ރާއްޖޭގައި ދަނޑުވެރިކަން މިއަށްވުރެ ފުޅާ ދާއިރާއެއްގައި ކުރެވޭނެ ކަމަށާއި، މާކެޓް އެބައޮތް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

ރާއްޖޭގެ ދަނޑުވެރިންގެ ދުވަހާއި، ދުނިޔޭގެ ކާބޯތަކެތީގެ ދުވަހުގެ ރަސްމީ ޖަލްސާގައި ރައީސް ސާލިހު ވިދާޅުވީ ރާއްޖޭގެ އުފެއްދުންތެރިކަމަށް ބަލާއިރުގައި، ދަނޑުވެރިކަން މިހާރު ހިއްސާކުރަނީ ޖީޑީޕީގެ ގާތްގަނޑަކަށް 1.7 އިންސައްތަ ކަމަށެވެ. މިއީ މިކަން އޮވެގެންވާނެ ގޮތެއް ނޫން ކަމަށާއި، ދަނޑުވެރިކަން މިއަށްވުރެ ފުޅާ ދާއިރާއެއްގައި ކުރެވޭނެ ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ ޖީޑީޕީގެ މިއަށްވުރެ ބޮޑުބައެއް ދަނޑުވެރިކަމުގައި ހިއްސާ ކުރެވިދާނެ ކަމަށެވެ.

ރައީސް ސާލިހު ވިދާޅުވީ ދަނޑުވެރިކަން ފުޅާކުރުމަކީ، ލާމަރުކަޒު ކުރަމުންދާއިރުގައި، ވަރަށް މުހިންމު ބޭނުންތެރިކަމެއް ކަމަށެވެ. މިއީ މުޅި ރާއްޖޭގެ އެކި ކަންކޮޅުތަކުގައި އިގްތިސާދު ފުޅާކުރުމަށް ކުރެވިދާނެ އެއް ސިނާއަތް ކަމަށާއި، މީގެ ސަބަބުން އިތުރު ވަޒީފާތައް، ރާއްޖޭގެ އެކި ރަށްރަށުގައި އުފެދިގެންދާނެ ކަމަށް ރައީސް ސާލިހު ވިދާޅުވިއެވެ. އަދި ވިދާޅުވީ އާއިލާތަކަށް އޭގެ ސަބަބުން ލިބޭ ނަފާ ބޮޑުވެގެންދާނެ ކަމަށާއި، ރަށުގައި ތިބެ ކުރާނެ މަސައްކަތްތައް އިތުރުވެގެންދާނެ ކަމަށެވެ.

ރައީސް ސާލިހު ވިދާޅުވީ ރާއްޖޭގައި މާކެޓް އެބައޮތް ކަމަށާއި، ހައި އެންޑް ރިޒޯޓުތަކަށް ބޭނުންވާ ތަރުކާރީއާއި މޭވާ އިންތިހާއަށް ގިނަ ކަމަށެވެ. މި ހުރިހާ ތަކެއްޗެއް މިހާރުވެސް ރާއްޖެއަށް ގެންނަނީ ބޭރުގެ ގައުމުތަކުންކަން ރައީސް ފާހަގަކުރެއްވިއެވެ.

ދަނޑުވެރިކަމަށް ވަރަށް މުހިންމު ކަމެއް ދޭންޖެހޭކަން ފާހަގަކުރައްވައި ރައީސް ސާލިހު ވިދާޅުވީ ކާބޯތަކެތީގެ ސަލާމަތާއި ސެކިއުރިޓީ ރައްކާތެރިކުރަން ޖެހޭ ކަަމަށެވެ.

ދަނޑުވެރިކަމާއިގެން ކުރިއަށްދާއިރުގައި، އޯގަނިކް ފަރމިންއަށް ބޮޑަށް ސަމާލުކަންދީގެން ކުރިއަށް ދިޔުމަށް އިލްތިމާސް ކުރައްވަމުން ރައީސް ވިދާޅުވީ މާކެޓް އެބައޮތް ކަމަށާއި، އުފައްދާ ތަކެތީގެ އަގު ތަންކޮޅެއް ބޮޑުވެދާނެ ކަމަށެވެ. ނަމަވެސް، އޯގަނިކް ފަރމިންއަށް ރާއްޖޭގައި އޮތް ބާޒާރު ކުޑަ ނޫން ކަމަށާއި، ބާޒާރަށް ނެރޭއިރުގައި މިއީ އެގޮތަށް އުފައްދާފައި ހުރި ތަކެތިކަން ޔަގީންކޮށްދޭ ކަމަށްވާނަމަ ބޮޑުއަގުގައި ވިކިގެންދާނެ ކަމަށް ވިދާޅުވިއެވެ.