ފްލެމިންގޯއަކީ ދިވެހީންނަށް ވަރަށް އައު ނަމަކަށް ވެދާނެއެވެ. އެހެންނަމަވެސް އެނަން ކިޔާ ދޫންޏަކީ ދިވެހީންނަށް އައު ދޫންޏެއް ނޫނެވެ. އެ ދޫނީގެ އާދަތަކާއި ސިފަޔަށް ނިސްބަތްކޮށްފައި ދިވެހީން އެޔަށް އެކިކަހަލަ ނަންނަން ކިޔަމުން އައިސްފައިވާކަމީ އެދޫންޏާއި ދިވެހިން ނުހަނު ބޮޑަށް ދޯޅުކަމަށް ދަލީލުކުރާ ކަމެކެވެ. ގުޑުގުޑާ ދޫންޏޭވެސް ކިޔައެވެ. އެހެން ކިޔަނީ ކަރުދިގުވެފައި ތިންގުދު ނޮޅިޔަކާއި ވައްތަރުކަމުންނެވެ. ސަފުހަދާ ދޫންޏޭވެސް ކިޔައެވެ. އެއީ އައިންއައިނަށް ޖަމާއަތެއްގެ ގޮތަށް ވަރަށް ތަރުތީބުން އުޅޭ އަދި އިޖުތިމާއީ ގުޅުންތަކަށް އިސްކަންދޭ ދޫންޏަކަށްވާތީއެވެ. ކޮންމެ އަހަރެއްގެވެސް އޮކްޓޫބަރުމަހާއި އަނެއް އަހަރުގެ މާރިޗްމަހާއި ދޭތެރޭގައި މިދޫނިތައް ދުނިޔޭގެ އެކި ބިތްބިތަށް ދަތުރުކޮށް އުޅެއެވެ. އެގޮތުން ރާއްޖޭގައިވެސް ޓްރާންސިޓް ކުރަނީއެވެ.
އެސޮރުމެންގެ އަމިއްލަ ވަޒަނަކަށް ހަދައިގެން މުޅިއަހަރު ދިވެހިރާއްޖޭގައި ނޫޅުނަސް އިންސާނުން މިރަށްތަކުގައި ދިރިއުޅެން ފެށުމުގެ މާކުރިންވެސް ފްލެމިންގޯ ދޫނިތަކުގެ ދަތުރުފަތުރުގެ މަންޒިލަކަށް ރާއްޖެ ހިމެނިފައިވާނޭކަމީ ކަށަވަރު ކަމެކެވެ. މޫސުމީ ދޫންޏެއްގެ ގޮތުގައި އެސޮރުމެން ދިވެހީންނަށް އެނގި ދަސްވިތާ އެތައް ހާސް އަހަރެއް ވާނީ ވެފައެވެ. ކޮންމެ އަހަރަކުވެސް ފިނިމޫސުމުގެ އަސަރުތައް ފެންނާންފެށީމާ އެސޮރުމެން އެކުރާ ދަތުރުގައި ދިވެހިރާއްޖޭގައި އަންނަނީ މަޑުކުރަމުންނެވެ. އެކިއަހަރު އެކި މިންވަރަށެވެ. މިއަހަރު ތަންކޮޅެއް ގިނައީކަންވެސް ނޭނގެއެވެ. މުޅިން އައު އެއްޗެއް ފެނިގެން އުޅޭ ބީދަޔަކުން ވަރަށް ގިނަބަޔަކު އެސޮރުމެންގެ ފޮޓޯ ހިއްސާކުރަމުން ލިޔުންތައް ލިޔަމުންދާތީ އެބަފެނެއެވެ. އެހެންވެދާނެއެވެ. ކުރީޒަމާނުގައި ކުއްޅަވައް ނޭނގޭކަމަށް ހެދޭ މީހުންގެ ވާހަކަވެސް މީހުން ކިޔައި އުޅުނެވެ.
