ހެބިޓަސް ފްރެޝްގެ ނަމުގައި ފަތުގެ ބާވަތްތައް ވިއްކާ ފިހާރައެއް ހުޅުވައިފި
ލެޓިއުސްގެ 07 ބާވަތެއް އުފައްދާފައިވޭ
މައިކްރޯބީންސް
ރާއްޖޭގައި ހައިޑްރޯޕޯނިކްސް ސިސްޓަމް ބޭނުން ކޮށްގެން އުފައްދާ ފަތުގެ ބާވަތްތަކަށް ހާއްސަކޮށްގެން " ހެބިޓަސް ފްރެޝް" ގެ ނަމުގައި ފިހާރައެއް ހުޅުވައިފި އެވެ.
މި ފިހާރަ ހުޅުވާފައިވަނީ ޓާޓާއިން ކުރީގެ އަރަބިއްޔާ ހުރި އިމާރާތުގެ ޝޮޕިންގ ކޮމްޕްލެކްސްގަ އެވެ.
މިކަމާ ގުޅޭ ގޮތުން ހެބިޓަސް ފްރެޝް އިން މައުލޫމާތު ދެއްވަމުން އަހުމަދު ޒައިން ވިދާޅުވީ، މިފަދަ ފިހާރައެއް ހުޅުވީ ސިއްހަތަށް ސަމާލުކަންދޭ ފަރާތްތަކަށް ހާއްސަކޮށްގެން ހަށިގަނޑަށް ފައިދާ ހުރި ފަތުގެ ބާވަތްތައް ރައްޔިތުންނަށް ގެނެސްދިނުމަށް ކަމަށެވެ. އެގޮތުން ހެބިޓަސް ފްރެޝް އިން ލިބެން ހުންނަ ޕްރޮޑަކްޓްތަކަކީ ރަގަޅަށް ޕެކްކޮށްފައި ކަމަށެެވެ. އަދި ތާޒާ ފަތުގެ ބާވަތްތައް ލިބިގެންދާނެ ކަމަށް އޭނާ ވިދާޅުވި އެވެ. ލެޓިއުސް އާއި މައިކްރޯގްރީންސް ބާވަތްތައް ހެބިޓަސް ފްރެޝް އިން ލިބިގެންދާނެ އެވެ.
" އަޅުގަނޑުމެން އެބަ ވިއްކަން ހަތް ވައްތަރެއްގެ ލެޓިއުސް އާއި 18 ވައްތަރެއްގެ މައިކްރޯގްރީންސް. ދެން މައިކްރޯގްރީންސް އަކީ ވަރަށް ކުޑަކުޑަ ފަތެއް. އެކަމަކު ތަފާތު ރަހަތަށް ލިބޭނެ. އަޅުގަނޑުމެން މަސައްކަތް ކުރަނީ ތާޒާ ތަރުކާރީ ފޯރުކޮށްދެވޭތޯ،" ޒައިން ވިދާޅުވި އެވެ.
ހެބިޓަސް ފިހާރައިން ވިއްކާ ފަތުގެ ބާތްތައް ރާއްޖޭގެ އިތުރު ސަރަހައްދުތަކުގައި ގާއިމް ކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
" މިދިޔަ އަހަރުން ފެށިގެން ހައިޑްރޯޕޯނިކް ސިސްޓަމް ގާއިމް ކުރުމުގެ މަސައްކަތް ކުރަމުންދަނީ. ވަރަށް ބުރަ މަސައްކަތެއް މިކުރަނީ،" ޒައިން ވިދާޅުވި އެވެ.
ހައިޑްރޯޕޯނިކްސް ސިސްޓަމް ބޭނުންކޮށްގެން ގަސް އިންދުމަކީ އިންޑޯގައި އާޓިފިޝަލް އަލި ބޭނުންކުރުމުގެ އިތުރުން ފެނުގައި ގަސް އިންދުމުގެ ސިސްޓަމެކެވެ.
