ޒަމާނީ ޓެކްނޮލޮޖީގެ އެހީގައި ރާއްޖޭގެ އިޤްތިޞާދީ ދާއިރާތައް ކުރިއެރުވުން މިއީ ރާއްޖެއަށް މިވަގުތު އެންމެ ބޭނުންވާ ކަންތައް: ރައީސް
ޒަމާނީ ޓެކްނޮލޮޖީއަކީ ރާއްޖޭގެ އިޤްތިޞާދީ ދާއިރާތައް ކުރިއެރުވުން މިވަގުތު އެންމެ ބޭނުންވާ ކަންތައް
އިބްރާހީމް މުޙައްމަދު ޞާލިޙް، ޒުވާނުންގެ ޖަލްސާގައި ވާހަކަ ދެއްކަވަނީ
ޒަމާނީ ޓެކްނޮލޮޖީގެ އެހީގައި ރާއްޖޭގެ އިޤްތިޞާދީ ދާއިރާތައް ކުރިއެރުވުން މިއީ ރާއްޖެއަށް މިވަގުތު އެންމެ ބޭނުންވާ ކަންތައް ކަމަށް ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ، ހޮނިހިރު ދުވަހުގެރޭ ހދ. ކުޅުދުއްފުށީގައި ބޭއްވި ޒުވާނުންގެ ޖަލްސާގައި ވާހަކަފުޅު ދައްކަވަމުންނެވެ.
މި ޖަލްސާގައި ވަނީ އެކި ދާއިރާތަކުން އެވޯޑް ހާސިލު ކުރި 10 ޒުވާނަކަށް އެވޯޑް ދީފައެވެ.
އެވޯޑް ލިބުނު ޒުވާނުންނަށް އިޝާރާތް ކުރައްވައި, ރައީސް ޞާލިޙް ވިދާޅުވީ، އެވޯޑް ޙާޞިލްކުރި ދާއިރާތަކުން އެ ޒުވާނުން ކުރެއްވި މަސައްކަތްތަކުން ވެސް، ޤައުމުގެ ކަންކަން ރަނގަޅު ކުރުމުގެ ޢަޒުމް ދިވެހި ޒުވާނުންގެ ކިބައިގައި ވަރަށް ރަނގަޅަށް އެބަހުރިކަން ސާބިތުވާ ކަމަށެވެ.
އެވޯޑް ޙާޞިލްކުރި ދާއިރާތަކުގެ ތެރޭގައި، ތިމާވެށި ޙިމާޔަތްކުރުން، ދަނޑުވެރިކަން ކުރިއެރުވުން، އަދި މަސްވެރިކަމާއި ފަންނުވެރިކަމުގެ ދާއިރާ ވެސް ހިމެނެއެވެ.
މި ޖަލްސާގައި ވަނީ އެ ޒުވާނުންނާ ބެހޭ ވީޑިއޯ ތަޢާރަފެއް ވެސް ދީފައެވެ.
ރައީސް ވިދާޅުވީ، ޒަމާނީ ޓެކްނޮލޮޖީގެ އެހީގައި ރާއްޖޭގެ އިޤްތިޞާދީ ދާއިރާތައް ކުރިއެރުވުން މިއީ ރާއްޖެއަށް މިވަގުތު އެންމެ ބޭނުންވާ ކަންތައް ކަމަށެވެ. މަސްވެރިކަން ވެސް އަދި ދަނޑުވެރިކަމާއި އެހެނިހެން މަސައްކަތްތައްވެސް، ޒަމާނީ ޓެކްނޮލޮޖީގެ އެހީގައި މިހާރަށް ވުރެ މާބޮޑަށް މާލުއިފަސޭހަކޮށް، ތަރައްޤީކޮށް ކުރިއެރުވޭނެ ކަމަށް އެމަނިކުފާނު ވިދާޅުވިއެވެ.
ޤައުމުގެ ތަރައްޤީގައި ޒުވާނުންގެ ޙިއްޞާ އިތުރުކުރުމަށް ސަރުކާރުން ވަރަށް މުހިންމު މަސައްކަތް ކުރައްވާ ކަމަށް ފާހަގަކުރައްވައި އެމަނިކުފާނު ވިދާޅުވީ، އޭގެ ތެރެއިން އެއް ކަމަކީ މަސައްކަތުގެ ހުނަރު ދަސްކޮށްދީ ވަޒީފާގެ ބާޒާރަށް ޒުވާނުން ނެރުމަށްޓަކައި، މިއަހަރު ފަށައިގެން ޤައުމީ ފެންވަރުގައި ކުރިއަށް ގެންދާ އެޕްރެންޓިސްޝިޕް ޕްރޮގްރާމް ކަމަށެވެ.
ޤައުމީ ކަންކަމުގައި އިސްނެގުމާއި ހިންގުމުގެ ރޫޙު ޒުވާނުންގެ މެދުގައި އާލާކުރުމުގެ ޕްރޮގްރާމެއް ވެސް މިހާރު ކުރިއަށްދާ ކަމަށާއި، މިއަހަރު ފެށި ނޭޝަނަލް ވޮލަންޓިއަރސް ޕްރޮގްރާމްގައި މިއަދާ ހަމައަށް ޖުމްލަ 105 ވޮލަންޓިއަރުން ބައިވެރިވެއްޖެ ކަމަށް ރައީސް ވިދާޅުވިއެވެ. އެމަނިކުފާނު ވިދާޅުވި ގޮތުގައި، އޭގެ ތެރެއިން 40 ވޮލަންޓިއަރުން ތަމްރީން ފުރިހަމަކޮށް, މިހާރު އަންނަނީ ޤައުމީ ކަންކަމުގައި ބައިވެރިވަމުންނެވެ. ކޮވިޑް ފެސިލިޓީތަކުގައި ވެސް ބައެއް ވޮލަންޓިއަރުން ވަރަށް މުހިންމު ޚިދުމަތްތަކެއް ކުރެއްވި ކަމަށް ރައީސް ޞާލިޙް ފާހަގަކުރެއްވިއެވެ
