މަރާލި ވިޔަފާރިވެރިޔާގެ ހަށިގަނޑު އަލުން ދަނގެއްޗަށް ގެންގޮސްފި
ހަށިގަނޑުގެ ސީޓީ ސްކޭނެއްގެ އިތުރުން އެހެން ޓެސްޓުތަކެއްވެސް އައިޖީއެމްއެޗްގައި ހަދާފައިވޭ
މަރާލި ވިޔަފާރިވެރިޔާގެ މަހުމޫދު އަބޫބަކުރު
އދ. ދަނގެތީގައި އަނިޔާވެރި ގޮތަކަށް މަރާލި ވިޔަފާރިވެރިޔާ މަހުމޫދު އަބޫބަކުރުގެ ހަށިގަނޑު އަލުން އެރަށަށް ގެންގޮސްފިއެވެ.
އިތުރު ތަހުލީލުތަކެއް ހެދުމަށް ހުކުރު ދުވަހުގެ ހެނދުނުގެ ވަގުތެއްގައި މަހުމޫދުގެ ހަށިގަނޑު މާލެ ގެނެސްފައިވެއެވެ. މައުލޫމާތު ލިބޭ ގޮތުގައި ސީޓީ ސްކޭނެއްގެ އިތުރުން އެހެން ޓެސްޓުތަކެއް ވެސް އައިޖީއެމްއެޗްގައި ހަދާފައިވެއެވެ. ކަނޑު ގަދަވުމާއެކު މާލެ ގެނައުމަށާއި، ރަށަށް ގެންދިއުމުގައި ކޯސްޓްގާޑުން އެހީތެރިކަން ފޯރުކޮށްދީފައިވެއެވެ.
ރާއްޖެއެމްވީއަށް ފުލުހުންގެ މީޑިއާ އޮފިސަރު ވިދާޅުވީ ތަހުލީލުތައް ހެދުމަށްފަހު މިހާރު ހަށިގަނޑު ދަނގެއްޗަށް ގެންގޮސްފައިވާ ކަމަށެވެ. އަދި ތަހުގީގު ކުރިއަށްދާ ކަމަށާއި، މިހާދިސާއާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައިނުވާ ކަމަށް އޮފިސަރު ވިދާޅުވިއެވެ.
މަހުމޫދުގެ ކަށުކަމާކެމީގެ ކަންކަން ކުރިއަށްގެންދާނީ ދަނގެތީގައެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މަހުމޫދު މަރާގުޅިގެން އެރަށުގެ ރައްޔިތުން ދެމީހަކަށް ތުހުމަތު ކުރެއެވެ. އެއީ ރަށަށް ގޮސް އުޅޭ އެހެން ރަށެއްގެ ދެމީހުންނެވެ. ބަޔަކު ހައްޔަރު ނުކުރާ ކަމަށް ފުލުހުން ބުންޏަސް މިހާރު އެ ދެމީހުން ތިބީ ދަނގެތީ ޕޮލިސް ސްޓޭޝަނުގެ ބެލުމުގެ ދަށުގައި ކަމަށް މައުލޫމާތު ލިބެއެވެ.
އުމުރުން 57 އަހަރުގެ މަހުމޫދު މަރާލާފަައިވަނީ ވަރަށް އަނިޔާވެރިކޮށެވެ. އޭނާގެ ބޮލަށާއި ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އޮތީ އެލުވާފައެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ.
އެރަށުގެ ކައުންސިލްގެ ރައީސް މުއާވިޔަތު ރަޝީދު ވިދާޅުވީ, މަހުމޫދަކީ ވަރަށް ރަނގަޅު މީހެއް ކަމަށާއި އޭނާއަކީ ވިޔަފާރިވެރިއެއް ކަމަށެވެ. އެންމެންނާވެސް ގުޅިގެން މަސައްކަތްކުރާ މަހުމޫދާ ޒާތީ އެއްވެސް މައްސަލައެއް އޮތް މީހަކު ނުހުންނާނެ ކަމަށެވެ. އޭނާގެ 4 ކުދިން ތިބޭ ކަމަށާއި، ކާފަ ކިޔާ ކުދިން ވެސް ތިބި ކަމަށް މުއާވިޔަތު ވިދާޅުވިއެވެ.
މަހިބަދޫން މިހާރު ފުލުހުންގެ ފޮރެންސިކް ޓީމެއް ގޮސް ދަނގެތީގައި ހަރަކާތްތެރިވަމުން ދެއެވެ. މި މަރާ ގުޅިގެން އެރަށުގެ ރައްޔިތުން ތިބީ ބިރުވެރިކަމެއްގެ ތެރޭގައެވެ. މިއީ މުޅި ރަށަށް ވެސް ގެނުވި ވަރަށް ބޮޑު ސިހުމެއްގެ ގޮތުގައި ކައުންސިލުން ސިފަކޮށްފައިވެއެވެ.
