ދޮގު މައުލޫމާތު ހިމެނޭ ކޮންޓެންޓް އުފައްދާ މީހުންނަށް އިނިގިރޭސިވިލާތުން ހަރުކަށި ފިޔަވަޅުތައް އަޅަނީ

ދޮގު މައުލޫމާތު ހިމެނޭ ކޮންޓެންޓް އުފައްދާ މީހުންނަށް ހަރުކަށި ފިޔަވަޅުތައް އަޅާނެ ކަމަށް އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވިދާޅުވެއްޖެއެވެ.

އެމަނިކުފާނު ވިދާޅުވީ, އިންޓަރނެޓްގެ ސޭފްޓީގެ އައު ގާނޫނާއެކު މި ހަރުކަށި ފިޔަވަޅުތައް އެޅުމަށް ނިންމާފައިވާއިރު ދޮގު މައުލޫމާތު ހިމެނޭ ކޮންޓެންޓް އުފައްދާ މީހުންނަށް ހަރުކަށި ފިޔަވަޅުތަކެއް އަޅާނެ ކަމަށެވެ.

މީގެއިތުރު އޮންލައިން ހާރމްސް ބިލް, ކްރިސްމަސްގެ ކުރިން އެ ގައުމުގެ ގާނޫނު ހަދާ މަޖިލީހަށް ފޮނުއްވާނެ ކަމަށް ވެސް ވަނީ ވިދާޅުވެފައެވެ. ބޮރިސް އިތުރަށް ވިދާޅުވީ, ގާނޫނު ހަދާ މަޖިލީހުގެ މެމްބަރުންނާއި ހުރިހާ ޕަބްލިކް ސަރވަންޓުންގެ ސަލާމަތާއި ރައްކާތެރިކަމަކީ ވަރަށް މުހިންމު ކަމެއް ކަމަށެވެ. އަދި އޮންލައިން ސޭފްޓީ ބިލަކީ މިކަމަށް ބާރު ދޭ މުހިންމު ބިލަކަށްވެގެންދާނެ ކަމަށެވެ.

އިނގިރޭސިވިލާތުގެ ސަރުކާރުން ސޯޝަލް މީޑިއާގެ ހުރިހާ ފްލެޓްފޯމެއްގައި ނުރަނގަޅު މެސެޖްދޭ ކޮންޓެންޓް އަޕްލޯޑްކުރާ ފަރާތްތަކާ މެދު ފިޔަވަޅު އަޅަން ނިންމިކަން ހާމަކޮށްފައިވަނީ މިދިޔަ އަހަރުއެވެ. އެގޮތުން އޮންލައިން ޕްލެޓްފޯމްތައް ބޭނުންކުރާ މީހުންގެ ހިމާޔަތުގައި އަޅާފައިވާ މިފިޔަވަޅުގެ ބޭނުމަކީ, ހަމަނުޖެހުން އިތުރުވުމާއި، ސައިބަރ ބުލީކުރުމާއި، ކުޑަކުދިންނަށް ކުރާ ގޯނާފަދަ އަމަލުތައް ހުއްޓުވުމެވެ. އަދި މިއީ މުސްތަގުބަލަށް އެޅުނު މުހިންމު ފިޔަވަޅެއްގެ ގޮތުގައި އެގައުމުގެ ސަރުކާރުން ސިފަކުރެއެވެ.

އަލްޖަޒީރާގައި ރިޕޯޓުކޮށްފައިވާ ގޮތުގައި މިއުސޫލުގެ ދަށުން, މިފަދަ ވީޑިއޯތަކާއި ކޮންޓެންޓްތައް ސޯޝަލް މީޑިއާއިން ނެގުމުގެ ޒިންމާ އަދާކުރަންޖެހޭނީ ޓެކްނޮލޮޖީ ފަރމްތަކުންނެވެ.

މިކުންފުނިތަކުން މިމަސައްކަތް ނުކޮށްފިނަމަ ކުންފުނީގެ ވެރިންނާމެދު ގާނޫނީ ފިޔަވަޅު އަޅައި, ޖޫރިމަނާކުރުމުގެ އިތުރުން ޖަލަށް ހުކުމް ކުރުމުގެ ބާރު ސަރުކާރަށް ލިބިދެއެވެ.