ފާއިތުވި އަހަރުތަކާ އަޅާ ބަލާއިރު އާބާދީ އިތުރުވަމުންދާ މިންވަރު ކުޑަވެފައިވާކަމަށް ޑެޕިއުޓީ ޗީފް ސްޓެޓިސްޓިޝަން އައިޝަތު ޝަހުދާ ވިދާޅުވެއްޖެއެވެ.

ރާއްޖެއެމްވީން ކުރި ސުވާލަކަށް ޖަވާބުދެއްވަމުން ޝަހުދާ ވިދާޅުވީ އާބާދީ އިތުރުވާ މިންވަރަކީ އަހަރެއްގެ މައްޗަށް މީހުން ވިހާ މިންވަރާއި، ތައުލީމާއި ވަޒީފާގެ އިތުރުން އަދިވެސް މިނޫން ކަންކަމަށް ވަރަށް ބޮޑަށް ބަރޯސާވާ ކަމެއް ކަމަށެވެ. އެކި ގައުމުތަކަށް ބެލިޔަސް މިކަންކަމަށް އާބާދީގެ ނިސްބަތް ބަރޯސާ ވާކަމަށް ޝަހުދާ ވިދާޅުވިއެވެ.

ޝަހުދާ ވިދާޅުވީ ފާއިތުވި އަހަރުތަކާ އަޅާ ބަލާއިރު، މިހާރު އާބާދީ އިތުރުވަމުން އަންނަ މިންވަރު މަޑުޖެހިލާފައިވާކަމަށެވެ. މިއީ ޒަމާން ބަދަލުވަމުން އައި ވަރަކަށް ބަދަލުވަމުންދާނެ ކަމެއް ކަމަށް ޝަހުދާ ވިދާޅުވިއެވެ. މިކަމާ ގުޅިގެން ހަދާފައިވާ ދިރާސާތަކުން ވެސް މިގޮތަށް ދައްކާ ކަމަށް ޝަހުދާ ވިދާޅުވިއެވެ.

ޝަހުދާ އިތުރަށް ވިދާޅުވީ ރާއްޖޭގައި މިވަގުތު އުމުރުން ދުވަސްވީ މީހުންގެ އާބާދީއަކީ އެންމެ 5 އިންސައްތަ ކަމަށެވެ. އެހެންނަމަވެސް ކުރިއަށްއޮތްތަނަށް ކުރާ އަންދާޒާތަކުން ދައްކާގޮތުގައި 2054 ވަނަ އަހަރާ ހިސާބަށް ދާންވާއިރަށް މި އަދަދުތައް 14 އިންސައްތައަށް އިތުރުވާނެ ކަމަށެވެ. ޝަހުދާ ވިދާޅުވީ އެއީ މިއަދުގެ ޒުވާން އާބާދި ކަމަށާއި، މިހާރުން ފެށިގެން ދުޅަހެޔޮ ގޮތެއްގައި އެ ދުވަސްތައް ހޭދަކުރުމަށް ތައްޔާރުވާންޖެހިފައިވާކަމަށް ޝަހުދާ ވިދާޅުވިއެވެ.

15 އަހަރާއި 45 އަހަރާ ދެމެދުގެ އާބާދީގެ ގޮތުގައި މިވަގުތު ރާއްޖޭގައި 45 އިންސައްތަ މީހުން ހިމެނޭ ކަމަށް ޝަހުދާ ވިދާޅުވިއެވެ. މީގެ އިތުރުން މަސައްކަތްތެރިންގެ އާބާދީގެ ގޮތުގައި 70 އިންސައްތަ ހިމެނޭކަން ފާހަގަކުރެވިފައިވާކަމަށާއި، އެއީ ބިދޭސީންނާ ވެސް އެކުގައި ކަމަށް ޝަހުދާ ވިދާޅުވިއެވެ.