަނަ މެޗުން މޮޅުވީ ނިއު ޒީލެންޑް އަތުން ފަސް ވިކެޓުންނެވެ.

ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅުނު މެޗުގެ ޓޮސް ދިމާވުމުން ޕާކިސްތާނުން ނިންމީ ހޮވުމަށެވެ. އެއާއެކު އެންމެ ފުރަތަމަ ނިއު ޒީލެންޑް ކުޅެން އަރައި، 20 އޯވަރު ހަމަވިއިރު އަށް ކުޅުންތެރިން ނުބައިވެގެން ހެދުނީ 134 ލަނޑެވެ. އެ ގައުމުން އެންމެ ރަނގަޅަށް ކުޅުނީ 20 ބޯޅައިން 27 ލަނޑު ހެދި ޑެރީލް މިޗެލް އާއި 24 ބޯޅައިން 27 ލަނޑު ހަމަކުރި ޑެވޮން ކޮންވޭއެވެ.

ޖަވާބުގައި ޕާކިސްތާން ކުޅެން އަރައި 18.4 އޯވަރުގެ ތެރޭގައި ފަސް ކުޅުންތެރިން ނުބައިވެގެން ވަނީ 135 ލަނޑު ހަދައި، މެޗު ކާމިޔާބުކޮށްފައެވެ. އެ ގައުމުން އެންމެ ރަނގަޅަށް ކުޅުނީ 34 ބޯޅައިން 33 ލަނޑު ހެދި މުޙައްމަދު ރިޒްވާން އާއި، 12 ބޯޅައިން 27 ލަނޑު ހަމަކުރި އާސިފް އަލީގެ އިތުރުން 20 ބޯޅައިން 26 ލަނޑު ހެދި ޝުއައިބް މާލިކެވެ.

މި މެޗުން މޮޅުވެ ގްރޫޕް ދޭއްގެ އެއްވަނައިގައި ޕާކިސްތާން އޮތްއިރު، އެ ގައުމުން ވަނީ މި މުބާރާތުގައި ކުޅުނު ފުރަތަމަ މެޗުން ވާދަވެރި އިންޑިއާ އަތުން 10 ވިކެޓުގެ ތަފާތު ބޮޑު ނަތީޖާއަކުން މޮޅުވެފައެވެ. މިއީ ވޯލްޑް ކަޕެއްގައި އިންޑިއާ އަތުން ޕާކިސްތާން މޮޅުވި ފުރަތަމަ ފަހަރެވެ.

މީގެ އިތުރުން އަންގާރަ ދުވަހު ކުޅުނު މެޗުން މި ފަހަރުގެ މުބާރާތުގެ ގްރޫޕް އެކެއްގައި ހިމެނޭ އެންމެ ފަހުގެ ޗެމްޕިއަން ވެސްޓް އިންޑީޒް ބަލިވީ ސައުތު އެފްރިކާ އަތުން އަށް ވިކެޓުންނެވެ.

މި މެޗުގެ ޓޮސް ދިމާވުމުން ސައުތު އެފްރިކާއިން ނިންމީ ހޮވުމަށެވެ. އެއާއެކު އެންމެ ފުރަތަމަ ވެސްޓް އިންޑީޒް ކުޅެން އަރައި، 20 އޯވަރު ހަމަވިއިރު އަށް ކުޅުންތެރިން ނުބައިވެގެން ހެދުނީ 143 ލަނޑެވެ. އެ ގައުމުން އެންމެ ރަނގަޅަށް ކުޅުނީ 35 ބޯޅައިން 56 ލަނޑު ހެދި އެވިން ލެވިސްއެވެ.

ޖަވާބުގައި ސައުތު އެފްރިކާ ކުޅެން އަރައި 18.2 އޯވަރުގެ ތެރޭގައި ދެ ކުޅުންތެރިއަކު ނުބައިވެގެން ވަނީ 144 ލަނޑު ހަދައި، މެޗު ކާމިޔާބުކޮށްފައެވެ. އެ ގައުމުން އެންމެ ރަނގަޅަށް ކުޅުނީ 26 ބޯޅައިން 51 ލަނޑު ހެދި އައިޑެން މާކްރަމް އާއި، 51 ބޯޅައިން 43 ލަނޑު ހަމަކުރި ރަސީ ވެން ޑާ ޑަސަންއެވެ.

މި މެޗުން ވެސްޓް އިންޑީޒް ބަލިވިއިރު، މި މުބާރާތުގައި ކުޅުނު ފުރަތަމަ މެޗުން އެ ގައުމު ވަނީ އިންގްލެންޑް އަތުން ހަ ވިކެޓުން ބަލިވެފައެވެ. އެއާއެކު ވެސްޓް އިންޑީޒް މި ވަގުތު އޮތީ ގްރޫޕް އެކެއްގެ ފުލުގައެވެ.