މަޝްހޫރު ޑިޒައިނަރ ރައިދާ ޝަފީގުގެ ފިހާރައެއް ކްރޮސްރޯޑްސްގައި ހުޅުވައިފިއެވެ.

"ރައިދާސް މޯލްޑިވްސް"ގެ ނަމުގައި ކްރޮސްރޯޑްސްގައި ގާއިމްކޮށްފައިވާ ފިހާރަ ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަނީ ބައިވެރިވެވަޑައިގެންފައެވެ. އަދި އެމަނިކުފާނުގެ އަނބިކަނބަލުން ފަޒްނާ އަހުމަދު ވެސް މި ރަސްމިއްޔާތުގައި ބައިވެރިވެވަޑައިގެންފައިވާއިރު، އެދެކަނބަލުންގެ އަރިހުގައި ފިހާރައިގެ ވެރިފަރާތް އަދި މަޝްހޫރު ޑިޒައިނަރ ރައިދާ ޝަފީގް ވެސް ވަނީ ބައިވެރިވެވަޑއިގެންފައެވެ.

ރައިދާސް މޯލްޑިވްސް އަކީ 2015 ވަނަ އަހަރު ވުޖޫދަށްގެނައި ދިވެހި ފެޝަން ލޭބަލްއެކެވެ. މި ލޭބަލް ޚާއްސަކުރެވިފައި ވަނީ އަންހެނުންނަށް ޚާއްސަ ތަފާތު ވައްތަރުގެ ހެދުންތަކަށެވެ. ފާއިތުވި އަހަރުތަކުގައި ރައިދާސް މޯލްޑިވްސް ގެ ހެދުން ކަލެކްޝަންތައް ވަނީ އެކި ގައުމުތަކުގައި ދައްކާލައި، ފެޝަންގެ ދުނިޔޭގައި މީހުންގެ މަގުބޫލުކަން ހޯދާފައެވެ.

ދަ މެރީނާ އެޓް ކްރޮސްރޯޑްސްގައި ރައިދާސް މޯލްޑިވްސްގެ ސްޕްރިންގ ސަމަރ ކަލެކްޝަން 2022 ދައްކާލުމުގެ ގޮތުން ވަނީ ފެޝަން ޝޯއެއް ކުރިއަށް ގެންނޮސްފައެވެ.