ޑިފެންސް އެކްޝަން ޕްލޭންގައި ހުރި ކަންކަމުގެ ބައެއް މައުލޫމާތު ހާމަކޮށްފި
މި އެކްޝަން ޕްލޭންގައި މައިގަނޑު 10 ދާއިރާއެއް ހިމެނޭ
މިނިސްޓަރ މާރިޔާ 241 ކޮމިޓީއަށް ވަޑައިގެން ކޮމިޓީއަށް މައުލޫމާތު ދެއްވަނީ
2016 ވަނަ އަހަރު ކުރީ ސަރުކާރުން އިންޑިއާއެކު ސޮއިކުރި "އެކްޝަން ޕްލޭން އޮން ޑިފެންސް އެންޑް ކޯޕަރޭޝަން ބިޓްވީން މޯލްޑިވްސް އެންޑް އިންޑިއާ" ގައި ހިމެނޭ 10 ކަމެއްގެ އާންމުކޮށްފިއެވެ.
އާދިއްތަ ދުވަހު ބޭއްވި ރައްޔިތުންގެ މަޖިލީހުގެ 241 ކޮމިީގައި މި ޕްލޭނާ ގުޅޭގޮތުން ޑިފެންސް މިނިސްޓްރީން ބުނީ 2016 ވަނަ އަހަރުގެ އެކްޝަން ޕްލޭނަކީ ކުރީގެ ރައީސް އަބްދުﷲ ޔާމީން އިންޑިއާއަށް ކުރެވި ސްޓޭޓް ވިޒިޓެއްގައި ކޮންސަލްޓް ކުރެވިފައިވާ އެކްޝަން ޕްލޭނެއް ކަމަށެވެ. އަދި މީގައި ސޮއިކޮށްފައިވަނީ ރާއްޖޭގެ ފަރާތުން ކުރީގެ ހައިކޮމިޝަނަރ އަހުމަދު މުހައްމަދު ކަމަށާއި، އިންޑިއާގެ ފަރާތުން ސޮއިކުރެއްވީ ކުރީގެ ޑިފެންސް ސެކްރެޓަރީ މޯހަން ކުމާރު ކަމަށެވެ.
ޑިފެންސް މިނިސްޓްރީން ބުނީ މި އެކްޝަންޕްލޭންގައި ސޮއިކުރުމަށްފަހު 14 އެޕްރީލް 2016 ގައި މިނިސްޓްރީ އޮފް ފޮރިން އެފެއާޒްއިން މިނިސްޓްރީ އޮފް ޑިފެންސަށް ދަންނަވާފައިވަނީ އެކްޝަން ޕްލޭންގައި ސޮއިކުރެވުނު ކަމާއި އަދި އެ އެކްޝަން ޕްލޭނާ އެއްގޮތަށް ދެގައުމުގެ ދޭތެރޭގައި ގުޅުން ކުރިއަށް ގެންދިއުމަށެވެ. ފޮރިން މިނިސްޓްރީން ޑިފެންސް މިނިސްޓްރީއަށް ފޮނުވި ސިޓީގައި ބުނެފައިވަނީ ރާއްޖެއާއި އިންޑިއާ ދެމެދު ޑިފެންސް ކޯޕަރޭޝަން އިތުރަށް ހަރުދަނާ ކުރުމުގެ ގޮތުން އެޕްރީލް މަހުގެ 10ން 11ށް ކުރީގެ ރައީސުލްޖުމްހުރިއްޔާ އަބްދުﷲ ޔާމީން އަބްދުލްގައްޔޫމް އިންޑިއާއަށް ކުރެއްވި ދަތުރުފުޅުގައި ސޮއިކުރައްވާފައިވާ އެކްޝަން ޕްލޭން އޮން ޑިފެންސް އެންޑް ކޯޕަރޭޝަން ބިޓްވީން މޯލްޑިވްސް އެންޑް އިންޑިއާގެ ކޮޕީއެއް ފޮނުވާފައިވާ ކަމަށެވެ. އަދި މި އެއްބަސްވުމާ ގުޅޭ ގޮތުން މިނިސްޓްރީން ކުރައްވަން ޖެހިވަޑައިގަންނަވާ އެންމެހާ ކަންތައްތަކާއިގެން ކުރިއަށް ދިއުމަށް ދަންނަވާ ކަމަށެވެ.
މި އެއްބަސްވުމުގައި ވަނީ ދެގައުމުގެ ދޭތެރޭގައި އޮތް ތާރީހީ ގުޅުމާއި، އަދި ރާއްޖެއާއި އިންޑިއާއާ ދެމެދުގައި އޮތް ޑިފެންސް ކޯޕަރޭޝަން ގުޅުމަށް ވަރަށް ބޮޑަށް އަލިއަޅުވާލާފައެވެ. އަދި ދެގައުމު ގުޅިގެން ސަރަހައްދުގެ ސަލާމަތާއި ދިފާއުއަށް މަސައްކަތް ކުރަން ޖެހޭނަކަމަށް އަލިއަޅުވާލާފައިވެއެވެ.