ފްލެމިންގޯ އާއިލާއަށް ނިސްބަތްވާ ހައެއްކަ ވައްތަރު އުޅޭކަމަށްވެއެވެ. އެސޮރުމެން އާއްމުގޮތެއްގައި ދިރިއުޅެނީ ދެކުނު އެމެރިކާއާއި އެފްރިކާ އަދި އޭޝިއާގެ އެކި ސަރަހައްދުތަކުގައެވެ. މާ ހަލުވި ދޫންޏެއް ނޫނެވެ. ކަރުދިގުވެފައި ފައިވެސް ދިގުވެފައި ހަށިގަނޑުގެ ސައިޒުވެސް ބޮޑުވީމާ ކަމަށް ވެދާނެއެވެ. އެކަމަކު މިއީ އިޖުތިމާއީ އަދަބުސަދަބާއި އެކުވެރިކަމާއި އެކަތި އަނެކައްޗަށް އޮންނަ ކުލުނާއި ވަފާތެރިކަމުގެ ގޮތުން ވަރަށްވެސް ލާމަސީލު ދޫންޏެކެވެ. ދޫނިސޫފާސޫފީގެ ތެރޭގައި ގިނައީ ކުކުޅުހާލުގެ އުސޫލަށް ތަބާވާ ތަކެއްޗެވެ. ބައިވެރިޔަކު ޚާއްސަކޮށްގެން ކަންކަން ހިއްސާކޮށްގެން ޒިންމާދާރުވެގެން އުޅުމުގެ ސިފަ އެއްވެސް ވަރަކަށް ނުހުރެއެވެ. އެކަމަކު ދިވެހީން ކުއްލިޔަކަށް އެސޮރުމެންގެ ވާހަކަ ދައްކަމުންމިދާ ފްލެމިންގޯ ދޫނި މުޅިން ތަފާތެވެ.
އެންމެ ޚާއްސަ އެއްސިފަޔަކީ ފްލެމިންގޯ ދޫންޏެއް ބޮޑުވެ ފުރާފުރިހަމަ ވުމަށްފަހުގައި އިޚުތިޔާރުކުރާ ބައިވެރިޔަކީ ގިނަދުވަހުގެ ބައިވެރިއަކަށް ވުމެވެ. ފެންނަހާ ދޫންޏަކަށް ހިތްކިޔަމުން މައްލަވަކުރަމުން ފޭލިދެމުން ނޫޅޭނެއެވެ. ވަފާތެރިކަމުގައި ނަމޫނާ ދައްކާނެއެވެ. އެހީތެރިވުމުގައިވެސް ނަމޫނާ ދައްކާނެއެވެ. އަންހެން ދޫނި އާއްމުގޮތެެއްގައި އަޅާނީ ބޮޑު އެއްބިހެވެ. އޭގެ ބައްޓަން ކުކުޅުބިހާއި ދާދި އެއްގޮތެވެ. މަދުފަހަރެއްގައި ދެބިސްވެސް އަޅައިފާނެއެވެ. ކޮންމެއަކަސް އެބިސް ފީކޮށް ފިޔޮކަކަށް ބަދަލުވެ ބޮޑުވާންދެންވެސް ފިރިހެން އެތީގެ އެހީތެރިކަން ބަރާބަރަށް ލިބެމުންދާނެއެވެ. ބިސްއަޅައިގެން އޮންނައިރު ނުވަތަ ޅަތަކެއްޗާއެކު އަންހެންދޫނި އުޅޭނެ ހާލަކަށް އުޅޭން ފިރިހެންއެތި ދުލެއް ނުކުރެއެވެ. އެހެން ބައިވެރިޔަކު ހޯދުމެއްވެސް ނޯވެއެވެ.
އަންހެން ދޫންޏާއި ފިރިހެންދޫނީގެ ލޯބީގެ ހަރަކާތްތައްވެސް ނުހަނު ރޮމޭންޓިކެވެ. ތިންގުދު ނޮޅިޔަކާ ވައްތަރުގެ ކަރެއް ލިބިގެންވާތީ އެކަތި އަނެކައްޗާ މުއާމަލާތުކުރާއިރު ބައެއްފަހަރަށް ހިތުގެ ބައްޓަމެއްވެސް ސިފަވެގެންދެއެވެ. ހިތަކީ އިންސާނުންގެ ލޯބި ރަމްޒުކޮށްދޭ އެއްޗެކެވެ. ފްލެމިންގޯ ދޫނީގެ ޖޯޑެއް ރޮމޭންޓިކް ގޮތްގޮތަށް އުޅޭއުޅުމުގައި ދެތުން ކައިރިކޮށްގެން ތިބޭ ވަގުތު ސިފަވާނީ މަތީގައިވާ ފޮޓޯއިން އެފެންނަ ގޮތަށް ހިތަކާއެވެ. އެހެންވީމާ ފްލެމިންގޯއަކީ ހަގީގަތުގައިވެސް ރޮމޭންޓިކް ދޫންޏަކީއެވެ. އޭގެ އިޖުތިމާއީ އަދި އާއިލީ ޒިންމާތަކުން އިންސާނުންނަށް ވެސް އެއްޗެއް، ނުވަތަ ދޭއްޗެއްވަރު ދަސްކުރެވިދާނެއެވެ. ދިވެހީންވެސް ހިމެނޭގޮތުންނެވެ. އެހެނީ އާއިލީ ޒިންމާޔާއި އިޖުތިމާއީ ޒިންމާތައް އަދާނުކުރެވިގެން ނުކުންނަ މައްސަލަތަކުގެ ވާހަކަ ކޮންމެ ދުވަހަކުވެސް މިދަނީ އިވެމުންނެވެ.
