އީރާންގެ މަރުކަޒީ ބޭންކުގެ ކުރީގެ ގަވަރުނަރު ޖަލަށްލާން ހުކުމްކޮށްފި

އީރާންގެ މަރުކަޒީ ބޭންކުގެ ކުރީގެ ގަވަރުނަރުގެ އިތުރުން ކުރީގެ އޮފިޝަލުންތަކެއް ޖަލަށްލާން ހުކުމްކޮށްފިއެވެ.

މީޑިއާތަކުގައި ބުނެފައިވަނީ އެމީހުން ޖަލަށްލާން ހުކުމްކޮށްފައިވަނީ ގައުމުގެ ބޭރުފައިސާގެ މާކެޓް ބެލެހެއްޓުމުގައި ގާނޫނާ ޚިލާފަށް އަމަލުކޮށްފައިވާތީއެވެ.

މައްސަލަތައް ބޮޑުވެފައިވާ މަރުކަޒީ ބޭންކުގެ ކަންކަން 5 އަހަރު ދުވަސް ވަންދެން ބެލެހެއްޓި ވަލީއުﷲ ސައިފް 10 އަހަރު ދުވަހަށް ޖަލަށްލާން ހުކުމްކޮށްފައިވާކަން ދައުލަތުގެ ޓީވީ މެދުވެރިކޮށް ޖުޑިޝަރީގެ ތަރުޖަމާނު ވަނީ ހޮނިހިރު ދުވަހު ވިދާޅުވެފައެވެ. ވަލީއުﷲ މަރުކަޒީ ބޭންކުގެ ގަވަރުނަރުކަމުން ވަކިކޮށްފައިވަނީ 2018 ވަނަ އަހަރުގެ ޖުލައި މަހުގައެވެ.

ވަލީއުﷲގެ ބަދަލުގައި ޢަބްދުލްނަސީރު ހިއްމަތީ އެ މަގާމަށް އައްޔަންކުރީ، އިބްރާހިމް ރައީސީއާ ރައީސްކަމަށް ވާދަކުރައްވާނެކަން އިއުލާންކުރެއްވުމާއެކު މެއި މަހުގެ ފަހުކޮޅުގައި، ރޫހާނީއެވެ.

ވަލީއުﷲގެ އިތުރުން ކުރީގެ ނިއުކްލިއަރ ކަންތަކާ ބެހޭ އިސް ފަރާތެއްކަމަށްވާ އައްބާސް އަރަގަޗީއަށް ބޮޑުބޭބެ ކިޔާ އަހުމަދު އަރަގަޗީގެ މައްޗަށް ވެސް ވަނީ 8 އަހަރު ދުވަހުގެ ޖަލު ހުކުމެއް އިއްވާފައެވެ. އޭނާއަކީ ބޭރުގެ ފައިސާގެ މުޢާމަލާތްތަކާ ބެހޭ ކަންކަމުގެ ކުރީގެ ނައިބެވެ. އޭނާ ވެސް ހައްޔަރު ކޮށްފައިވަނީ 2018 ވަނަ އަހަރުއެވެ.

މީގެ އިތުރުން ގަވާއިދާ ޚިލާފަށް ފައިސާގެ މުޢާމަލާތްކުރި އިރު އެކަމުގައި ބައިވެރިވި އުމުރުން 30 އަހަރު ސަލަރ އަޣާޚާނީގެ މައްޗަށް ވަނީ 13 އަހަރުގެ ޖަލުހުކުމެއް އިއްވާފައެވެ.

މި ތިން މީހުންނަކީ މި މުއާމަލާތްތަކުގައި ހިމެނޭ 10 މީހުންގެ ތެރޭގައި ހިމެނޭ މީހުންނެވެ. އަދި މީގެ އިތުރުން ވެސް މި މުއާމަލާތްތަކުގައި އެކި ގޮތްގޮތުން ބައިވެރިވި އެހެން މީހުންގެ މައްޗަށް ވެސް ދަނީ ކޯޓުގައި ޝަރީއަތް ހިންގަމުންނެވެ.