ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާނުގެ ހިއްސާއާއެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ދާދި ފަހުން ގަތް ނިއުކާސަލް ޔުނައިޓެޑުގެ ކޯޗުގެ މަގާމުން ސްޓީވް ބްރޫސް ވަކިވެއްޖެއެވެ.

އިނގިރޭސި ޕްރިމިއާ ލީގުގައި މިދިޔަ އާދީއްތަ ދުވަހުގެރޭ ޓޮޓެންހަމް ހޮޓްސްޕާއާ ދެކޮޅަށް ކުޅުނު މެޗަކީ ކޯޗެއްގެ ގޮތުގައި ބްރޫސް 1،000 ވަނަ މެޗެވެ. އެކަމަކު ނިއުކާސަލުގެ އައު ވެރިންގެ ކުރިމަތީގައި ކުޅުނު އެ މެޗުން އެ ޓީމު ވަނީ 3-2 ގެ ނަތީޖާއަކުން ބަލިވެފައެވެ. އެ މެޗަށްފަހު ބްރޫސް ވަނީ އަޑިގަނޑުތަކާއި އުސްގަނޑުތަކުގައިވެސް އައު ވެރިންގެ ފަރާތުން އެއްބާރުލުން ލިބޭނެ ކަމަށް އުއްމީދުކުރާ ކަމަށް ބުނެފައެވެ.

އެކަމަކު ބުދަ ދުވަހުގެ ވަގުތެއްގައި ނިއުކާސަލުގެ ކޯޗުގެ މަގާމުން ބްރޫސް އިސްތިއުފާދިންއިރު، މަގާމުން ވަކިވުމަށްފަހު ދިން އިންޓަވިއުއެއްގައި ބްރޫސް ބުނީ ނިއުކާސަލުގައި ހޭދަކުރި މުއްދަތުގައި އޭނާއަށް ތަފާތު ތަޖުރިބާއެއް ކުރެވުނު ކަމަށާއި، އެގޮތުން މި މުއްދަތުގައި އެ ޓީމުގެ މެނޭޖުމަންޓާއި ކުޅުންތެރިން ދިން އެއްބާރުލުމަށް ޝުކުރުއަދާކުރާ ކަމަށެވެ.

ކޯޗުގެ މަގާމުން ބްރޫސް އިސްތިއުފާދިނުމާ ގުޅިގެން ނިއުކާސަލުން ވަނީ ވަރަށް އަވަހަށް އައު ކޯޗެއް އިއުލާންކުރާނެ ކަމަށް ބުނެފައެވެ. ރިޕޯޓުތައް ބުނާ ގޮތުން ނިއުކާސަލުން ގެންނަން ބޭނުންވަނީ ކުރިން ޗެލްސީއަށް ކުޅެ އަދި އެ ޓީމުގެ ކޯޗުގެ މަގާމު އަދާކުރި ފްރޭންކް ލަމްޕާޑް ނުވަތަ ލިވަޕޫލުގެ ކުރީގެ ތަރި އަދި މިހާރު ރޭންޖާސްގެ ކޯޗު ސްޓީވެން ޖެރާޑެވެ.

ސައުދީ އަރަބިއްޔާގެ ވަލީއަހުދުގެ ހިއްސާއާއެކު ޕީއައިއެފްއިން ނިއުކާސަލް ގަނެފައިވާއިރު، އެ ޓީމު ގަންނަން ޕީއައިއެފްއިން ވަނީ ޖުމްލަ 408 މިލިޔަން ޑޮލަރު ހޭދަކޮށްފައެވެ. ޕީއައިއެފްގެ މިލްކިއްޔާތުގައި 434 ބިލިޔަން ޑޮލަރު ހުރިއިރު، މިއީ ފުޓްބޯޅަ ކްލަބެއް ހިންގާ ބައެއްގެ އެންމެ ބޮޑު މިލްކިއްޔާތެވެ.

މި މަހުގެ ތެރޭގައި ނިއުކާސަލް ގަތްއިރު، ޕީއައިއެފްއިން މިދިޔަ އަހަރުވެސް ވަނީ ނިއުކާސަލް ގަންނަން މަސައްކަތް ކޮށްފައެވެ. އެގޮތުން އެ ފަހަރު ހުރިހާ ލިޔެކިއުންތަކެއް ހުށަހަޅައި މަސައްކަތްތައް ކުރިއަށްގެންދިޔަ ނަމަވެސް، ތަފާތު ގިނަ ޕްރެޝަރުތަކަކާ ހެދި ޕްރިމިއާ ލީގުން އެ ފަހަރު ނިއުކާސަލުގެ އައު ބޯޑު ރަޖިސްޓްރީ ކޮށްދީފައެއް ނުވެއެވެ.