ފްލައިން ސްކޫލްގެ ކަންކަން ބޮއްސުންލައިގެން ދިއުމުގައި ސިވިލް އޭވިއޭޝަނުގެ އިހުމާލު އެބައޮތް
ޕަރފޯމަންސް އޮޑިޓުގައި 4 ކަމަކަށް ބަލާފައިވޭ
އޭޝިއަން އެކެޑަމީ އޮފް އެއިރޮނޯޓިކްސް
ފްލައިން ސްކޫލްގެ ކަންކަން ބޮއްސުންލައިގެން ދިއުމުގައި މޯލްޑިވްސް ސިވިލް އޭވިއޭޝަން އޮތޯރިޓީގެ އިހުމާލު އޮތްކަމަށް ދައްކައިފިއެވެ.
މޯލްޑިވްސް ސިވިލް އޭވިއޭޝަން އޮތޯރިޓީން އޭޝިއަން އެކަޑަމީ އޮފް އެރޮނޮޓިކްސް ރެގިއުލޭޓްކުރުމަށް ކޮށްފައިވާ މަސައްކަތްތަކާ ގުޅޭ ޕަރފޯމަންސް އޮޑިޓް ރިޕޯޓުގައި މިފަދައިން ފާހަގަކޮށްފައިވާއިރު، މި އޮޑިޓުގައި މައިގަނޑު 4 ކަމެއް ބަލާފައިވެއެވެ. އޭގެ ތެރޭގައި ހިމެނެނީ:
މި 4 ކަމަށް ބެލުމަށްފަހު އާންމުކޮށްފައިވާ އޮޑިޓް ރިޕޯޓުގައިވާގޮތުން މޯލްޑިވްސް ސިވިލް އޭވިއޭޝަން އޮތޯރިޓީގައި އޭޝިއަން އެކަޑަމީ އޮފް އެރޮނޮޓިކްސްގެ ހިންގުމުގެ ގާބިލުކަން ބަލާނެ އިންތިޒާމުތައް ހަމަޖެހިފައި ވީނަމަވެސް، މި އިންތިޒާމުތަކުގެ ތެރެއިން އަޅާފައިވާ ފިޔަވަޅުތަކުގެ ނަތީޖާ ހާސިލުވަމުން ނުދާކަން ފާހަގަކުރެވިފައިވެއެވެ. އެގޮތުން، ފްލައިން ސްކޫލް ހިންގުމުގައި މިހާރު ދިމާވެފައިވާ މައްސަލަތައް ހައްލުކުރެވިފައި ނުވާކަމާއި، މިހެންދިމާވާ ސަބަބުތަކުގެ ތެރޭގައި ހިންގުމުގެ ގާބިލުކަން ބެލުމުގައި އޮތޯރިޓީން ހަދާފައިވާ އޮޑިޓްތަކުގައި ފާހަގަވި މައްސަލަތައް އިސްލާހުކުރުވުމަށް އެކަށީގެންވާ ފިޔަވަޅު އަޅާފައި ނުވުމާއި އޮޑިޓްކުރުމުގައި ގެންގުޅެފައިވާ އުސޫލުތައް ހަރުދަނާ ނުވުން ހިމެނޭ ކަމަށް އޮޑިޓް އޮފީހުން ބުނެފައިވެއެވެ.
އަދި މިހާރުގެ އޭވިއޭޝަން ދާއިރާގެ ހާލަތަށް އެކަށީގެންވާ ގޮތަށް އޭވިއޭޝަން ގާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނެސްފައި ނުވުމުންނާއި، ރާއްޖޭގައި ފްލައިން ސްކޫލެއް ހިންގާ އިތުރު ފަރާތެއް ނެތްއިރު، ފްލައިން ސްކޫލުގެ ފްލައިޓްތައް ގްރައުންޑްކޮށް، އޮޕަރޭޝަންތައް ސަސްޕެންޑްކޮށްފިނަމަ، ދަރިވަރުންނަށް ލިބިދާނެ ގެއްލުން ފެންނާތީ ފްލައިން ސްކޫލަށް ފިޔަވަޅު އެޅުމަށް އޮތޯރިޓީއަށް ދަތިވެފައި ވުމުގެ ސަބަބުންވެސް މި މައްސަލަތަކަށް ހައްލު ލިބިފައި ނުވާކަން އޮޑިޓް ރިޕޯޓުގައި ފާހަގަކުރެވިފައިވެއެވެ.
