ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އަކީ ކެތްތެރިކަމާއި، ހިތްތިރިކަމުގެ ލާމަސީލު ނަމޫނާއެއް ކަން ދިވެހި ގިނަ ރައްޔިތުން ދަންނާނެ އެވެ. ވެރިކަމުގެ ފަސް އަހަރު ދުވަސް އެމަނިކުފާނު އެ ނިންމަވާލައްވަނީ އެއްވެސް މީހަކަށް ބަދު ބަހެއް ވެސް ބުނެ ނުލަ އެވެ. އަނެއްކޮޅުން، އެކި ގޮތްގޮތުން އެމަނިކުފާނުގެ ސަރުކާރާ ދެކޮޅަށް ރައްދު ކުރަމުން އައި ބަސްތަކާއި، އަމަލުތަކަށް ވެސް ކުރިމަތިލެއްވީ ޙިކުމަތްތެރިކަމާއެކު އެވެ. ވިސްނުންފުޅު އިސްކުރައްވާ، ވިދާޅުވާ ކޮންމެ ވާހަކައެއްމެ ވިދާޅުވަނީ ވަރަށް ފުންކޮށް ވިސްނަވާފަ އެވެ. އެމަނިކުފާނަކީ އަޚުލާޤު ރަނގަޅު، ބޭފުޅެއްކަމަށް ގިނަ ރައްޔިތުން އައި ބުނަމުންނެވެ.
ރައީސް ޞާލިޙުގެ ފަސް އަހަރު ދުވަހުގެ ވެރިކަން ނިމެން ކުޑަ ދުވަސްކޮޅަކަށްވެފައިވާއިރު، އެމަނިކުފާނުގެ ވެރިކަމުގައި ވަނީ އެތައް ގޮންޖެހުންތަކާ ކުރިމަތިލާން ޖެހިފަ އެވެ. އެންމެ ފުރަތަމަ ކޯލިޝަން އެވެ. ވެރިކަމަށް ވަޑައިގެންނެވީ ގިނަ ޕާޓީތަކެއް ހިމެނޭހެން، ކޯލިޝަނަކުން ކަމަށް ވާތީ، އަބަދު ވެސް ރައީސް ޞާލިޙު ބެއްލެވީ ކޯލިޝަން އެގޮތުގައި ދެމެހެއްޓެވޭތޯ އެވެ. ވެރިކަމަށް ދެ އަހަރުވެ، ރަނގަޅަށް ހިންދެމިނުލެވިގެން އުޅެނިކޮށް، ކޯލިޝަންގެ ތެރޭގައި ޚިޔާލު ތަފާތުވުންތައް އުފެދުނެވެ. އެކި އެކި މައްސަލަތަކުގަ އެވެ. ކޯލިޝަން ސަރުކާރެއް ނުހިންގޭނެ ކަމަށް ވިދާޅުވެ، އަމިއްލަފުޅު ޕާޓީގެ ރައީސް އަބަދުމެ އެ ވާހަކަ ދެއްކެވި އެވެ. ނަމަވެސް، ފަސް އަހަރުގެ ދައުރު ރައީސް ޞާލިޙު އެ ނިންމަވާލަނީ ކޯލިޝަން އެގޮތުގައި ބާއްވައިގެންނެވެ.
