ޝެއިޚް މުޙައްމަދު ހަސަންގެ ދީނީ ތަޤުރީރު ކުރުމުގެ ހުއްދަ ހިފެހެއްޓީ ރަނގަޅަކަށް ނޫން: ސިވިލް ކޯޓު
އެކަމުގެ ގެއްލުމުގެ ބަދަލު ހޯދުމަށް ވަކިން ދައުވާކުރުމުގެ ޙައްޤު ލިބިގެންވޭ
ޝެއިޚް މުޙައްމަދު ހަސަން ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
ޝެއިޚް މުޙައްމަދު ހަސަންގެ ދީނީ ތަޤުރީރު ދެއްވުމުގެ ހުއްދަ ހިފެހެއްޓީ ރަނގަޅަކަށް ނޫންކަމަށް ސިވިލް ކޯޓުން ޙުކުމްކޮށްފިއެވެ.
މި މައްސަލައަކީ ޝެއިޚް މުޙައްމަދު ހަސަންއަށް އިސްލާމިކް މިނިސްޓްރީން ދޫކޮށްފައިވާ "ދިވެހި ރާއްޖޭގައި ދީނީ ތަޤުރީރު ކުރުމާއި ވައުޠު ބުނުމުގެ ހުއްދަ" ހިފަހައްޓާފައިވަނީ ޤާނޫނާއި ޤަވާއިދާއި، އަދުލު އިންސާފުގެ އާންމު ހަމަތަކާ ޚިލާފަށް ކަމަށް ބަޔާންކޮށް، ހުއްދަ އަނބުރާ ދޫކުރުމާއި އެކަމުގެ ގެއްލުމުގެ ބަދަލު ހޯދުމަށް ވަކިން ދައުވާކުރުމުގެ ޙައްޤު ލިބިގެންވާކަމަށް ކަނޑައަޅުއްވައި ދެއްވުމަށް އެދި ހުށަހަޅާފައިވާ މައްސަލައެކެވެ.
ދައުލަތަށް ރައްދުވާގޮތަށް ހުށަހަޅާފައިވާ މި މައްސަލައިގައި ދައުވާއަށް ޖަވާބުދާރީވަމުން މިނިސްޓްރީން ބުނެފައިވަނީ ތަޤުރީރު ކުރުމުގެ ހުއްދަ 17 ޑިސެމްބަރު 2019 ގައި ވަގުތީ ގޮތުން ހިފަހައްޓާފައިވަނީ ދީނީ އެއްބައިވަންތަކަން ހިމާޔަތް ކުރުމުގެ ޤާނޫނުގެ ދަށުން ކަމަށެވެ.
ޝެއިޚް މުޙައްމަދު ހަސަންގެ މައްޗަށް މިިނިސްޓްރީން ކުރާ ތުހުމަތުތައް ބިނާވަނީ ދީނީ ޖަމާއަތަކުން ކޮށްފައިވާ ޓްވީޓުތަކެއްގެ މައްޗަށް ނަމަވެސް، އެއީ ޝެއިޚް މުޙައްމަދު ހަސަން ކުރައްވާފައިވާ ޓްވީޓުތަކެއްކަން އެނގެން ނެތްކަން ޙުކުމުގައި ބަޔާންކޮށްފައިވެއެވެ. އަދި އެ ޖަމިއްޔާއަކީ ދައުވާކުރާ ފަރާތުގެ ނަމުގައި ރަޖިސްޓްރީ ކޮށްފައިވާ ޖަމިއްޔާއެއްކަމާއި، ދައުވާކުރާ ފަރާތާއި ސީދާ ގުޅުމެއް އޮތް ޖަމިއްޔާއެއްކަން ވެސް އިންޓެލް ރިޕޯޓުން އެނގެން ނެތްކަން ބަޔާންކޮށްފައިވެއެވެ.
އޭގެ އިތުރުން، ޝެއިޚް މުޙައްމަދު ހަސަން ސޯޝަލް މީޑިއާގައި ލިއުއްވާފައިވާ ޕޯސްޓުތަކެއް މިނިސްޓްރީން ހުށަހަޅާފައިވީނަމަވެސް، އެ ޕޯސްޓުތަކުގައި ދީނީ އެއްބައިވަންތަކަން ގެއްލިގެންދާ ވަރުގެ ވާހަކައެއް އޮތްކަން ޝަރީއަތަށް ޤަބޫލު ނުކުރެވޭކަން ވެސް ޙުކުމުގައި ބަޔާންކޮށްފައިވެއެވެ.
ޝަރީއަތުން ވަނީ 26 އޮކްޓޯބަރު ވާ އަންގާރަ ދުވަހުން ފެށިގެން 10 ދުވަހުގެ ތެރޭގައި ތަޤުރީރު ކުރުމުގެ ހުއްދަ އަނބުރާ ދިނުމަށް އަންގައި އަމުރުކޮށްފައެވެ. އަދި ހުއްދަ ހިފެހެއްޓުމުގެ ސަބަބުން ދައުވާކުރާ ފަރާތަށް ލިބުނު ގެއްލުމުގެ އަގުވަޒަންކޮށް، ބަދަލު ހޯދުމަށް ވަކިން ދައުވާ ކުރުމުގެ ޙައްޤު ލިބިގެންވާކަމަށް ވަނީ ޙުކުމް ކޮށްފައެވެ.
