ތ. ކަނޑޫދޫ ކާބޯތަކެތީގެ މައުރަޒުން ރައީސް ބައްލަވައިގަތް އެކައްޗަކީ ގަބުޅި މެޓާ!

ރާއްޖޭގައި ތަފާތު އެކި ކަންކަމަށް މައުރަޒުތައް ބާއްވަމުން އަންނައިރު މިފަދަ މައުރަޒުތަކުން ބޭނުންވާ ސާމާނެއް އިޝްތިހާރު ކުރުމުގެ ފުރުސަތު ހުޅުވިގެންދެއެވެ. އަޅުގަނޑުމެން މާލެސިޓީއަށް ބަލައިލިކަމުގައިވީނަމަވެސް އެކި ދުވަސްވަރު ތަފާތު އެކި މައުރަޒުތައް އަންނަނީ ބާއްވަމުންނެވެ. އެހެންނަމަވެސް އަތޮޅުތެރޭގައި ބާއްވާ މައުރަޒުތައް މަދުކަން ފާހަގަކޮށްލެވެއެވެ.

ކޮވިޑާއި ގުޅިގެން މިކަންތައްތަކަށް މަޑުޖެހުމެއް އައި ނަމަވެސް މިހާރު އަނެއްކާވެސް މިފަދަ ހަރަކާތްތައް ވަނީ ފަށައިގަނެވިފައެވެ. ރާއްޖޭގައި ކޮވިޑުގެ ހާލަތު ކޮންމެވެސް ވަރަކަށް ރަނގަޅުވަމުން އަންނައިރު ބާއްވާ ފިޒިކަލް އިވެންޓްތަކުގެ އަދަދު ވެސް މިއަންނަނީ އިތުރުވަމުންނެވެ.

އެގޮތުން ކަނޑޫދޫ ކައުންސިލުން އިސްނަގައިގެން މިނިސްޓްރީ އޮފް ފިޝަރީޒް، މެރިންރިސޯސަސް އެންޑް އެގްރިކަލްޗަރާއި ގުޅިގެން މިމަހުގެ 15ން 16ށް ކަނޑޫދޫގައި ކުރިޔަށްގެންދާ ކާބޯތަކެތީގެ މައުރަޒަކީ ފާހަގަކޮށްލެވުނު މައުރަޒެކެވެ. މި މައުރަޒުގެ ބޭނުމަކީ ރާއްޖޭގައި އުފައްދާ ކާބޯތަކެތީގެ ބާވަތްތައް ޕްރޮމޯޓްކޮށް އިޝްތިހާރުކުރުމާއި އެއްތަނަކުން ފެންނަގޮތް ހެދުމާއި އަދި ރާއްޖޭގެ ދަނޑުވެރިކަމުގެ އުފެއްދުންތަކުން ތައްޔާރުކުރާ ކާނާގެ ބާވަތްތައް ދައްކާލުމެވެ. މި މައުރަޒުގައި ތ. އަތޮޅުގެ ހަތަރު ރަށެއްގެ ސްޓޯލްތަކާއި އެގްރޯނެޓާއި ކަނޑޫދޫގެ ދެ ސްޓޯލެއް ވެސް ހުއްޓެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަނީ މި މައުރަޒު ހުކުރު ދުވަހު ރަސްމީކޮށް ހުޅުވައިދެއްވާފައެވެ. މި މައުރަޒުން ތަފާތު އެކި ދިވެހި އުފެއްދުންތައް ފެންނަން ހުރިއިރު ރައީސް ވަނީ ކޮންމެ ސްޓޯލަކަށް ވަޑައިގެން އެ ސްޓޯލަކުން ލިބެން ހުރި ތަކެތީގެ މައުލޫމާތު އޮޅުން ފިލުއްވާފައެވެ.

އެގޮތުން މި ސްޓޯލްތަކަށް ނަންދެވިފައިވަނީ ކަނޑޫދޫ ދަނޑުވެރިންގެ އުފެއްދުމާއި ކަނޑޫދޫ ގޮވާންކުރި އުފެއްދުންތަކާއި ހިރިލަންދޫ ސްޓޯލާއި ކިނބިދޫ މޭޒާއި ވޭމަންޑޫ ސްޓޯލްގެ ނަމުންނެވެ. ރައީސް ވަނީ ކޮންމެ ސްޓޯލަކުން ވެސް ކޮންމެވެސް އެެއްޗެއް ބައްލަވައިގެންފައެވެ. އެގޮތުން ރައީސް ބައްލަވައިގަތް ބައެއް ތަކެއްޗަށް ބަލާއިރު ކުޅިރޮށި، ގަބުޅި މެޓާ، ހިލި ބޭސް، އުޅާލި، މަދު ހަކުރު އަދި ހުނި ހަކުރު ހިމެނެއެވެ. މިތަކެތި ރައީސް ބައްލަވައިގެންނެވީ ސްޓޯލްގައި ތިބި މީހުންނާއި ސުވާލުކުރެއްވުމަށްފަހުއެވެ. އަދި ރައީސް ބައްލަވައިގެންނެވީ ރައީސަށް އެންމެ ކަމުދިޔަ އެއްޗިއްސެވެ.

މި މައުރަޒަށް ބަލާލުމުން ވެސް ތަފާތު އެކި އުފެދުންތައް އަޅުގަނޑުމެންނަށް ފެނިގެންދިޔައެވެ. އެގޮތުން ބިލިމަގުން އަސާރަ ވައްތަރަށް ހަދާފައި ހުރި އެއްޗަކާއި ކަނޑޫދޫ މިރުސް ބޭނުންކޮށްގެން ތައްޔާރުކޮށްފައި ހުރި ކަނޑޫދޫ ސޯސް ވެސް ވިއްކަން ހުއްޓެވެ. އަދި ކަނަމަދު މެޓައިން ހަދާފައި ހުރި ފައްޓަރު ބައެއް ވެސް ފެނިގެން ދިޔައެވެ.

ހަގީގަތުގައި ވެސް މިފަދަ މައުރަޒުތަކުން ދިވެހިންގެ ހުނަރުވެރިކަން އިތުރަށް ފެނިގެންދެއެވެ. ހުނަރުވެރިކަން އިތުރަށް ކުރިއެރުވުމުގެ ހިތްވަރު ލިބިގެންދަނީ މިފަދަ މައުރަޒުތަކުންނެވެ. ރައީސް ހުރިހާ ސްޓޯލަކުން ތަކެތި ބައްލަވައިގަތުމުން ހައިގައިމުވެސް އެ މަސައްކަތްތުގައި ހަރަކާތްތެރިވާ މީހުންނަށް ލިބިގެންދިޔަ މިއީ ވަރަށް ބޮޑު އުފަލަކަށް ވެގެންދާނެއެވެ.