ތަރައްގީ ގެނެވޭނީ ރާއްޖެއަށް ލިބިފައިވާ ގުދުރަތީ ވަސީލަތްތަކުގެ ބޭނުން ހެޔޮ ގޮތުގައި ހިފައިގެން: ނަޝީދު
10 ފެބުރުއަރީ 2019 | އާދީއްތަ 12:15ބޭނުންވާ ތަރައްގީ ގެނައުމުން އޭގެ ސަބަބުން އަންނަން އޮތް ޖީލަށް އޭގެ ފައިދާ ކުރާނެ
ބިކޯކާ އަށް 10 އަހަރު ފުރުމުގެ ރަސްމިއްޔާތުގައި ރައީސް ނަޝީދު ވާހަކަފުޅު ދައްކަވަނީ
ދިވެހިރާއްޖެ އަށް ބޭނުންވާ ތަރައްގީ ގެނެވޭނީ ލިބިފައިވާ ގުދުރަތީ ވަސީލަތްތަކުގެ ބޭނުން ހެޔޮ ގޮތުގައި ހިފައިގެން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ފ. މަގޫދޫގައި ހުންނަ މިލާން - ބިކޯކާ ޔުނިވާސިޓީ އަށް 10 އަހަރު ފުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ނަޝީދު ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ތަރައްގީގެ ޕްލޭން އެކުލަވާލާފައި ވަނީ ރައްޔިތުންނަށް އެންމެ އެކަށީގެންވާ ތަރައްގީ ގެނައުމަށް ކަމަށެވެ. އެގޮތުން ތަރައްގީ ގެނެވޭނީ ރާއްޖެ އަށް ލިބިފައިވާ ގުދުރަތީ ވަސީލަތްތަކުގެ ބޭނުން ހެޔޮގޮތުގައި ބޭނުންކޮށްގެން ކަމަށް ވިދާޅުވިއެވެ.
''ހައްލަކީ ގުދުރަތާ އެކުގައި މަސައްކަތް ކޮށްގެން، ގުދުރަތުގެ ރޭވުމުގެ ފިތުރަތުގެ އުސޫލުތަކުގެ ތެރެއިން ތަރައްގީ ހޯދުން. އަޅުގަނޑުމެން މިކުރާ މަސައްކަތަކީ އެ ތަރައްގީ ހޯދުމުގެ މަސައްކަތް،'' ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ ބޭނުންވާ ތަރައްގީ ގެނައުމުން އޭގެ ސަބަބުން އަންނަން އޮތް ޖީލަށް އޭގެ ފައިދާ ކުރާނެ ކަމަށާއި، މި ތަރައްގީއަކީ ކާބަފައިން އަޅުގަނޑުމެންނާ ހަމަޔަށް ގެނެސްދީފައިވާ ތަރައްގީ ކަމަށެވެ. އެހެން ކަމުން އެންމެ މުހިއްމު ކަމަކީ ތަރައްގީގެ މަޝްރޫއުތަށް ކުރިޔަށް ގެންދާއިރު އެކަމަށް ސަމާލުކަން ދިނުން ކަމަށް ރައީސް ނަޝީދު ވިދާޅުވިއެވެ.
