ސިޓީން ސްޓާލިން ވިއްކާނީ 80 މިލިޔަން ޔޫރޯއަށް
19 އޮކްޓޯބަރު 2021 | އަންގާރަ 15:18ސްޓާލިން ގަންނަން ބާސާއިން ބޭނުންވަނީ ކުޑަ އަގެއްގައި
ސިޓީއަށް ކުޅެމުން އަންނަ އިންގްލެންޑުގެ ފޯވާޑް ރަހީމް ސްޓާލިން
މެންޗެސްޓާ ސިޓީއަށް ކުޅެމުން އަންނަ އިންގްލެންޑުގެ ފޯވާޑް ރަހީމް ސްޓާލިން ވިއްކާނީ 80 މިލިޔަން ޔޫރޯއަށް ކަމަށް ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުން ސްޕެއިންގެ ގަދަ ބާރު ބާސެލޯނާއިން އަންނަނީ ސްޓާލިންގެ ސޮއި ހޯދުމަށް މަސައްކަތް ކުރަމުންނެވެ. އެގޮތުން ކުރިއަށް އޮތް ޖެނުއަރީ ޓްރާންސްފާ ބާޒާރުގައި މަޝްހޫރު ކުޅުންތެރިއެއްގެ ސޮއި ހޯދަން ބާސާއިން ބޭނުންވާތީ، އެ ކުލަބުން ސްޓާލިން ހޯދުމަށް ބިޑް ހުށަހަޅަން ތައްޔާރަށް އޮތް ކަމަށް ރިޕޯޓްތައް ބުނެއެވެ.
މި ސީޒަން ފެށުނު ފަހުން ސިޓީގެ ފުރަތަމަ އެގާރައިން ޖާގަ ހޯދަން ސްޓާލިންއަށް އުނދަގޫވެފައިވީ ނަމަވެސް، މީގެ ކުރިން ސިޓީގެ ކޯޗު ޕެޕް ގާޑިއޯލާ ވަނީ ސްޓާލިންއަކީ އެ ޓީމަށް މުހިންމު ކުޅުންތެރިއެއް ކަމަށް ބުނެފައެވެ. އަދި ސްޓާލިންގް ވިއްކުމުގެ އެއްވެސް ވިސްނުމެއް ސިޓީގައި ނެތް ކަމަށްވެސް ވަނީ ބުނެފައެވެ.
އެކަމަކު ރިޕޯޓުތައް ބުނާ ގޮތުން ސިޓީން ބާސާއަށް ސްޓާލިން ވިއްކާނީ 80 މިލިޔަން ޔޫރޯއަށެވެ. އެކަމަކު ބާސާއަށް ދިމާވެފައިވާ މާލީ ހާލަތުގެ ސަބަބުން ސްޓާލިންގެ ސޮއި ހޯދަން އެ ކުލަބުން ބޭނުންވަނީ ކުޑަ އަގެއްގައި ކަމަށްވެސް ރިޕޯޓުތައް ބުނެއެވެ.
ސިޓީއާއެކު ސްޓާލިން ހަދާފައިވާ އެއްބަސްވުން 2023 ވަނަ އަހަރުގެ ހޫނު މޫސުމުގައި ހަމަވާއިރު، މިހާތަނަށް އެއްބަސްވުން އާކުރަން ސިޓީން މަސައްކަތް ކޮށްފައިނުވާ ކަމަށް ރިޕޯޓުތައް ބުނެއެވެ. އެހެން ކަމުން މި އަހަރުގެ ހޫނު މޫސުމުގައި ސްޓާލިން ވިއްކާލަން ސިޓީއަށް މަޖުބޫރުވާއިރު، ސްޓާލިންއަށް ރަނގަޅު ހުށަހެޅުމެއް ލިބިއްޖެނަމަ، އޭނާ ވިއްކާލަން ސިޓީ އޮތީ ތައްޔާރަށް ކަމަށްވެސް ރިޕޯޓުތައް ބުނެއެވެ.
ލިވަޕޫލް ދޫކޮށް 2015 ވަނަ އަހަރު ސިޓީއަށް ބަދަލުވި ސްޓާލިން އެ ޓީމުގައި މިހާތަނަށް މޮޅު ކުޅުމެއް ދައްކާފައިވާއިރު، އޭނާ ވަނީ ސިޓީއަށް ކުޅެދިން 203 މެޗުގައި 79 ލަނޑު ޖަހާފައެވެ.
