ޗެމްޕިއަން އޮފް ޗެމްޕިއަންސް ފެތުމުގެ މުބާރާތް ފަށައިފި
ރާއްޖޭގެ އެންމެ މޮޅެތި 37 ފެތުންތެރިން ބައިވެރިވޭ
ޗެމްޕިއަން އޮފް ޗެމްޕިއަންސް ފެތުމުގެ މުބާރާތުގެ ތެރެއިން
ޗެމްޕިއަން އޮފް ޗެމްޕިއަންސް 2021 ފެތުމުގެ މުބާރާތް ހުކުރު ދުވަހު ފަށައިފިއެވެ.
ސްވިމިން އެސޯސިއޭޝަން އޮފް މޯލްޑިވްސްއިން އިންތިޒާމުކުރާ މި މުބާރާތަކީ މި ސީރީޒްގެ މުބާރާތްތަކުގެ ދަށުން ބާއްވާ ފުރަތަމަ މުބާރާތެވެ.
މި މުބާރާތުން އެއްވަނައަށް ދާ ފެތުންތެރިޔާއަށް "ފެންމުތުގެ" ޝަރަފު އެރުވުމަށް ހަމަޖެހިފައިވާއިރު، މި މުބާރާތަކީ ވޭތުވެދިޔަ އަހަރުތަކުގައި ކޮންމެ އިވެންޓެއްގެވެސް އެންމެ މޮޅެތި ފެތުންތެރިންނަށް ދައުވަތުދީގެން ބާއްވާ ޚާއްސަ މުބާރާތެއް ކަމަށް ސްވިމިން އެސޯސިއޭޝަނުން މައުލޫމާތުދެއެވެ.
ހުކުރު ދުވަހު މި މުބާރާތް ފެށިއިރު، މި މުބާރާތް ކުރިއަށްދަނީ ހުޅުމާލޭ ސްޕޯޓްސް ކޮމްޕްލެކްސްގައެވެ. އެހެންކަމުން މިއީ ހުޅުމާލޭ ސްޕޯޓްސް ކޮމްޕްލެކްސްގައި ބާއްވާ ފެތުމުގެ ފުރަތަމަ މުބާރާތެވެ.
ރާއްޖޭގެ އެންމެ މޮޅެތި 37 ފެތުންތެރިން ބައިވެރިވާ މި މުބާރާތުގައި ޖުމްލަ 75 އިވެންޓް ބޭއްވުމަށް ވަނީ ހަމަޖެހިފައެވެ. ސްވިމިން އެސޯސިއޭޝަނުން މައުލޫމާތުދޭ ގޮތުން މި މުބާރާތް ކުރިއަށްދާނީ މި މަހުގެ 27 ވަނަ ދުވަހުގެ ނިޔަލަށެވެ.
