ގައުމީ ޖާޒީގައި މިނިސްޓަރ މަހުލޫފު ދަނޑަށް!
މިނިސްޓަރ މަހްލޫފު ދަނޑަށް ނުކުމެވަޑައިގަތީ މެޗުގެ ދެވަނަ ހާފުގައި
ޔޫތު މިނިސްޓަރ މަހުލޫފު ގައުމީޓީމު ޖާޒީގައި
ކުޅުދުއްފުށީ ފުޓުބޯޅަދަނޑު ރަސްމީކޮށް ހުޅުއްވުމަށް ފަހު، ކުޅުދުއްފުށީ ޒުވާނުންނާއި ދިވެހިރާއްޖޭގެ ގައުމީ ފުޓުބޯޅަޓީމާއި ދެމެދުގައި ކުޅުނު އެކުވެރިކަމުގެ ޚާއްސަ މެޗުގައި ޔޫތު މިނިސްޓަރ އަހްމަދު މަހުލޫފު ގައުމީޓީމުގެ ކުޅުންތެރިއެއްގެ ގޮތުގައި ކުޅުއްވައިފިއެވެ.
ކުޅުދުއްފުށީގައި މިހާރު ކުލަގަދަކޮށް ފާހަގަކުރަމުންދާ ޒުވާނުންގެ ދުވަހުގެ ހަފުލާތަކުގެ ތެރެއިން ކުޅުދުއްފުށީ ފުޓުބޯޅަދަނޑު ރަސްމީކޮށް ހުޅުވައިދެއްވީ ރައީސް އިބްރާހިމް މުހަންމަދު ސާލިހެވެ. ފުޓުބޯޅަދަނޑު ހުޅުވުމާއިއެކު ކުޅުދުއްފުށީގައި ފުޓުބޯޅައަށް ލޯބިކުރާ ޒުވާނުންގެ ހުވަފެންތަކުގައި ކުލަޖެހި އެންމެހައި ރައްޔިތުންނަށް ހިނިތުންވުމެއް ވަނީ ލިބިފައެވެ.
މިނިސްޓަރ މަހުލޫފަކީ ކުރިން ޕްރޮފެޝަނަލް ކުޅުންތެރިއެކެވެ. ކުލްބް ވެލެންސިއާއަށްވެސް ކުޅުއްވިއެވެ. ކުޅުދުއްފުށީގައި ކުޅުނު ޚާއްސަ މެޗުގައި މިނިސްޓަރު ބައިވެރިވެވަޑައިގެންނެވީ ބޮޑަށް ރަމްޒީގޮތެއްގައެވެ.
