ކޮވިޑް-19 ޖެހިގެން އިތުރު މީހަކު ރާއްޖޭގައި ނިޔާވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ނިޔާވެފައިވަނީ އުމުރުން 80 އަހަރުގެ ދިވެހި ފިރިހެނެއްކަމަށެވެ. މިމީހާ ނިޔާވެފައިވަނީ ހުޅުމާލެ މެޑިކަލް ފެސިލިޓީގައި އާދީއްތަ ދުވަހުގެ ހެނދުނު 7:45ގައި ކަމަށް އެޗްޕީއޭން ބުނެއެވެ.

މިއާއެކު ރާއްޖޭގައި ކޮވިޑް ޖެހިގެން ނިޔާވި މީހުންގެ އަދަދު ވަނީ 238ށް އަރާފައެވެ.

މިއީ އޮކްޓޯބަރ މަހުގެ ތެރޭގައި ކޮވިޑް ޖެހިގެން ނިޔާވި 6ވަނަ މީހާއެވެ.

އޮކްޓޯބަރ މަހުގެ 13 ވަނަ ދުވަހު އުމުރުން 87 އަހަރުގެ ދިވެހި ފިރިހެނަކު ވަނީ, އައްޑޫ ކޮވިޑް މެނޭޖްމަންޓް ފެސިލިޓީގައި ނިޔާވެފައެވެ. މީގެއިތުރުން ހަމަ އެދުވަހު އުމުރުން 81 އަހަރުގެ ދިވެހި އަންހެނަކުވެސް ވަނީ ކޮވިޑް ޖެހިގެން ނިޔާވެފައެވެ. އޮކްޓޯބަރ މަހުގެ 9 ވަނަ ދުވަހު އުމުރުން 72 އަހަރުގެ ދިވެހި އަންހެނަކުވެސް ވަނީ ކޮވިޑް ޖެހިގެން ނިޔާވެފައެވެ. އޮކްޓޯބަރ މަހުގެ 8 ވަނަ ދުވަހު 97 އަހަރުގެ ދިވެހި ފިރިހެނަކު ވަނީ ނިޔާވެފައިވާއިރު އޮކްޓޯބަރ މަހުގެ 4 ވަނަ ދުވަހު 54 އަހަރުގެ ދިވެހި ފިރިހެނަކު ވަނީ ކޮވިޑް ޖެހިގެން ނިޔާވެފައެވެ.