ކޯލިޝަންގެ ތެރެއިން ވެސް އެކި އެކި މައްސަލަތައް ކުރިމަތިވި އެވެ. ހުރިހާ ލީޑަރުން ހިތްޕުޅާވާ ގޮތަށް އެއްވެސް ކަމެއް ނުކުރެވޭނެތާ އެވެ. އެހެންވިޔަސް، ތަފާތު ޚިޔާލުތަކުގެ ގިނަ ބަޔަކު ގޮވައިގެން ފަސް އަހަރުގެ ދައުރެއް ނިންމަވާލެވޭނީ، ޙިކުމަތްތެރި ލީޑަރަކަށެވެ. ފަހު ވަގުތު ކޯލިޝަންގެ ބައެއް ލީޑަރުން ސީދާ ސަރުކާރާ ދެކޮޅަށް ނިކުންނެވި އެވެ. ނަމަވެސް، އެއިން އެއްވެސް ޕާޓީއެއްގެ ބޭފުޅަކު ސަރުކާރުގެ މަގާމުން ވަކިކޮށްފައެއް ނެތެވެ. ހެނދުނު ރަސްމީ ގަޑިން ފެށިގެން ގޮސް، ރަސްމީ ގަޑި ނިމެންދެން ބައެއް ވަޒީރުން ދެއްކެވީ ސަރުކާރުގެ މޮޅު ވާހަކަ އެވެ. އޮއްސާލައްވަނީ ރައީސް ޞާލިޙަށް ތައުރީފުގެ ބަސްތަކެވެ. އެކަމަކު، ރޭގަނޑު އަމިއްލަ ޕާޓީން ބާއްވާ ޖަލްސާގައި ވިދާޅުވަނީ ރައްޔިތުންނަށް ހެޔޮ ގޮތް ހޯއްދަވަން ޖެހޭ ވާހަކަ އެވެ. މިވަރަށް ކޯލިޝަންގެ ބައެއް ބޭފުޅުން ކަންތައް ކުރެއްވި ނަމަވެސް، ރައީސް ޞާލިޙުގެ ފަރާތްޕުޅުން ފެނުނީ ވީ ވައުދާ އެއްގޮތަށް ކޯލިޝަން ހިފެހެއްޓެވި މަންޒަރެވެ.
ދެން ރައީސް ޞާލިޙަށް ކުރިމަތިވީ އަމިއްލަފުޅު ޕާޓީގެ އެތެރޭގެ ފިއްތުންތަކެވެ. ޒަމާންވީ އެންމެ ގާތް ރަޙުމަތްތެރިޔާ، ރައީސް މުޙައްމަދު ނަޝީދާއި، އެމަނިކުފާނުގެ ސަޕޯޓަރުން ސީދާ ރައީސް ޞާލިޙާ ދެކޮޅަށް ނިކުނެންވި އެވެ. ރައީސް ޞާލިޙާ ގުޅޭ ގޮތުން އެތަކެއް ދޮގު ވާހަކަތަކެއް ދައްކައި، ރައީސް ޞާލިޙުގެ އަބުރުފުޅު ކަތިލެއްވުމަށް މަސައްކަތް ކުރެއްވި އެވެ. މިކަންކަމާ ވެސް ރައީސް ޞާލިޙު ކުރިމަތިލެއްވީ ޙިކުމަތްތެރިކަމާއެކު އެވެ. އެއީ ދޮގު ވާހަކަތަކެއް ކަމަށް ވިދާޅުވީ ވެސް ވަރަށް ހަމަޖެހިގެން ހުންނަވަ އެވެ. ރައްދުގައި އެއްވެސް މީހަކަށް ބަދު ބަހެއް ނުވަތަ ދެރަ ބަހެއް ވިދާޅެއް ނުވެ އެވެ. އަމުދުން ހުުތުރު ބަހަކުން މުޚާތަބެއް ނުކުރައްވަ އެވެ.
ރިޔާސީ ކެމްޕެއިނުގެ ތެރޭގައި ވެސް އިދިކޮޅު ކެންޑިޑޭޓުން ރައީސް ޞާލިޙާ ގުޅިވައިގެން އެތަކެއް، އެތަކެއް ދޮގު ވާހަކަތަކެއް ފެތުރި އެވެ. ނަމަވެސް އެކަންކަމާއެކު ވެސް ރައީސް ޞާލިޙުގެ ފަރާތްޕުޅުން ފެނިލެއްވީ ލާމަސީލު ނަމޫނާ އެކެވެ. އެއިން އެއްވެސް ވާހަކައެއްގައި ޖެހިވަޑައިގެން، އެމަނިކުފާނުގެ ފަރާތުން ގޯސް ސިފައެއް ފެނިފައެއް ނުވެ އެވެ. މުޅި ކެމްޕެއިން ނިންމަވާލެއްވީ، އިދިކޮޅު އެއްވެސް ފަރާތަކަށް ބަދު ބަހެއް ވިދާޅުނުވެ އެވެ.
