އަމީނީ މަގު ސީގަލް ބިލްޑިންގގައި ރޯވެ އަނދަމުންދާތީ އެމްއެންޑީއެފުން ޙަރަކާތްތެރިވާން ފަށައިފިއެވެ.
މި ޙާދިސާއާ ގުޅޭގޮތުން އެމްއެންޑީއެފުން ބުނީ، އަލިފާނުގެ ޙާދިސާ ހިނގުމުގެ ސަބަބުން އެމްއެންޑީއެފްގެ ފަޔަރ އެންޑް ރެސްކިއު ޓީމުން ޙަރަކާތްތެރި ވަމުންދާ ކަމަށެވެ.
އަދި އަލިފާން ރޯވެފައިވަނީ ސީގަލް ފިހާރަ ހުންނަ އިމާރާތުގައި ކަމަށް މައުލޫމާތު ލިބެއެވެ.
އެ ސަރަޙައްދުގައި މިހާރު އެމްއެންޑީއެފާއި ފުލުހުން ދަނީ ޙަރަކާތްތެރިވަމުންނެވެ. އަދި ރޯވެފައިވާ އަލިފާންގަނޑު ނިއްވާލުމުގެ މަސައްކަތް މިހާރުވެސް ކުރަމުންދާއިރު، އެއްވެސް މީހަކަށް އަނިޔާވެފައިވާ ކަމުގެ ރިޕޯޓެއް މިހާތަނަށް ލިބިފައެއް ނުވެއެވެ. ނަމަވެސް އެ ސަރަޙައްދަށް ވަރަށް ބޮޑަށް ދުމުގެ އަސަރު ފެތުރިފައިވެއެވެ.
އެޗްޕީއޭއިން ވެސް ވަނީ މިވަގުތު އަމީނީމަގު ސީގަލް ފިހާރަ ސަރަހައްދުގައި ހިނގަމުންދާ އަލިފާނުގެ ހާދިސާގައި، ދުމުން ރައްކާތެރިވުމަށް ދުމުގެ އަސަރު ކުރާ ހިސާބަށް އާއްމު ފަރާތްތަކުން ނުދިޔުމަށް އިލްތިމާސްކޮށްފައެވެ.
އޭގެ އިތުރުން، ދުމުގެ އަސަރު ކުރާ ހިސާބުތަކުގައި ގޭގެތެރެއަށް ދުން ނުވަންނަހެން ދޮރާއި ކުޑަދޮރުތައް ރަނގަޅަށް ލެއްޕުން މުހިއްމުކަން އެޗްޕީއޭއިން ފާހަގަކޮށްފައިވެއެވެ.
އެޗްޕީއޭއިން ވަނީ އުމުރުން ދުވަސްވީ ފަރާތްތަކާއި ކުޑަކުދިންނާއި ނޭވާލާ ނިޒާމުގެ ބަލިތައް ހުންނަ ފަރާތްތަކާއި ހިތުގެ ބަލިތައް ހުންނަ ފަރާތްތަކަށް ދުމުގެ އަސަރު ކުރުމުން ނުރައްކާވެދާނެތީ ސަމާލުވުމަށް އެދިފައެވެ.
