މަސްތުވާތަކެއްޗާއެކު ހައްޔަރުކުރާ މީހުން ފަސޭހައިން ދޫވާތީ މަޖިލީހަށް ކުއްލި މައްސަލައެއް
މަސްތުވާތަކެއްޗާއެކު ހައްޔަރުކުރާ މީހުން ކޯޓުތަކުން ދޫވާ ކަމަށް ވިދާޅުވި
ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް
ރާއްޖޭގައި މަސްތުވާތަކެއްޗާއެކު ހައްޔަރުކުރާ މީހުން ފަސޭހައިން ދޫވާ މައްސަލައިގައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވައިފިއެވެ.
އަންގާރަ ދުވަހުގެ ޖަލްސާގައި މަޖިލީހަށް މި ކުއްލި މައްސަލަ ހުށަހެޅުއްވީ މަޑުއްވަރީ ދާއިރާގެ މެމްބަރު އާދަމް ޝަރީފެވެ.
މި މައްސަލަ ހުށަހަޅުއްވަމުން އާދަމް ޝަރީފް ވިދާޅުވީ، ރާއްޖޭގައި މަސްތުވާތަކެއްޗާއެކު ހައްޔަރުކުރާ މީހުން ކޯޓުތަކުން ދޫވާ ކަމަށާއި، އެމީހުން ރާއްޖެއިން ބޭރަށް ފުރައިގެންދާއިރު ވެސް އެކަށީގެންވާ ފިޔަވަޅެއް ނާޅާ ކަމަށެވެ. އަދި ބޭރުގެ ނެޓްވޯރކްތަކާ ގުޅިގެން އެމީހުން ރާއްޖެއަށް މަސްތުވާތަކެތި އެތެރެކޮށް އެ ވިޔަފާރި ފުޅާކުރާކަން ވެސް މައްސަލަ ހުށަހަޅުއްވަމުން އާދަމް ޝަރީފް ފާހަގަ ކުރެއްވިއެވެ.
މެމްބަރު ވިދާޅުވީ، މަސްތުވާތަކެތީގެ މައްސަލަ ރާއްޖޭގައި އިތުރުވެ، މަގުތަކުގައި ހިނގާބިނގާވެ އުޅުމަށް އުނދަގޫވާ މިންވަރަށް ޑްރަގްގެ ބިރުވެރިކަން އިތުރުވެފައިވާ ކަމަށެވެ. އަދި މިއީ "ސްޓޭޓް ސްޕޮންސަރޑް" ވިޔަފާރިއެއްގެ ގޮތުގައި ސިފަ ކުރެއްވޭކަމަށް މެމްބަރު ވަނީ ވިދާޅުވެފައެވެ.
މި މައްސަލަ ބަލައިގަނެ ބަހުސް ކުރުމާމެދު ގޮތެއް ނިންމުމަށް ނެގުނު ވޯޓަށް ބަލާއިރު، މައްސަލަ ބަލައިގަތުމަށް ފެންނަކަމަށް 23 މެމްބަރަކު ވޯޓު ދެއްވާފައިވެއެވެ. އަދި ހާޒިރުވެވަޑައިގެން ތިއްބެވި 32 މެމްބަރުންގެ ތެރެއިން 27 މެމްބަރަކު ވޯޓުގައި ބައިވެރިވެވަޑައިގެންފައިވެއެވެ.
މެމްބަރު އާދަމް ޝަރީފް އެހެން ވިދާޅުވެފައިވާއިރު، ދާދި ފަހުން 100ށް ވުރެ ގިނަ ކިލޯގެ މަސްތުވާތަކެތި ހޯދި މައްސަލައިގައި އިސްކޮށް ހިމެނޭ 2 މީހަކު ވަނީ ކޯޓުން ދޫކޮށްލާފައެވެ. އެ މައްސަލައިގައި ދެން ތިބި 8 މީހުންނަށް ވަނީ ބަންދުގެ މުއްދަތު ޖަހާފައެވެ. އޭގެ ފަހުން 215 ކިލޯގެ މަސްތުވާތަކެތި އަތުލައިގެން މައްސަލައަކާ ގުޅިގެން ވެސް 2 މީހަކު ހައްޔަރު ކޮށްފައިވާއިރު، އެ ދެމީހުންނަށް ވެސް ވަނީ ބަންދުގެ މުއްދަތު ޖަހާފައެވެ.
