މާލީ ތަހުގީގުތަކާ ގުޅޭ ތަމްރީނެއްގައި އޭސީސީން ބައިވެރިވެއްޖެ

ރީޖަނަލް ޓްރެއިނިންގ ވޯކްޝޮޕް އޮން ފައިނެންޝިއަލް އިންވެސްޓިގޭޝަންގައި އެންޓި ކޮރަޕްޝަން ކޮމިޝަން (އޭ.ސީ.ސީ)ގެ ފަރާތުން ބައިވެރިވެއްޖެއެވެ.

އޭސީސީން މައުލޫމާތު ދޭ ގޮތުގައި މި ތަމްރީނަކީ ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫ.އެން.އޯ.ޑީ.ސީ) އިން އިސް ނަގައިގެން މިމަހުގެ 19 އިން 21 އަށް މާގިރި ހޮޓެލްގައި ކުރިއަށް ގެންދިޔަ ތަމްރީނު ޕްރޮގްރާމެކެވެ.

މި މަސައްކަތު ބައްދަލުވުން އަމާޒު ކޮށްފައި ވަނީ ސްރީލަންކާ، ބަންގްލަދޭޝް އަދި ދިވެހިރާއްޖޭގެ އެންޓި ކޮރަޕްޝަން އެޖެންސީތަކުގައި މަސައްކަތް ކުރައްވާ އިންވެސްޓިގޭޝަން އޮފިސަރުންނަށްކަން އޭސީސީން ފާހަގަކޮށްފައިވެއެވެ.

މި މަސައްކަތު ބައްދަލުވުމުގެ މަޤްޞަދަކީ ސަރަހައްދީ ޤައުމުތަކުގައި ހިނގާ މާލީ ކޮރަޕްޝަންގެ ކުށްތައް މަދުކޮށް، ކުށްކުރާ ވައްޓަފާޅި ދެނެގަތުންކަމަށް އޭސީސީން މައުލޫމާތު ދެއެވެ. އެގޮތުން އެ ކަންކަން ތަޙުޤީޤުކުރާ އޮފިސަރުންނަށް ކަމާބެހޭ މަޢުލޫމާތު ވެސް ވަނީ ފޯރުކޮށްދީފައެވެ.

އޭސީސީން ބުނެފައިވާ ގޮތުގައި މާލީ ކޮރަޕްޝަންގެ ތެރޭގައި ހިމެނޭ މަނީ ލޯންޑްރިންގ ފަދަ ބޮޑެތި ކުށްތައް ދެނެގަންނާނެ އުކުޅުތަކާއި، އެ ކުށްތައް ހުއްޓުވުމަށް އެޅިދާނެ ފިޔަވަޅުތަކާއި، ދައުވާ އުފުލުމާއި ޕްރޮސެކިއުޝަން މަރުޙަލާގައި ޢަމަލުކުރާނެ ގޮތުގެ މަޢުލޫމާތު ޔޫ.އެން.އޯ.ޑީ.ސީގެ ތަޖުރިބާކާރުން ބައިވެރިންނާ ހިއްސާ ކޮށްފައިވާކަމަށެވެ.

މި މަސައްކަތު ބައްދަލުވުމުގައި އޭ.ސީ.ސީގެ 6 މުވައްޒަފަކު ވަނީ ބައިވެރިވެފައެވެ.