ކަނޑުމަތީގެ ހާދިސާ: ނިޔާވި ނާހިދާއާއި، ދަރިންގެ ފޮޓޯތައް ގެނެސްނުދިނުމަށް އިލްތިމާސްކޮށްފި
އިންސާނީ ކަރާމާތްތެރިކަމަށް އުނިކަން ނާންނާނެ ގޮތަށް ރިޕޯޓު ކުރަން ޖެހޭ
މޯލްޑިވްސް މީޑިއާ ކައުންސިލް،
ކަނޑުމަތީގައި ހިނގި ނުރައްކާތެރި ހާދިސާގައި ނިޔާވި މަރިޔަމް ނާހިދާއާއި، ދަރިންގެ ފޮޓޯތައް ގެނެސްނުދިނުމަށް މީޑީއާ ކައުންސިލުން އިލްތިމާސްކޮށްފިއެވެ.
މީޑިއާ ކައުންސިލުން ބުނީ 16 އޮކްޓޫބަރު 2021 ވީ ހޮނިހިރު ދުވަހު ހިނގި ކަނޑުމަތީގެ ނުރައްކާތެރި ހާދިސާގައި ނިޔާވި ފަރާތާއި އެފަރާތުގެ ދަރިންގެ ޚަބަރާއި މައުލޫމާތު ޝާޢިއުކުރުމުގައި، މި ދަނޑިވަޅުގައި އާއިލާއަށް އިތުރަށް ހިތާމަ ލިބޭ ގޮތަށް ޚަބަރާއި މައުލޫމާތު ގެނެސް ނުދިނުމަށާއި ދަރިންނާއި އަދި މައްޔިތާގެ ފޮޓޯއާއި މަންޒަރު ގެނެސް ނުދިނުމަށް މީޑިއާތަކުގައި ދެންނެވުމަށް އާއިލާއިން އެދިފައިވާ ކަމަށެވެ.
މީޑިއާ ކައުންސިލުން ބުނީ ހިތާމައާއި މާޔޫސްކަމުގެ ހާދިސާއެއް މެދުވެރިވެފައިވާ ހާލަތެއްގައި ކަންކަން އޮޅުންފިލުވައި އަދި ޝާޢިއުކުރާނީ އެހިތާމައެއް ނުވަތަ މާޔޫސްކަމެއް ކުރިމަތިވެފައިވާ ބައެއްގެ އިންސާނީ ކަރާމާތްތެރިކަމަށް އުނިކަން ނާންނާނެ ގޮތުގެ މަތިން ކަމަށެވެ.
ދިވެހި މީޑިއާގެ ހަމަތަކާއި އަހުލާގީ މިންގަނޑު ބަޔާންކުރާ ކޯޑް އޮފް އެތިކްސް ގެ 16 ވަނަ މާއްދާގައި އަލިއަޅުވާލައި، މިފަދަ ހާދިސާތައް ޚަބަރުތަކުގައި ގެނެސްދޭއިރު، ހުރިހާ މީޑިއާތަކުން ވެސް "ކޯޑް އޮފް އެތިކްސް" އަށް ތަބާވުމަށާއި، ނޫސްވެރިކަމުގެ އަހުލާގީ އަދި ސުލޫކީ މިންގަނޑު ހިފެހެއްޓުމަށް މީޑިއާ ކައުންސިލުން ވަނީ އިލްތިމާސްކޮށްފައެވެ.