ފްލެމިންގޯއަކީ އެކަނިއެކަނި ނަފްސީވެގެން އުޅޭ ދޫންޏެއް ނޫނެވެ. އެހެންވީމާ ލީޑަރޝިޕްގެ ކަންކަމުގައިވެސް އެސޮރުމެންގެ ކިބައިން އިންސާނުން ދަސްކުރާންވީ ކަންކަން އެބަހުއްޓެވެ. ހިޖުރައިގެ ދަތުރުގައި ވީއަކުރުގެ ބަައްޓަމަށް އެކަތި ކުރީގައި އޮވެގެން އެތައް ސަތޭކަ ނުވަތަ އެތައްހާސް ދޫންޏެއް އޭގެ ފަހަތުން އުދުހިފައިދާއިރު އެންމެ ބުރަކޮށް އުޅޭނީ އެންމެ ކުރީގައި އޮންނަ ދޫންޏެވެ. އެއީ ލީޑަރެވެ. އެސޮރު އަވަހަށް ވަރުބަލިވާނެތީ އޭގެ ބަދަލުގައި ވަކި ތަރުތީބަކުން އެހެން ދޫނިތައްވެސް އެމަގާމަށް އަންނާނެއެވެ. ލީޑަރޝިޕަކީ ހިއްސާކުރެވޭ ޒިންމާއެކެވެ. އެއީ އިނާމެއް ނޫނެވެ. އެއީ ހަކަތަ އެންމެ އަވަހަށް ހުސްވެގެންދާ އެންމެ ބޮޑު ޒިންމާއެވެ. ދޫނި އައިނުގެ ތެރެއިން އެންމެ އެއްޗަކަށް ނުރައްކަލެއް ކުރިމަތިވިޔަސް އެ ނުރައްކަލަކާ ކުރިމަތިލާނީ މުޅި ލަޝްކަރެވެ. ވާނެ އެއްޗެއް ވާން ދުލެއް ނުކުރާނެއެވެ.
ފްލެމިންގޯގެ ޚާއްސަ އަނެއް ސިފަޔަކީ ކެތްތެރިކަމެވެ. އެއްފައިމަތީގައި ގުޑާވެސް ނުލައި ހުރުން ތަބައީގޮތުން އެސޮރަށް ފަސޭހައަކީ ނޫނެވެ. އެކަމަކު ކާބޯތަކެތި އެއްކުރުމުގައި ކެތްތެރިވާންޖެހޭ ހާލަތުގައި އެއްފައިމަތީގައި ހަތަރު ގަޑިއިރުވެސް ގުޑާނުލައި ހުރެދާނެއެވެ. އެސޮރުމެންގެ ކެތްތެރިކަން ހުންނަނީ އެފެންވަރުގައެވެ. އިންސާނުންނަށްވެސް އެއްފައިމަތީގައި ތިބެވިދާނެއެވެ. އެކަމަކު އެއްފައިމަތީގައި މިނިޓެއްހާއިރުވެސް ކެތްކޮށްލުމަކީ ގިނަފަހަރު ނުކުރެވޭ ކަމެކެވެ. ކޮންމެއަކަސް ފްލެމިންގޯގެ އާދަޔާ ޚިލާފު މި ސިފަތަކުގެ ސަބަބުން ވަރަށް ގިނަ ސަގާފަތްތަކުގައި އެސޮރުމެންނަށް ޚާއްސަ މަގާމެއް ދެވިފައިވެއެވެ. ކެރީބިއަންގެ ބައެއް ގައުމުތަކުގެ ގައުމީ ދޫންޏަކީވެސް ފްލެމިންގޯއެވެ. އެސޮރުމެން ހިފައި ހައްޔަރުކޮށް ގޯނާކުރުމަކީ ގާނޫނީގޮތުން ކުށެކެވެ.
