ސިންގަޕޫރުގައި ކޮވިޑްގެ އައު ކޭސްތަކާއެކު މަރުގެ އަދަދު މައްޗަށް!
އައިސީޔޫ އެނދުތައް މަދުވެދާނެކަމުގެ ބިރު ވަނީ ހީވެފައި
ސިންގަޕޫރުގައި ކޮވިޑްގެ ހާލަތުދަނީ ގޯހުން ގޯހަށް.
ސިންގަޕޫރުގައި ކޮވިޑްގެ ހާލަތުގޯސްވެ އައިސީޔޫ އެނދުތައް މަދުވެދާނެކަމުގެ ބިރު ހީވެފައިވާކަމަށް އެ ގައުމުގެ ހެލްތް މިނިސްޓަރ އޮންގް ޔޭ ކުންގް ވިދާޅުވެއްޖެއެވެ. އޭނާ މިހެން ވިދާޅުވީ ހޮސްޕިޓަލްތަކުގެ އައިސީޔޫގެ ތިންބަައި ކުޅަ ދެބައި ފުރި ރައްޔިތުން ނުތަނަވަސްކަމުގައި ތިއްބައެވެ.
އެ ގައުމުގައި ކޮވިޑް ބަލިމީހުންނަށް 200 އައިސީޔޫ އެނދު ޚާއްސަކޮށްފައިވާއިރު މީގެ ގިނަ އެނދުތަކުގައި ފަރުވާދެމުން ދަނީ ވެންޓިލޭޓަރުގެ އެހީގައި ފަރުވާދޭ ބަލިމީހުނަށެވެ. އަދި މި އެނދުތަކުގެ 90 އިންސައްތަ މިހާރުވަނީ ފުރިފައެވެ. މިކަމާއި ގުޅިގެން އޮންގް ވިދާޅުވީ ހާލަތު އިތުރަށް ގޯސްވެދާނެކަމަށް ހޮސްޕިޓަލް ތަކުން ތައްޔާރުވަމުން އަންނަ ކަމަށާއި މިކަމުގައި ސަރުކާރާއި މިނިސްޓްރީތަކުގެ ފުރިހަމަ އެއްބާރުލުން ލިބެމުންދާކަމަށެވެ. އަދި އޭނާ ވިދާޅުވީ އައިސީޔޫ އެނދުތައް އިތުރުކުރަން ޖެހިއްޖެނަމަ 300 އެނދު އިތުރުކުރުމުގެ ގާބިލުކަން މި ވަގުތު އެބހުރި ކަމަށެވެ.
ކޮވިޑްގެ ހާލަތު ގޯސްވެ އެނދުތައް މަދުވެދާނެ ކަމުގެ ބިރުވެތިކަމާއިއެކު، މި ވަގުތު އެ ގައުމުގައި ހާލު ބޮޑުނުވާ ކޮވިޑް ބަލިމީހުނަށް ފަރުވާދެމުން ދަނީ ގޭގައެވެ. ކޮވިޑް ފެތުރުން ހުއްޓުވުމަށް އަޅާފައިވާ ފިޔަވަޅުތައް ވެސް ދަނީ ހަރުކަށިކުރަމުންނެވެ.
