ހުޅުމާލެ ވެކްސިނޭޝަން ސެންޓަރ އޮކްޓޯބަރ މަހުގެ 16ން 18ށް ބަންދުވާނެކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.

ހުޅުމާލޭގައި ވެކްސިން ޖަހައިދެމުން އަންނަނީ ހުޅުމާލެ ހޮސްޕިޓަލުންނެވެ. މާލެ ސަރަހައްދުގައި ދެން ވެކްސިން ޖަހައިދެމުން އަންނަނީ އޭޑީކޭ ހޮސްޕިޓަލާއި އައިޖީއެމްއެޗް، ދަމަނަވެށި، ސެނަހިޔާ އަދި ވިލިމާލެއިންނެވެ.

މިތަންތަނުގެ ތެރެއިން ސިނޯފަރމް ވެކްސިން ޖަހައިދެނީ ހަމައެކަނި ސެނަހިޔާއިންނެވެ. ސިނޯފަރމް ވެކްސިން ޖެހުމަށް އެޕޮއިންޓްމަންޓް ނަގާކަށް ނުޖެހޭނެއެވެ. ރާއްޖޭގައި މިވަގުތު ދެން ޖަހަމުން އަންނަ ފައިޒަރ ވެކްސިނާއި އެސްޓްރަޒެނިކާ ވެކްސިން ޖަހައިދެނީ އެޕޮއިންޓްމަންޓް އުސޫލުންނެވެ.

މީގެތެރެއިން ފައިޒަރ ވެކްސިން ޖަހައިދެމުން އަންނަނީ އޭޑީކޭ، ހުޅުމާލެ ހޮސްޕިޓަލް އަދި އައިޖީއެމްއެޗުންނެވެ. އައިޖީއެމްއެޗުން ފައިޒަރ ވެކްސިން ޖަހައިދެނީ ހޮނިހިރު، އާދިއްތަ އަދި ހޯމަ ދުވަހުއެވެ.

އެސްޓްރަޒެނިކާ ވެކްސިން ޖަހައިދެމުން އަންނަނީ ދަމަނަވެށި، ހުޅުމާލެ ހޮސްޕިޓަލް، އައިޖީއެމްއެޗް، ސެނަހިޔާ އަދި ވިލިމާލެއިންނެވެ.

ފެބްރުއަރީ މަހުގެ 1 ވަނަ ދުވަހު ރާއްޖޭގައި ކޮވިޑުން ދިފާއުވުމަށް ވެކްސިނޭޝަން ޕްރޮގްރާމް ފަށާފައިވާއިރު މިހާތަނަށް ވެކްސިންގެ ދެ ޑޯޒް 350،739 މީހުން ވަނީ ފުރިހަމަކޮށްފައެވެ. ފުރަތަމަ ޑޯޒް 393،611 މީހުން ވަނީ ޖަހާފައެވެ. އާބާދީގެ ބޮޑު ބައެއް ވެކްސިން ފުރިހަމަކޮށް ބަލިން ދިފާއުވުމަށް ކަމާބެހޭ ފަރާތްތަކުން ގެންދަނީ ތަކުރާރުކޮށް އިލްތިމާސްކުރަމުންނެވެ. ނަމަވެސް އަދިވެސް ވެކްސިން ޖަހަންޖެހޭ އާބާދީގެ 30 އިންސައްތަ މީހުން ވެކްސިންގެ އެއްވެސް ޑޯޒެއް ނުޖަހާކަމަށް ޓެގް ޓީމުން ވަނީ ބުނެފައެވެ.

މީގެއިތުރުން ރާއްޖޭގައި މިހާރު އަންނަނީ ވެކްސިންގެ ބޫސްޓަރ ޝޮޓް ޖަހަމުންނެވެ. އެޗްޕީއޭއިން ބުނީ ވެކްސިންގެ ބޫސްޓަރ ޑޯޒް ޖެހުމަށް ޝަރުތު ފުރިހަމަވާ މީހުންނަށް މި މަހުގެ 3ން ފެށިގެން ފައިޒަރ ވެކްސިން ޖަހައިދެމުންދާއިރު، މާލެ ސަރަހައްދުގައި އޭޑީކޭ ހޮސްޕިޓަލްގައި ހެނދުނު 9:00ން މެންދުރުފަހު 2:00ށް، ހުޅުމާލެ ހޮސްޕިޓަލްގައި ހެނދުނު 9:00ން މެންދުރުފަހު 2:00ށް އަދި ވިލިމާލެ ހޮސްޕިޓަލްގައި 10:00ން 12:00ށް ވެކްސިން ޖަހައިދެމުންދާނެ ކަމަށެވެ. އަދި ރަށްރަށުގައި ތިބި ޝަރުތު ހަމަވާ މީހުން އެރަށެއްގެ ހެލްތް ސެންޓަރ ނުވަތަ ހޮސްޕިޓަލް މެދުވެރިކޮށް ވެކްސިން ޖެހުމަށް އެޕޮއިންޓްމެންޓް ހެއްދޭނެ ކަމަށް ވެސް ބުނެފައިވެއެވެ.