ހިޔާ މަޝްރޫއުގެ މައްސަލަ ބެލުމަށް އިދިކޮޅުން ވޯޓު ނުދިނީ އިޚުލާސްތެރިކަމެއް ނެތީމަ - ސަލީމް
އެ މަޝްރޫއުގެ ސަބަބުން ދައުލަތް ދަރާ ވިކިފައި
އަހުމަދު ސަލީމް - ހޯރަފުށި ދާއިރާ މެމްބަރު
ހިޔާ މަޝްރޫއުގެ މައްސަލަ ބެލުމަށް އިދިކޮޅުން ވޯޓު ނުދިނީ އިޚުލާސްތެރިކަމެއް ނެތުމުން ކަމަށް ހޯރަފުށި ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
ސަލީމް މިހެން ވިދާޅުވީ، ހިޔާ މަޝްރޫއުގައި ހިންގާފައިވާ ކޮރަޕްޝަންގެ އަމަލުތައް ބެލުމަށް ޖިނާއީ ތަހުގީގެއް ހިންގުމަށް ގޮވާލައި ރައްޔިތުންގެ މަޖިލީހަށް ހުށަހެޅި މައްސަލައަށް ވާހަަކަދައްކަވަމުންނެވެެ. ސަލީމް ވިދާޅުވީ، ހިޔާ ފްލެޓްގެ ކޮރަޕްޝަން މައްސަލަ ބަލަން ހުށަހެޅުމުން އެކަމަށް އިދިކޮޅު މެމްބަރުންނަށް ވޯޓު ދެއްވަން ކެރިވަޑައި ނުގެންނެވީ އިޚުލާސްތެރިކަމެއް ނެތުމުން ކަމުގައެވެ. ވެންޓިލޭޓަރުގެ މައްސަލަ ބެލުމަށް އެމްޑީޕީ މެމްބަރުން ވޯޓު ދެއްވިކަން ފާހަގަކުރައްވަމުން ސަލީމް ވިދާޅުވީ، މި ސަރުކާރުން ހިންގި ނަމަވެސް ކޮރަޕްޝަންގެ އަމަލެއް ނަމަ އެކަން ބައްލަވަން ކެރިވަޑައިގަންނަވާނެ ކަމަށެވެ.
ބޯހިޔާވަހިކަމުގެ ނަމުގައި ހަދާފައި ހުރި ތަންތަނުން ބޯހިޔާވަހިކަން ނުލިބޭ ކަމަށާއި، އެތަންތަން ދީފައި އޮތީ، ނުހައްގުން ބޮޑު އަގުގައި ކަމަށް ސަލީމް ވިދާޅުވިއެވެ. އެ މަޝްރޫއުގެ ސަބަބުން ދައުލަތް ދަރާ ވިކިފައިވާކަމަށް ސަލީމް ވިދާޅުވިއެވެ. މި މަޝްރޫއުގައި ރަނގަޅަށް ހިނގާފައި އޮތީ ކޮން ކަމެއްތޯ ސަލީމް ސުވާލު އުފެއްދެވިއެވެ.
ސަލީމް ވިދާޅުވީ، ބޯހިޔާވަހިކަމުގެ ގާނޫނެއް މިހާރުން މިހާރަށް ބޭނުންވާ ކަމަށެވެ. އެފަދަ ގާނޫނެއްގެ ތެރެއިން ނޫނީ، ހިޔާ މަޝްރޫއުގައި ދިމާވި މައްސަލަތައް ތަކުރާރު ނުވާނެ ކަމުގެ ޔަގީން ކަމެއް ނެތް ކަމަށް ވިދާޅުވިއެވެ. އެ މަސައްކަތް މަޖިލީހުގެ ތެރެއިން އަވަސް ކުރަން ޖެހޭ ކަމަށާއި، އެ ގާނޫނުގެ ތެރެއިން ސޯޝަލް ހައުސިން އަކީ ކޮބައިގަން އެނގެން ޖެހޭ ކަމަށް ވިދާޅުވިއެވެ. ސޯޝަލް ހައުސިންގ އަކީ 62،000 ޑޮލަރަށް ޔުނިޓެއް ވިއްކުން ނޫން ކަމަށާއި، އެއަށްވުރެ އަގު ހެޔޮކޮށް ޖާގަ ތަނަވަސްކޮށް ސޯޝަލް ހައުސިންގ ރައްޔިތުންނަށް ދެވެން ޖެހޭނެ ކަމަށް ސަލީމް ވިދާޅުވިއެވެ.
ސޯޝަލް ހައުސިން ކެޓަގަރީއަށް ފެތޭނެ މިންގަނޑުތައް ގާނޫނެއްގައި ބަޔާންވެފައި އޮންނަން ޖެހޭ ކަމަށް ވިދާޅުވިއެވެ. 400 އަކަފޫޓަކީ އާއިލާއެއް އުޅެން އެކަށީގެންވާ ތަނެއް ނޫން ކަމަށާއި، ސޯޝަލް ހައުސިންގ ދިނުމުގެ ބޭނުމަކީ އާއިލާއާއެކު އުޅެވޭނެ ތަނަވަސް މާހައުލެއް ފޯރުކޮށްދިނުން ކަމަށެވެ.
ފްލެޓް ލިބުނު މީހުންގެ ތެރޭގައި އެހީތެރިކަން ބޭނުންވާ މީހުން އެބަތިކަމަށާއި، ޓާރގެޓް ސަބްސިޑީ އެ ފަރާތްތަކަށް ދޭން ޖެހޭ ކަމަށް ސަލީމް ވިދާޅުވިއެވެ. ކޮވިޑްގެ މިހާލަތާއެކު އެތަނުގައި ދިރިއުޅެން ދިން މުއްދަތު އިތުރުކުރަން ޖެހޭނެކަން ގަބޫލް ކުރައްވާ ކަމަށް ސަލީމް ވިދާޅުވިއެވެ.
