މޯލްޑިވްސް ނެޝަނަލް ޕާޓީ ރަޖިސްޓްރީކޮށްފި
އެމްއެންޕީ ހިނގާނީ ރައްޔިތުންގެ ފިކުރާ އެއްގޮތަށް
އެމްއެންޕީ ރަޖިސްޓްރީ ކުރުމަށް ފޯމް ހުށަހެޅުން
ސިޔާސީ ޕާޓީއެއް އުފެއްދުމުގެ ހުއްދަ ދެވުނުތާ 2 މަހާއި 12 ދުވަހުގެ ތެރޭގައި މޯލްޑިވްސް ނެޝަނަލް ޕާޓީ (އެމްއެންޕީ) ރަޖިސްޓްރީ ކުރުމަށް ބޭނުންވާ ހުރިހާ ގާނޫނީ އިޖުރާއަތްތަކެއް ފުރިހަމަކުރުމަށްފަހު ރަޖިސްޓްރީ ކޮށްފިއެވެ.
އެމްއެންޕީ ރަޖިސްޓްރީ ކުރެވުމާއިއެކު ރައްޔިތުންގެ މަޖިލީހުގެ ތަޅުމުގައި ޕާޓީ ތަމުސީލުކުރުމުގެ ފުރުސަތު އެޕާޓީގެ ތިން މެމްބަރުންނަށް ލިބިގެންދާނެއެވެ. ރައްޔިތުންގެ މަޖިލީހުގެ ތަޅުމުގައި ހިމެނޭ, މި ޕާޓީގެ ތިން މެމްބަރުންނަކީ; ދަނގެތީ ދާއިރާގެ މެމްބަރު އަދި އެމްއެންޕީގެ ރައީސް މުޙައްމަދު ނާޒިމް، ތިމަރަފުށީ ދާއިރާގެ މެމްބަރު އަދި އެމްއެންޕީގެ ނައިބު ރައީސް ޢަބްދުﷲ ރިޔާޒްގެ އިތުރުން ވިލިމާލެ ދާއިރާގެ މެމްބަރު އަދި އެމްއެންޕީގެ ނައިބު ރައީސް އަޙްމަދު އުޝާމްއެވެ.
ހޯމަ ދުވަހު ހަވީރު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްއެންޕީގެ ރައީސް ނާޒިމް ވިދާޅުވީ، ޕާޓީގެ ރަޖިސްޓްރޭޝަންގެ ކަންތައް ބާރު ސްޕީޑުގައި ކުރިޔަށްދިޔައީ ދިވެހި ރައްޔިތުން ދިން އެއްބާރުލުމުގެ ސަބަބުން ކަމަށާއި، ޕާޓީ ރަޖިސްޓްރީ ކުރެވުމާއެކު، މަސައްކަތްތައް އިތުރަށް ފުޅާވެގެންދާނެ ކަމަށެވެ. އަދި ޕާޓީން މިހާރު އަމާޒު ކަނޑައަޅާފައިވަނީ 10،000 މެމްބަރުން ހަމަކުރުމަށް ކަމަށާއި، އެކަމަށްޓަކައި ކުރަން ޖެހޭ ކަންކަން ކުރަމުންދާ ކަމަށެވެ.
ނާޒިމް އިތުރަށް ވިދާޅުވީ, އެމްއެންޕީއަކީ ދިވެހި ރައްޔިތުންގެ ފިކުރާއި އެއްގޮތަށް ހިނގާނެ ރައްޔިތުންގެ ޕާޓީއެއް ކަމަށާއި، ކުރިޔަށް އޮތް ނޮވެމްބަރު މަހު ރައްޔިތުންގެ ޚިޔާލު ހޯދުމަށާއި، އަންނަ އަހަރަށް ލަފާކުރާ ބަޖެޓަށް ރައްޔިތުން ބޭނުންވާ ކަންކަން ހޯދުމަށް ރާއްޖޭގެ ފަސް ސަރަހައްދަކަށް އެމްއެންޕީގެ ވަފުދުތައް ދާނެކަމަށެވެ.
އެމްއެންޕީސިޔާސީ ޕާޓީއެއްގެ ގޮތުގައި ރަޖިސްޓްރީކުރުމަށް ހުށަހަޅާފައިވަނީ ރާއްޖޭގެ އެކިކަންކޮޅުތަކުން 5000 މެންބަރުންނަށް ވުރެ ގިނަ ފޯމާއެކުއެވެ. އިލެކްޝަންސް ކޮމިޝަނުން, މޯލްޑިވްސް ނެޝަނަލް ޕާޓީގެ ނަމުގައި ސިޔާސީ ޕާޓީއެއް އުފެއްދުމަށް މަސައްކަތް ކުރުމުގެ ހުއްދަ ދީފައިވަނީ 15 ޖުލައި 2021 ގައެވެ. އެގޮތުން މިދިޔަ މަދު ދުވަސްކޮޅުގެ ތެރޭގައި އެމްއެންޕީއާ ގިނަ އަދަދެއްގެ މެންބަރުން ދިޔައީ ގުޅެމުންނެވެ.
