އައިޖީއެމްއެޗްގެ ސީނިއަރ ޑޮކްޓަރުންތަކެއްގެ ބައިވެރިވުމާއެކު، ކޮރަޕްޝަންގެ ކަންތައްތަކެއް ހިންގިކަމަށް ޔައުގޫބް ވިދާޅުވެއްޖެ
އައިޖީއެމްއެޗްގެ ސީނިއަރ ޑޮކްޓަރުންތަކަކަށް ކޮންމެ މަހަކު އެތައް ގުނައަކުން މުސާރަދެމުން ދިޔަކަމަށް ޔައުގޫބް ވިދާޅުވި
ދާންދޫ ދާއިރާގެ މެމްބަރ ޔައުގޫބް އަބްދުﷲ
އައިޖީއެމްއެޗްގެ ސީނިއަރ ޑޮކްޓަރުންތަކަކަށް, މެޑިކަލް އިކުއިޕްމަންޓްތަކެއް ވިއްކި ކުންފުންޏަކުން ކޮންމެ މަހަކު ވަކި ވަރަކަށް ފައިސާދީގެން އައިޖީއެމްއެޗަށް ބޭނުންވާ އެއްޗެހި އެކުންފުނިން ނޫނީ ނުގަނެވޭގޮތަށް ކަންތައްތަކެއްކޮށްފައިވާ ކަމަށް ދާންދޫ ދާއިރާގެ މެމްބަރ ޔައުގޫބް އަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި އޮޑިޓް އޮފީހުގެ ބަޖެޓާ ގުޅޭގޮތުން ވާހަކަދައްކަވަމުން ޔައުގޫބް ވިދާޅުވީ 2009 ވަނަ އަހަރުގެ ތެރޭގައި ހިނގާދިޔަ އެކަން ޔައުގޫބާ ހިއްސާކުރީ ރައްޓެއްސެއްކަމަށެވެ. އެއީ ކުންފުންޏެއް އޮޑިޓްކުރަމުންދިޔައިރު ފާހަގަވި ކަމެއްކަމަށް ޔައުގޫބް ވިދާޅުވިއެވެ. އެގޮތުން އައިޖީއެމްއެޗްގެ ސީނިއަރ ޑޮކްޓަރުންތަކަކަށް ކޮންމެ މަހަކު އެތައް ގުނައަކުން މުސާރަ ދެމުންދިޔަކަމަށް ޔައުގޫބް ވިދާޅުވިއެވެ.
މީގެއިތުރުން ފަރމަސޫޓިކަލް ކަންކަމުގެ ވިޔަފާރީގައި އުޅޭ ރައްޓެއްސެއް ކިޔައިދިން ގޮތުގައި, އައިޖީއެމްއެޗް ކައިރީގައި އެސަރަހައްދުގައި އަދި އިތުރު ބާރަ ވަަރަކަށް ބޭސް ފިހާރަ ހުޅުވިއަސް ފައިދާވާނެކަމަށް ވިދާޅުވިކަމަށް ޔައުގޫބް ވިދާޅުވިއެވެ. އެއީ އެތަންތަނުން ބޭނުންވާވަރަށް މުވައްޒަފުން ނަގައި ބޮޑު ކުއްޔެއް ދިންނަމަވެސް ކަމަށް ޔައުގޫބް ވިދާޅުވިއެވެ.
އެއީ ދެތިން ލާރިއަށް ނުވަތަ ދިހަ ލާރިއަށް ލިބޭ ބޭސްގުޅަ އެތައް ގުނައެއް ބޮޑުކޮށް ފަސް ސަތޭކަ ހަސަތޭކަ ޕަސެންޓްގެ ފައިދާއެއް ލައިގެން ވިއްކަމުންދާތީ ކަމަށް ޔައުގޫބް ވިދާޅުވިއެވެ.
ޔައުގޫބް ވިދާޅުވީ އޮޑިޓަރ ޖެނެރަލް އޮޑިޓްކުރާ މިންގަނޑު ނުވަތަ އޮޑިޓްކުރުމުގައި ގެންގުޅޭ ވިސްނުން ބަދަލުކުރަންޖެހޭކަމަށެވެ.
