މާލެއިން ވ. އަތޮޅަށް ދަތުރުކުރި ލޯންޗެއް އޮޅުވެލި ކައިރިން ދިޔަވި ޙާދިސާއެއް ހިނގައި، މަންމައަކު މަރުވެ އޭނާގެ ދަރިފުޅު ގެއްލިގެން ހޯދަމުންދާއިރު، މި ލޯންޗުގައި އެކަށީގެންވާ ސަލާމަތީ ކަންކަން ބެލެހެއްޓިފައި ނުވާކަމަށް ރާއްޖެއެމްވީއަށް މައުލޫމާތު ލިބިއްޖެއެވެ.
ލޯންޗުން ދަތުރުކުރި ފަރާތްތަކުން ބުނެފައިވާ ގޮތުގައި އެ ލޯންޗުން ދަތުރުކުރި މީހުން ލައިފް ޖެކެޓު އަޅާފައެއް ނުވެއެވެ. އަދި ކަނޑު އުޅަނދުފަހަރުގައި ސަލާމަތީ ގޮތުން ފުރިހަމަ ކުރަންޖެހޭ ކަންކަން ވެސް ފުރިހަމަނުވާކަމަށް މައުލޫމާތު ލިބެއެވެ.
މިދުވަސްވަރަކީ ރާއްޖެއަށް މޫސުން ގޯސް ދުވަސްވަރަކަށް ވާއިރު ކަނޑުދަތުރުކުރާއިރު ސަމާލުވުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ. ވަކިން ޚާއްސަކޮށް، ކޮންމެހެން ކުރަންޖެހޭ ދަތުރުތައް ކުރަނަމަވެސް، ސަލާމަތީ ގޮތުން އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމަށް ގޮވާލާފައިވެއެވެ.
ލޯންޗު ދިޔަވެ އަޑިއަށްދާން ފެށުމުން ކ. ގުރައިދޫ ފަޅަށް އޭރު ވަނީ ވައްދާފައެވެ. އަދި މި ހާދިސާގައި ލޯންޗުން މޫދަށް ވެއްޓުނު ތިން މީހުންގެ ތެރެއިން ފެނިފައިވަނީ ގެއްލުނު 4 އަހަރުގެ ކުއްޖާގެ މަންމައާއި އޭނާގެ އަނެއް ދަރިއެވެ. ލޯންޗުން ވެއްޓުނު އުމުރުން ހަތަރު އަހަރުގެ ކުއްޖާ އަދިވެސް ފެނިފައިނުވާ ކަމަށް އެމްއެންޑީއެފުން މައުލޫމާތު ދެއެވެ.
އެމްއެންޑީއެފުން ވަނީ އެކުއްޖާ ހޯދުމަށްޓަކައި 10 ސްކެއަރ ކިލޯމީޓަރަށްވުރެ ބޮޑު ސަރަޙައްދެއް ބަލާފައެވެ. މިހާރުވެސް އެ ކުއްޖާ ހޯދުމުގެ އޮޕަރޭޝަން ހުއްޓުމެއްނެތި ކުރިއަށްދެއެވެ.
މި ދުވަސްވަރު މޫސުން ގޯސްވުމުގެ ސަބަބުން ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން ވަނީ އިލްތިމާސްކޮށްފައެވެ. އެގޮތުން ރާއްޖޭގެ ސަރަހައްދުގައި އުފެދިފައިވާ ލޯ ޕްރެޝަރ ޓްރަފްގެ ސަބަބުން ރާއްޖޭގެ ހުރިހާ ސަރަހައްދެއްގައި ވައި ގަދަވުމާއެކު ކަނޑުތައް ގަދަވާނެ ކަމަށް ވަނީ ބުނެފައެވެ.