ރިޔާސީ އިންތިޚާބު ނިމި، ސަރުކާރު ބަދަލުވުމުގެ މަރުޙަލާ ކުރިއަށްދާއިރު ވެސް، ރައީސް ޞާލިޙުގެ ފަރާތްޕުޅުން ފެނިފައި ވަނީ ޑިމޮކްރަސީގެ ރިވެތި ނަމޫނާ އެވެ. އިންތިޚާބުގެ ރަސްމީ ނަތީޖާ އާއެކު އިލެކްޝަންސް ކޮމިޝަނުން ވެސް ވިދާޅުވީ އެ ވާހަކަ އެވެ. މީގެ ކުރީ އިންތިޚާބުތަކުގައި، ސަރުކާރުގައި ހުންނަވާ ބޭފުޅާ ބަލިވުމުން، އިލެކްޝަންސް ކޮމިޝަންގެ އިންސާފުވެރިކަމާމެދު ސުވާލު އުފެއްދި ނަމަވެސް، މިފަހަރު އެ މަންޒަރެއް ނުފެނެ އެވެ. އިންތިޚާބުގެ ނަތީޖާ ޤަބޫލު ނުކޮށް، ކޯޓަށް ވަޑައެއް ނުގަންނަވަ އެވެ. ބަދަލުގައި ހުރިހާ ކަމެއްގައި ގެންދަވަނީ އެއްބާރުލުން ދެއްވަމުންނެވެ.
އެކަން އިދިކޮޅު ޕީޕީއެމް/ޕީއެންސީގެ އިސް ލީޑަރުން ވެސް ޤަބޫލުކުރައްވަ އެވެ. އިންތިޤާލީ ކޮމެޓީގައި އިސްކޮށް އުޅުއްވާ، ޑރ.މުޙައްމަދު ޝަހީމް އަލީ ސައީދު ވިދާޅުވެފައިވާ ގޮތުގައި ރައީސް ޞާލިޙުގެ ފަރާތްޕުޅުން ފެނިގެން ދިޔައީ ސުލްހަވެރި، އަޚުލާޤީ ސިޔާސަތެެކެވެ. އެގޮތުން އިންތިޚާބީ ރައީސް ހުވާ ކުރުމުގެ ރަސްމިއްޔާތަށް ރައީސް ޞާލިޙު ހުރަސްއަޅުއްވާނެ ކަމަށް ޤަބޫލު ނުކުރެވޭ ކަމަށް ޝަހީމް ވިދާޅުވި އެވެ. އެއާއެކު ސޯޝަލް މީޑިއާ ގައި ބައެއް އާންމުން ބުނަމުން ގެންދިޔަ އެވެ. ރައީސް ޞާލިޙުގެ ކެތްތެރިކަމާއި، ޙިކުމަތްތެރިކަން ޑރ ޝަހީމަށް އެނގިވަޑައިގެންނެވީ މާލާހުންނެވެ. އެމަނިކުފާނުގެ މުޅި ފަސް އަހަރުން ވެސް ފެންނަން ހުރީ އެކަންތައްތައްކަން ފާހަގަކޮށް އާންމުން ބުނެފައިވާ ގޮތުގައި، ތަންކޮޅެއް ކުރިން ޝަހީމަށް އެކަން އެނގިވަޑައިގެންނެވި ނަމަ، ޝަހީމް ވެސް ހުންނަވާނީ ރައީސް ޞާލިޙު އާއެކު އެވެ.
