މަހުމޫދުގެ ޖަނާޒާ ބާއްވައިފި
މަހުމޫދުގެ ޖަނާޒާ ބާއްވާފައިވަނީ އަސުރު ނަމާދަށްފަހު
މަހުމޫދުގެ ޖަނާޒާ ކުރިއަށްގެންދިއުން
އދ. ދަނގެތީގައި އަނިޔާވެރިގޮތަކަށް މަރާލާފައި އޮއްވަ ފެނުނު މަހުމޫދު އަބޫބަކުރުގެ ޖަނާޒާ ބާއްވައިފިއެވެ.
މަހުމޫދުގެ ޖަނާޒާ ބާއްވާފައިވަނީ ހުކުރު ދުވަހުގެ އަސުރު ނަމާދަށް ފަހު ދަނގެތީގައެވެ. މަހުމޫދުގެ ޖަނާޒާގައި އެރަށުގެ ކުދި ބޮޑު އެތައް ބަޔަކު ބައިވެރިވެފައިވެއެވެ. އަދި މަހުމޫދަށް އިންސާފު ހޯދައިދިނުމަށް ގިނަ ބަޔަކު ގެންދަނީ ގޮވާލަމުންނެވެ.
މަހުމޫދުގެ ހަށިގަނޑުގެ އިތުރު ތަހުލީލުތަކެއް ހެދުމަށް ހުކުރު ދުވަހުގެ ހެނދުނުގެ ވަގުތެއްގައި ހަށިގަނޑު މާލެ ގެނެސްފައިވެއެވެ. މައުލޫމާތު ލިބޭ ގޮތުގައި ސީޓީ ސްކޭނެއްގެ އިތުރުން އެހެން ޓެސްޓުތަކެއް ވެސް އައިޖީއެމްއެޗްގައި ހަދާފައިވެއެވެ. އެއަށްފަހު މަހުމޫދުގެ ހަށިގަނޑު ވަނީ އަލުން އެރަށަށް ގެންގޮސްފައެވެ.
މަހުމޫދުގެ މަރުގެ މައްސަލައިގެ ތުހުމަތު ތިން މީހަކަށް ކުރެވެއެވެ. އެއީ އެރަށަށް ގޮސް އުޅޭ އެހެން ރަށެއްގެ ދެ މީހުންނާއި، އެ ދެމީހުންނާ އެއްކޮށް އުޅޭ އިތުރު މީހެކެވެ.
މި ތިން މީހުންވެސް މިވަގުތު ތިބީ ފުލުހުންގެ ބެލުމުގެ ދަށުގައެވެ. އަދި އެމީހުންނާ ސުވާލުކުރަމުންދާކަމަށް ފުލުހުން ބުނެފައިވެއެވެ.
