އެމެރިކާގެ ކުރީގެ ޚާރިޖީ ވަޒީރު ޖެނެރަލް ކޮލިން ޕަވަލް ކޮވިޑުގެ އާލާސްކަންފުޅުގައި ހޯމަ ދުވަހު އަވަހާރަވެއްޖެއެވެ. އެމަނިކުފާނުގެ އުމުރުފުޅަކީ 84 އަހަރެވެ.

ޖެނެރަލް ކޮލިން ޕަވަލް އަވަހާރަވިކަން އާއިލާގެ ފަރާތުން ނެރުނު ބަޔާނެއްގައި ވަނީ ޔަގީންކޮށްދީފައެވެ. އާއިލާއިން ބުނެފައިވަނީ އެމަނިކުފާނު ހުންނެވީ ކޮވިޑު ބަލިން ދިފާއުވުމަށްޓައި ވެކްސިން ޑޯޒްތައްވެސް ފުރިހަމަ ކުރައްވައިގެން ކަމުގައެވެ. ޖެނެރަލް ޕަވަލް އަވަހާރަވީ އެމެރިކާގެ ވެރިރަށް ވޮޝިންޓަނުގައި ހުންނަ ވޯލްޓަރ ރީޑް މެޑިކަލް ސެންޓަރުގައި ފަރުވާ ހޯއްދަވަމުން ގެންދަވަނިކޮށެވެ. އެ ސެންޓަރަކީ އެމެރިކާގެ އަސްކަރިއްޔާގެ އެންމެ ޝަރަފުވެރި އެންމެ އިތުބާރު މެޑިކަލް ސެންޓަރެވެ.

ޖެނެރަލް ކޮލިން ޕަވަލް އެމެރިކާގެ ޚާރިޖީ ވަޒީރުކަން ކުރެއްވީ ރައީސް ޖޯޖް ޑަބްލިޔު ބުޝްގެ ރިޔާސަތުގެ ފުރަތަމަ ދައުރުގައި 2001ން 2005 ގެ ނިޔަލަށެވެ. ރައީސް ބުޝްގެ ރިޔާސަތުގެ ދެވަނަ ދައުރުގައި ޚާރިޖީ ވަޒީރުކަން ކުރެއްވީ ކޮންޑޮލީޒާ ރައިސްއެވެ.

ޖެނެރަލް ކޮލިން ޕަވަލްއަކީ އަސްކަރިއްޔާއިން 1993 ވަނަ އަހަރު ރިޓަޔަރ ކުރެއްވުމުގެ ކުރިން ހަތަރު ތަރީގެ ޖެނެރަލެކެވެ. އެމެރިކާގެ އެއްގަމާއި ވަޔާއި ކަނޑުގެ ގުޅިފައިވާ ލަޝްކަރުތަކުގެ އެންމެ އިސްކޮމާންޑަރުންގެ ކޮމިޓީގެ ވެރިޔާއެވެ. ޗެއަރމަން އޮފް ޖޮއިންޓް ޗީފް އޮފް ސްޓާފެވެ. އެމެރިކާ އިސްވެ އޮވެގެން ކުވޭތުގެ މައްސަލައިގައި 1991 ވަނަ އަހަރު އޮޕަރޭޝަން ޑެސަރޓް ސްޓޯމްގެ ނަމުގައި އިރާގާ ދެކޮޅަށް ހަނގުރާމަކުރީ ޖެނެރަލް ކޮލިން ޕަވަލްގެ ޗެއަރމަން އޮފް ޖޮއިންޓް ޗީފް އޮފް ސްޓާފްގެ ދައުރުގައެވެ. އަދި ޕެނަމާގެ ވެރިޔާ އެންޓޯނިއޯ ނޮރިއޭގާ މަގާމުން ދުރުކޮށް ހައްޔަރު ކުރުމަށް އެމެރިކާއިން އޮޕަރޭޝަނެއް ހިންގީ ވެސް ޖެނެރަލް ޕަވަލްގެ އަސްކަރީ ޗެއަރމަންޝިޕްގެ ދައުރުގައެވެ.

ޖެނެރަލް ކޮލިން ޕަވަލްއަކީ އެމެރިކާގެ ޚާރިޖީ ވަޒީރުކަން ކުރެއްވި ފުރަތަމަ ކަޅު ލީޑަރެވެ. އަދި އެމަނިކުފާނަކީ އެމެރިކާގެ އަސްކަރިއްޔާގެ ތާރީޚުގައި ވެސް ކޮމާންޑަރުންގެ ކޮމާންޑަރުކަން ކުރެއްވި ނުވަތަ ޑިފެންސް ހައިރާކީގެ އެންމެ މަތީ މަގާމު ފުރުއްވި ފުރަތަމަ ކަޅު ކޮމާންޑަރެވެ. އެމަނިކުފާނު ވަނީ އެމެރިކާގެ ރައީސްކަމުގައި ރޮނަލްޑް ރޭގަން ހުންނެވި ޒަމާނުގައި ނެޝަނަލް ސިކިއުރިޓީ އެޑްވައިޒަރުކަން ވެސް ކުރައްވައިފައެވެ.