ތިމާވެއްޓަށް ގެއްލުންދޭ އެއްޗެހީގެ ތެރެއިން, ރައީސުލްޖުމްހޫރިއްޔާ ކަނޑައަޅުއްވާ ސިންގަލް-ޔޫސް ޕްލާސްޓިކްގެ ބާވަތްތައް، ރާއްޖެއަށް އެތެރެކުރުމާއި، އެތަކެތި ރާއްޖޭގައި އުފެއްދުމާއި ބާޒާރަށް ނެރުން މަނާކުރުމަށް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނަށް ގެނައި އިސްލާހުގެ ބިލް ރައްޔިތުންގެ މަޖިލީހުން ފާސްކޮށްފިއެވެ.

ސަރުކާރުގެ ފަރާތުން މިބިލް ހުށަހެޅުއްވީ ހޯރަފުށީ ދާއިރާގެ މެމްބަރ އަޙުމަދު ސަލީމެވެ. މިބިލް ދިރާސާކޮށްފައިވަނީ އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީންނެވެ. ކޮމިޓީ ރިޕޯޓް ފާސްކޮށްފައިވަނީ ބުދަ ދުވަހުގެ ޖަލްސާގައި އެކަމަށްޓަކައި ނެގުނު ވޯޓުގައި ބައިވެރިވެވަޑައިގެންނެވި 49 މެމްބަރުންގެ އިއްތިފާގުންނެވެ.

މަޖިލީހުން ފާސްކޮށްފައިވާ ކޮމިޓީ ރިޕޯޓްގައިވާގޮތުން, ރައީސުލްޖުމްހޫރިއްޔާ ކަނޑައަޅުއްވާ ސިންގަލް ޔޫސް ޕްލާސްޓިކްގެ ބާވަތްތަކުގެ ލިސްޓު އެކި މަރުހަލާތަކަށް ބަހާލައިގެން ކަނޑައެޅުމުގެ އިޚުތިޔާރު ރައީސުލްޖުމްހޫރިއްޔާއަށް ލިބިވަޑައިގެންވެއެވެ. މިގޮތުން ރައީސުލްޖުމްހޫރިއްޔާ ކަނޑައަޅުއްވާ ފުރަތަމަ ލިސްޓު 2022 ވަނަ އަހަރުގެ ޖެނުއަރީ މަހުގެ 1ގެ ކުރިން ކަނޑައަޅުއްވައި, ސަރުކާރުގެ ގެޒެޓްގައި ޝާއިއުކުރަންވާނެކަމަށް ވަނީ ބިލްގައި ބަޔާންކޮށްފައެވެ. އަދި މިލިސްޓް އާންމުކުރާއިރު, މިބާވަތްތައް ރާއްޖެއަށް އެތެރެކުރުމާއި އުފެއްދުމާއި ބާޒާރަށް ނެރުން މަނާވާނެ ތާރީޚެއް ކަނޑައަޅާފައި އޮންނަންވާނެކަމަށް މި ފާސްކުރި ބިލުގައިވެއެވެ.

ރައީސުލްޖުމްހޫރިއްޔާ ކަނޑައަޅުއްވާ ސިންގަލް ޔޫސް ޕްލާސްޓިކްގެ ބާވަތްތަކުގެ ލިސްޓް ކަޑައެޅުމުގައި އެފަދަ ތަކެތި ރާއްޖޭގައި އެހާތަނަށް އުފައްދައި ބޭނުންނުކޮށް ހުރި މިންވަރާއި އެފަދަ ތަކެތި ރާއްޖޭގައި ބޭނުންކުރަމުންދާ ނިސްބަތަށް ބަލަންވާނެކަމަށް ވަނީ ބަޔާންކޮށްފައެވެ.

