ކަރަންޓު ސިސްޓަމްތައް ޓެސްޓް ކުރުމުގެ މަސައްކަތް ކާމިޔާބު: ސްޓެލްކޯ
16 އޮކްޓޯބަރު 2021 | ހޮނިހިރު 17:52ސިސްޓަމްތައް އަދާހަމަ ކުރުމަށް އަބަދުވެސް ގެންދަނީ މަސައްކަތް ކުރަމުންކަމަށް ސްޓެލްކޯއިން ބުނޭ
ސްޓެލްކޯ
މާލެއާއި ހުޅުމާލޭގެ ކަރަންޓުގެ ޚިދުމަތައް އެއްވެސް މައްސަލައެއް ދިމާނުވެ ހޮނިހިރު ދުވަހުގެ ހެނދުނު ކުރިޔަށް ގެންދިޔަ ޓެސްޓްތައް ކާމިޔާބު ކަމާއެކު ނިންމާލެވިފައިވާކަމަށް ސްޓެލްކޯއިން ބުނެފިއެވެ.
ސްޓެލްކޯގެ ސިސްޓަމްތަކުގެ ޓެސްޓެއް ހޮނިހިރު ދުވަހު ކުރިޔަށް ގެންދިޔުމަށް ހަމަޖެހިފައިވާކަމަށް އެކުންފުނިން ވަނީ ބުނެފައެވެ. މިޓެސްޓުތަކަކީ ޚިދުމަތް އިތުރަށް ފުރިހަމަކުރުމަށްޓަކައި ކޮންމެހެން ކުރަންޖެހޭ ޓެސްޓްތަކެއްކަމަށް ސްޓެލްކޯއިން ބުނެއެވެ. މި ޓެސްޓްތައް ކުރިޔަށްދާއިރު ހޮނިހިރު ދުވަހުގެ ހެނދުނު 7:00އާ 8:00އާ ދެމެދު މާލެއާއި ހުޅުމާލެއިން ކަރަންޓު ކެނޑުމަކީ އެކަށީގެންވާ ކަމެއްކަމަށްވެސް އެކުންފުނިން ބުނެފައިވެއެވެ.
ކަރަންޓް ސިސްޓަމްތަކުގެ ޓެސްޓު ކާމިޔާބުކަމާއެކު ނިންމާލާފައިވާކަމަށް އެކުންފުނިން ބުނެފައިވާއިރު ސިސްޓަމްތައް އަދާހަމަ ކުރުމަށް އަބަދުވެސް ގެންދަނީ މަސައްކަތް ކުރަމުންކަމަށް ސްޓެލްކޯއިން ބުނެއެވެ.
މާލެ، ހުޅުލެ އަދި ހުޅުމާލޭގެ ކަރަންޓް އެއް ވިއުގައަކުން ގުޅާލުމަށް ކުރިޔަށްގެންދިޔަ މަޝްރޫއުގައި މިހާރު ވަނީ އެއް ވިއުގައަކުން މިތިން ސަރަހައްދު ގުޅާލާފައެވެ. މިމަޝްރޫއުގެ ދަށުން ގާއިމުކޮށްފައިވާ ސަބްސްޓޭޝަންތައް އެނަރޖައިޒްކުރުމުގެ މަސައްކަތް މިދިޔަ ޖުލައިމަހުގެ ތެރޭގައި ސްޓެލްކޯއިން ކޮށްފައިވެއެވެ. ގްރޭޓަރ މާލޭ ގްރިޑް ކަނެކްޝަނަކީ މާލެއާއި، ހުޅުމާލެ އަދި ހުޅުލޭގެ ކަރަންޓު ވިއުގަ 132 ކޭވީގެ 7 ކިލޯމީޓަރުގެ ދެ ސަރކިޓްއިން ގުޅާލުމަށް ކުރިޔަށްގެންދިޔަ މަޝްރޫއެކެވެ.
