ހިޖުރަކުރާ ދޫނިތަކުގެ ގުދުރަތީ ދިރިއުޅުން ގެއްލޭފަދަ އެއްވެސް ކަމެއް ނުކުރުމަށް ކޮމިޓީން އިލްތިމާސްކޮށްފި
ޤާނޫނާއި ޤަވާއިދުގެ ދަށުން އަޅަންޖެހޭ ފިޔަވަޅު އެޅުމަށް ކޮމިޓީން ގޮވާލި
ގުޑުގުޑާ ދޫނިތައް ހދ. ކުޅުދުއްފުށީ ކުޅީގައި
ހިޖުރަ ކުރާ ދޫނިތަކުގެ ގުދުރަތީ ދިރިއުޅުން ގެއްލޭފަދަ އެއްވެސް ކަމެއް ނުކުރުމަށް އެންވަޔަރަމެންޓް އެންޑް ކްލައިމެޓްޗޭންޖް ކޮމިޓީން އިލްތިމާސްކޮށްފިއެވެ.
އެ ކޮމިޓީން ބުދަ ދުވަހު ނެރުނު ބަޔާނެއްގައި ބުނީ, މި ދުވަސްވަރަކީ ހިޖުރަކުރާ ދޫނި ގިނަ އަދަދަކަށް ދިވެހިރާއްޖެއަށް އަންނަމުންދާ ދުވަސްވަރަކަށް ވެފައި، އެ ތަކެއްޗަށް ގޯނާކޮށް، ގެންލުންދީ އަދި އެތަކެތި ހިފައި ވިއްކާކަން ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކްލައިމެޓްޗޭންޖް ކޮމިޓީގެ ސަމާލުކަމަށް އައިސްފައިވާ ކަމަށެވެ. އަދި އެކި މޫސުންތަކުގައި ރާއްޖެއަށް ހިޖުރަކުރާ ދޫނީގެ ބާވަތްތަކަކީ ރާއްޖޭގެ ޤުދުރަތީ މާޙައުލަށް ވަރަށް މުހިންމު ތަކެތިކަމަށްވުމާއެކު، އެތަކެތީގެ އާބާދީއަށް ގެއްލުން ލިބިދާނެފަދަ އެންމެހައި ކަންކަމަކީ، ޤާނޫނު ނަންބަރު 4/93 (ދިވެހިރާއްޖޭގެތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނު)ގެ ދަށުން ހަދާފައިވާ ގަވާއިދު ނަންބަރު 25/2011-R (ޤުދުރަތީ ގޮތުގައިނުވަތަ ޠަބީޢީ ގޮތުގައި ޙިމާޔަތްކޮށް ރައްކައުތެރިކުރާ ދިރޭ ތަކެއްޗާބެހޭ ގަވާއިދު)ގެ ދަށުން މަނާކުރެވި, އެފަދަ ކަންކަން ކުރާފަރާތްތަކަށް އަދަބު ކަނޑައެޅިފައިވާ ކަންކަން ކަމަށް ވެސް އެ ކޮމިޓީން ބުނެފައިވެއެވެ.
މިކަން މިހެން އޮތް ނަމަވެސް، އެކި މޫސުންތަކުގައި ދިވެހިރާއްޖެއަށް ހިޖުރަކުރާ މިފަދަ ދޫނިތައް ހިފައިމ އެތަކެއްޗަށް ގޯނާކޮށް އެތަކެތީގެ ހިޖުރައިގެ ރާސްތާއަށް ހުރަސްއެޅޭ ބާވަތުގެ ކަންކަން ހުއްޓުމެއްނެތި ކުރަމުންދާ ދިއުމަކީ އެކަމާމެދު ކޮމިޓީން ނުހަނު ކަންބޮޑުވާ ކަމެއް ކަމަށާއި, މިފަދަ ޢަމަލުތައް ހިންގާ ފަރާތްތަކުން މިހާރުން މިހާރަށް އެކަންކަން ހުއްޓާލުމަށާއި، ހިޖުރަ ކުރާ ދޫނިތަކުގެ ޤުދުރަތީ ދިރިއުޅުން ގެއްލޭފަދަ އެއްވެސްކަމެއް ނުކުރުމަށް ވެސް ކޮމެޓީން ވަނީ ގޮވާލާފައެވެ.
ހަމަ މިއާއެކު، ދިވެހިރާއްޖެއަށް ހިޖުރަކުރާ ދޫނިތަކަށް ކުރާ މިފަދަ ގޯނާތައް ހުއްޓުވުމަށާއި، ދޫނިތަކަށް ދޭންޖެހޭ ޙިމާޔަތްދިނުމުގައި ކަމާގުޅޭ އެންމެހައި މުއައްސަސާތަކުންނާއި، ޚާއްޞަކޮށް މިކަމުގައި ލޯކަލް ކައުންސިލްތަކުން އަދާކުރަންޖެހޭ ފުރިހަމަ ޒިންމާ އަދާކޮށް، އެފަދަ ޢަމަލުތައް ހުއްޓުވައި، އެފަދަ ޢަމަލުތައް ހިންގާ ފަރާތްތަކާމެދު، ކަމާގުޅޭގޮތުން ހަދާފައިވާ ޤާނޫނާއި ޤަވާއިދުގެ ދަށުން އަޅަންޖެހޭ ޤާނޫނީ ފިޔަވަޅު އެޅުމަށް އެންވަޔަރަމެންޓް އެންޑް ކްލައިމެޓްޗޭންޖް ކޮމިޓީން ވަނީ ގޮވާލާފައެވެ.