މީގެއިތުރުން ބިލް ފާސްކޮށްފައިވާ ގޮތުން, ބިލްގައި ސިންގަލް ޔޫސް ޕްލާސްޓިކް ކަމަށް ބުނެފައި އެވަނީ އެއެއްޗެއް އެކުގައި ނުވަތަ އޭގެ ބައެއް ޕްލާސްޓިކުން ހަދާފައިވާ އެއްޗެހީގެ ތެރެއިން, އެ އެއްޗެއް އުފައްދާފައިވަނީ ނުވަތަ ވިއްކުމަށް ބާޒާރަށް ނެރެފައިވަނީ އެއް ފަހަރަށްވުރެ ގިނަ ފަހަރު އޭގެ ބޭނުންކުރެވޭގޮތަށް ކަމުގައި ނުވާ, ނުވަތަ އޭގައި ހިމެނޭ އެއްޗެއްގެ ބޭނުން އެއް ފަހަރަށްވުރެ ގިނަ ފަހަރު ކުރެވޭގޮތަށް އުފައްދާފައިވާ ނުވަތަ ވިއްކުމަށް ބާޒާރަށް ނެރެފައިވާ އެއްޗެހި ފިޔަވައި އެނޫން ކޮންމެ އެއްޗަކާއި, އެފަދަ އެއްޗެއް އުފެއްދުމަށް ބޭނުންކުރާ ރޯ މެޓީރިއަލްއެވެ.

ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނަށް ގެނައި އިސްލާހާއެކު, ސިންގަލް ޔޫސް ޕްލާސްޓިކް ރާއްޖެއަށް އެތެރެކޮށް ބޭނުން ކުރުން މުޅިން މަނާވެގެންދާނެ ކަމަށް ބިލްގެ ކޮމިޓީ ރިޕޯޓް ތަޅުމަށް ހުށަހަޅުއްވަމުން އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީގެ މުގައްރިރު އަދި ހޯރަފުށީ ދާއިރާގެ މެމްބަރު އަޙުމަދު ސަލީމް ވަނީ ވިދާޅުވެފައެވެ.

2025ވަނަ އަހަރު ސިންގަލް ޔޫސް ޕްލާސްޓިކް އެތެރެކުރުން މަނާ ކުރުމަށް 2019ވަނަ އަހަރު މަޖިލީހުން ވަނީ ގަރާރެއް ފާސްކޮށްފައެވެ. އަދި ހަމައެއާއެކު އެންވަޔަރަންމަންޓް މިނިސްޓްރީން ސްޓްރެޓެޖިކް އެކްޝަން ޕްލޭނެއްވެސް ލަނޑުދަނޑި ހާސިލް ކުރުމަށް ކަނޑައަޅާފައިވެއެވެ.

މިދިޔަ އަހަރު ފާސްކުރި އިމްޕޯޓް އެކްސްޕޯޓްގެ ގާނޫނަށް އިސްލާހު ގެނައުމުގެ ގާނޫނާއެކު މިއަހަރުގެ ޖޫން މަހުން ފެށިގެން ރާއްޖެ އެތެރެކުރުން މަނާ ސިންގަލް ޔޫސް ޕްލާސްޓިކްގެ ބާވަތްތަކުގެ ލިސްޓް ރައީސުލްޖުމްހޫރިއްޔާ ވަނީ މިދިޔަ އަހަރު ހާމަކުރައްވާފައެވެ. އޭގެތެރޭގައި 9 ބާވަތެއް ހިމެނެއެވެ.

މީގެ އިތުރުން އަންނަ އަހަރުގެ ޑިސެމްބަރު މަހުން ފެށިގެން 50 މައިކްރޯން އަށްވުރެ ތުނި ޕްލާސްޓިކް ކޮތަޅާއި 50 މިލިލީޓަރުން ފެށިގެން 200 މިލިލީޓަރާ ހަމައަށް ހިމެނޭ ކުދި ޝޭމްޕޫ އަދި ސައިބޯނި ފުޅި އެތެރެކުރުން ވަނީ މަނާކޮށްފައެވެ.

އަދި 2023 ވަނަ އަހަރުގެ ޑިސެމްބަރު މަހުން ފެށިގެން, 1 ލީޓަރާއި, 1 ލީޓަރަށްވުރެ ކުދި ޕީއީޓީ ފުޅީގައި ބަންދުކޮށްފައި ހުންނަ ފެން ރާއްޖެ އެތެރެކުރުން މަނާ ވާނެއެވެ.