މީގެ އިތުރުން، ޝަކުވާ އަދި މައްސަލަ ހުށަހެޅުމުން ދަރިވަރުންނާއި ގުޅޭކަންކަން ބަލަމުން ގޮސްފައިވާކަމާއި، އޭޝިއަން އެކަޑަމީ އޮފް އެރޮނޮޓިކްސްގައި ކިޔަވާ ދަރިވަރުންގެ ހައްގުތަކާއި، ފޯރުކޮށްދޭންޖެހޭ ރައްކާތެރިކަން ފޯރުކޮށްދިނުމަށް މިނިސްޓްރީ އޮފް ހަޔަރ އެޑިޔުކޭޝަނުން ޕްރޯއެކްޓިވްކޮށް ބަލަމުން ގޮސްފައިނުވުމުން، ހަރުދަނާ ނިޒާމެއްގެ ތެރެއިން ދަރިވަރުންގެ ހައްގުތަކާއި، ފޯރުކޮށްދޭންޖެހޭ ރައްކާތެރިކަން އެންމެ މުހިންމު ވަގުތުގައި ފޯރުކޮށްދެވިފައި ނުވާކަން ފާހަގަކޮށްފައިވެއެވެ.
ދަރިވަރުންގެ ހައްގުތަކާއި، ފޯރުކޮށްދޭންޖެހޭ ރައްކާތެރިކަން ފޯރުކޮށްދިނުމުގެ މަސައްކަތް ހަރުދަނާ އުސޫލަކުން ބެލިފައިނުވަނީ ދަރިވަރުންގެ ހައްގުތައް ކަށަވަރުކޮށް، އެ ދަރިވަރުންނަށް ރައްކާތެރިކަން ފޯރުކޮށްދީ، އެކަން މޮނިޓަރ ކުރުމުގެ ޒިންމާ ސީދާ ވަކި އިދާރާއަކާއި ސާފުކޮށް ގާނޫނުން ނުވަތަ ގަވާއިދަކުންވެސް މަތިކޮށްފައި ނުވާތީކަމުގައި ދެކޭ ކަމަށް އޮޑިޓް އޮފީހުން ބުނެފައިވެއެވެ.
އެހެންކަމުން އޮޑިޓުން ފާހަގަކުރެވުނު ކަންކަން އިސްލާހުކުރަން އަމަލުކުރެވިދާނެ ގޮތުގެ 17 ލަފާއެއް ދީފައިވާއިރު، މީގެތެރޭގައި މައިގަނޑުގޮތެއްގައި ހިމެނެނީ އެއަރވޯދިނެސް ރިވިއުގައި ފާހަގަކޮށްފައިވާ ކަންކަން އިސްލާހުކުރާނެގޮތުގެ ޕްލޭން ހުށަނާޅާނަމަ އެކަމަށް އުސޫލެއް ކަނޑައަޅައި އުސޫލާ އެއްގޮތަށް އެފަރާތްތަކާއިމެދު ފިޔަވަޅު އެޅުމަށެވެ. އޭވިއޭޝަން ގަވައިދުތަކާ ތަކުރާރުކޮށް ޚިލާފުވާ ފަރާތްތަކުގެ ކަންކަން އިތުރަށް ބަލައި، އެމީހުންނާމެދު އަލމަލުކުރާނެ ވަކި ސްޓްރެޓެޖީއެއް އެކުލަވާލުން ހިމެނެއެވެ.
އެޕްރޫވްޑް ޓްރެއިނިން އޯގަނައިޒޭޝަންތަކުގައި އެކަށީގެންވާ އަދަދަށް މަތިންދާބޯޓު ހުރިތޯ ބަލާނެ ގޮތުގެ ތަފްސީލު އޮޑިޓް ޕްރޮސީޖަރއެއް ކަނޑައަޅައި، ވަކި އުސޫލެއްގެ ދަށުން ކޮންމެ އަހަރަކުވެސް މިކަމުގެ ލިޔެކިޔުންތައް ބަލަހައްޓަމުން ގެންދިއުން ހިމެނެއެވެ. އަދި އެކށީގެންވާ މަތިންދާބޯޓު ހުރިތޯ ބަލަން އޮޑިޓް ޕްރޮސީޖަރ ކަނޑައަޅާއިރު، އެ އަހަރު އަލަށް ގުޅޭ ދަރިވަރުންގެ އަދަދަށާއި، އެ ދަރިވަރުން ހަދާ ކޯސްތަކަށް ބޭނުންވާ މަތިންދާބޯޓު އޯގަނައިޒޭޝަންގައި ހުރިވަރަށް ރިއާޔަތްކުރެވޭނެ ގޮތަށް އޮޑިޓް ޕްރޮސީޖަރ ކަނޑައެޅުމަށް ވަނީ ލަފާ ދީފައެވެ.
