ސަލްމާން ޚާންގެ "ޓިއުބްލައިޓް" ގެ ޓްރެއިލާ ނެރެނީ މާދަމާ

ސަލްމާންޚާންގެ "ޓިއުބްލައިޓް" ގެ ޓްރެއިލާ ނެރޭނީ މާދަމާ ކަމަށް ކަބީރު ޚާން ބުނެފިއެވެ. "ޓިއުބްލައިޓް" ގެ ޓީޒާ އާންމު ކުރުމަށް ފަހު ކުރި ޓްވީޓެއްގައި ބުނެފައި ވަނީ ޓްރެއިލާ ނެރޭނީ މިމަހުގެ 25 ގައި ކަމަށެވެ. އޭނާ ވަނީ އެޓްވީޓާ އެކު ފިލްމުގެ ސެންސަރ ސެޓްފިކޭޓް އެޓޭޗްކޮށްފައެވެ.

"ޓިއުބްލައިޓް" ގެ "ރެޑިއޯ ސޯންގް" ވެސް ވަނީ މިހާރު ރިލީޒްކޮށްފައެވެ. އެ ލަވައަށް ވެސް ދަނީ ބެލުންތެރިންގެ ބޮޑު ތަރުހީބެއް ލިބެމުންނެވެ. ސަލްމާން ބުނީ މި ލަވައަށް "ރޭޑިއޯ ސޯންގް" ގެ ނަން ދެވުނީ މިއީ މި ފިލްމުގައި އަންނަ އުފާވެރި ޚަބަރަކާ ގުޅިގެން އަންނަ ލަވައަކަށް ވާތީ ކަމަށެވެ. "ޓިއުބްލައިޓް" ގައި ޖުމްލަ ހިމެނެނީ 3 ލަވައެވެ.

"ޓިއުބްލައިޓް" އަކީ ހިމާލިޔާ ބޯޑަރާ ހެދި އިންޑިއާ އާއި ޗައިނާއާ ދެމެދު 1962 އަހަރު ކުރިއަށް ދިޔަ ހަނގުރާމައިގެ ދުވަސްވަރު، އިންޑިއާގެ ޒުވާން ފިރިހެނަކާއި ޗައިނާގެ ޒުވާން އަންހެން ކުއްޖަކާ ބައްދަލުވެ، އެ ދެމީހުންނަށް އެކަކު އަނެކަކު ދެކެ ލޯބިވެވި، ބޯޑަރުގެ މައްސަލަގައި ދެގައުމުގެ ދެމެދުގައި ބޮޑު ހަނގުރާމައެއް ކުރިއަށް ދިޔަ ދަނޑިވަޅުގައި ދެމީހުންގެ ދެމެދުގައި އޮތް ލޯބީގެ ވާހަކައިގެ އަސްލަކަށް ބަލައިގެން އުފައްދާފައިވާ ފިލްމެކެވެ.

މިފިލްމު ސިނަމާތަކަށް އަންނާނީ ކުޑަ އީދުގައެވެ. މި ފިލްމް ރިލީޒްކުރުމުގެ ކުރިން ވެސް ވަނީ 227 ކްރޯޑް ރުޕީސް ލިބިފައި ވެއެވެ. އެވަރުގެ ބޮޑު ފައިދާއެއް ޓިއުބްލައިޓަށް ލިބުނީ މިއުޒިކް ރައިޓްސް އާއި ތިއެޓްރިކަލް ރައިޓްސް ވިއްކާލައިގެންނެވެ.

މި ފިލްމު ތިއޭޓާގައި އެޅުވުމަށް އިންޑިއާގެ އެންއެޗް ސްޓޫޑިއޯޒް އަށް ވިއްކާލާފައި ވަނީ 132 ކްރޯޑް ރުޕީސްއަށެވެ. އަދި ޗައިނާގައި ފިލްމު އެޅުވުމަށް 75 ކްރޯޑް ރުޕީސްއަށް ވިއްކާލާފައިވާ ކަމަށް ރިޕޯޓްތައް ބުނެއެވެ. މީގެ އިތުރުން ސޮނީ މިއުޒިކަށް 20 ކްރޯޑް ރުޕީސްއަށް ވަނީ ވިއްކާލާފައެވެ.