އެއްބަސްވުމުގައި ހުރި ކަންކަމާ ގުޅޭ ގޮތުން ޑިފެންސް މިނިސްޓްރީން ބުނީ ޑިފެންސް ކޯޕަރޭޝަންގެ މުޅި އެސެސްމަންޓަކަށް ބަލާއިރު ފާހަގަކުރެވުނީ މިއީ ވަރަށް ފޯވަރޑް ލުކިންގ އެކްޝަން ޕްލޭނެއްގެ ގޮތުގައި ކަމަށެވެ. އަދި މިއީ ރާއްޖޭގެ އަސްކަރިއްޔާގެ ބޭނުން ދެނެގަނެ އެއަށް މަގުފަހިކުރެވޭނެ އެކްޝަން ޕްލޭނެއް ކަމަށެވެެ. މި ހުރިހާކަމެއް ފެށިގެން އަންނަނީ 2016 ގައި ސޮއިކުރެވުނު އެކްޝަން ޕްލޭންގެ ތެރެއިން ކަމަށާއި، އެކްޝަން ޕްލޭންގެ ރޫހު އޮތީ ދެގައުމުގެ ދޭތެރޭގައި ގުޅިގެން މަސައްކަތް ކުރުމަށް ކަމަށެވެ.
އަދި ރައީސް ޔާމީންގައި ވާހަކަފުޅުގައި ވެސް ތާރީހީ ސަގާފީ ގުޅުމާއި ހުރިހާއެއްޗެއް ލެވެރޭޖް ކޮށްގެން މި ސަރަހައްދުގެ އަދި ގައުމީ ސަލާމަތަށް ބޭނުންވާ އޮޕަރޭޝަން ހިންގުމަށް އިންޑިއާގެ ނޭވީ އަދި ކޯސްޓް ގާޑުވެސް މީގެ ތެރޭގައި ޝާމިލްވެގެން ޖޮއިންޓް އޮޕަރޭޝަންސް ހިންގުމަށް މި އެކްޝަން ޕްލޭނުން މަގުފަހިކޮށްދޭ ކަމަށެވެ. އަދި ވަރަށް ބޮޑަށް މި ސަރަހައްދުގެ ސެކިއުރިޓީގެ ކަންކަމުގައި އިންޑިއާގެ ލީޑް ރޯލެއް މީގައި އެކްނޮލެޖްކޮށްފައި އިންޑިއާގެ އެހީގައި ރާއްޖޭގެ ގައުމީ އަސްކަރީ އަދި ދިފާއީދާއިރާއަށް ގާބިލްކަން ހޯދުމަށް މަގުފަހިކޮށްދޭ ކަމަށެވެ.
މި އެކްޝަން ޕްލޭނުން މަގުދައްކައިދީގެން ކުރިއަށް ގެންދެވޭ ޕްރޮޖެކްޓުގެ ތެރޭގައި 2020ގައި ސްޓޭޝަން ކުރެވުނު ޑޯނިއަރ އަދި މާފިލާފުށި ސެންޓަރ ސިފަވަރުވަ މަސައްކަތް ކުރާ ކޯސްޓް ގާޑުގެ ޑޮކްޔާޑް އެންޑް ހާބަރ އަދި ޑިފެންސް އިމާރާތް ކުރިއަށް ގެންދާ ކަމަށް މިނިސްޓްރީން ބުނެއެވެ. އަދި ހައިޑްރޮގްރޮފީ އެމްއޯޔޫ ވެސް ހިމެނެއެވެ.
އުތުރު ތިލަފަޅު އެއްބަސްވުމަކީ، 11-10 އެޕްރީލް 2016 އަށް، ރައީސް ޢަބްދުﷲ ޔާމީން ޢަބްދުލްޤައްޔޫމް އިންޑިޔާއަށް ކުރެއްވި ދަތުރުފުޅުގައި، އެޤައުމުގެ ސަރުކާރާއެކު ސޮއިކުރެއްވި "އެކްޝަން ޕްލޭން އޮން ޑިފެންސް ކޯޕަރޭޝަން ބިޓްވީން މޯލްޑިވްސް އެންޑް އިންޑިޔާ"ގެ ތެރޭގައި ހިމެނިފައިވާ 10 ދާއިރާގެ ތެރެއިން އެއް ދާއިރާކަންވަނީ ފާހަގަކުރައްވާފައެވެ. އުތުރު ތިލަފަޅުގެ އެއްބަސްވުން ހިމެނޭހެން، ދިފާޢީ ރޮނގުން އިންޑިޔާ ސަރުކާރާ ގުޅިގެން، މިހާތަނަށް އަދުގެ ސަރުކާރުން ކުރައްވާފައިވާ ކަންކަމަކީ، މިއެކްޝަން ޕްލޭނަށް ޢަމަލީ ސިފަ ގެނައުމަށްޓަކައި ކުރައްވާފައިވާ ކަންކަމެވެ.
