ކުޅުުދުއްފުށީ ބަނދަރު ތެރޭގައި މަރުވެފައި އޮއްވާ ފެނުނު މީހާ މަރުވެފައިވަނީ ގެނބިގެން: ފުލުހުން
މުހައްމަދު ހަސަން މަރުވެފައި އޮއްވާ ފެނުނީ 11 ސެޕްޓެންބަރު 2024 ވަނަ ދުވަހުގެ ހެނދުނު 8:17 ހާއިރު
ކުޅުދުއްފުށި ސިޓީ
ހދ. ކުޅުުދުއްފުށީ ބަނދަރު ތެރޭގައި މަރުވެފައި އޮއްވާ ފެނުނު މުހައްމަދު ހަސަން މަރުވެފައިވަނީ ގެނބިގެން ކަމަށާއި، އެހެން މީހެއްގެ ބައިވެރިވުމެއް ނެތް ކަމަށް ފުލުހުން ބުނެފިއެވެ.
ކުޅުދުއްފުށީ އުތުރު ފަރާތު ބަނދަރުގެ ތެރޭގައި ޑޭޒީފެހި 36 އަހަރުގެ މުހައްމަދު ހަސަން މަރުވެފައި އޮއްވާ ފެނުނީ 11 ސެޕްޓެންބަރު 2024 ވަނަ ދުވަހުގެ ހެނދުނު 8:17 ހާއިރުއެވެ.
މިމައްސަލައާ ގުޅޭގޮތުން އަންގާރަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވިދާޅުވީ މިހާދިސާގެ މައުލޫމާތު ފުލުހުންނަށް ލިބިފައިވަނީ 2024 ސެޕްޓެންބަރު 11 ވަނަ ދުވަހުގެ 8:17 ހާއިރު އާއްމު ފަރާތަކުން ގުޅައި މައުލޫމާތު ދިނުމާއި ގުޅިގެން ކަމަށެވެ. އެމައުލޫމާތު ލިބުމާއި ގުޅިގެން ވަގުތުން ފުލުހުން އެސަރަހައްދަށް ގޮސް އެސަރަހައްދުގައި ތިބި ބައެއް އާއްމުންނާއި، ފުލުހުންގެ އެހީތެރިކަމާއެކު މޫދުގައި އޮއްވާ ފެނުނު މީހާ މޫދުން ނަގާފައިވާ ކަމަށާއި، އޭރު ވެސް މުހައްމަދު ހަސަންގެ ދިރުމެއް ނެތްކަން ފާހަގަކުރެވިފައިވާ ކަމަށެވެ. އަދި ވަގުތުން ކުޅުދުއްފުށި ރީޖަނަލް ހޮސްޕިޓަލަށް ގެންދެވި ޑޮކްޓަރަށް ދެއްކި ކަމަށާއި، ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ޑޮކްޓަރު ބުނެފައިވާ ކަމަށް ސާމިހު ވިދާޅުވިއެވެ.
މައްސަލާގެ ތަހުގީގަށް ދެނެގަނެވުނު ބައެއް މައުލޫމާތުތައް ހިއްސާކޮށް ސާމިހު ވިދާޅުވީ މުހައްމަދު ހަސަންގެ ހަށިގަނޑު މޫދުން ފެނުނު ދިމާލުން، އެދިމާ ދުރުނޫން ހިސާބެއްގައި އޭނާ ދުއްވާ ސައިކަލު ޕާކު ކޮށްފައި ހުރި ކަމަށެވެ.
ސާމިހު ވިދާޅުވީ ސީސީޓީވީ ފުޓޭޖް އެހީގައި އެއްކުރެވުނު މައުލޫމާތުން 2024 ސެޕްޓެންބަރު މަހުގެ 11 ވަނަ ދުވަހުގެ ދަންވަރު 1:35 ހާއިރު މުހައްމަދު ހަސަން ބަނދަރު ސަރަހައްދުގައި އުޅެމުންދިޔަ މަންޒަރު ފެނިފައިވާ ކަމަށާއި، އެފަދައިން ބަނދަރު މަތީގައި އުޅެނިކޮށް އެރޭ 2:29 ހާއިރު ފުލުހުންނާ ވެސް ބައްދަލުވެ ވާހަކަ ދެކެވިފައިވާކަން ތަހުގީގަށް ފާހަގަކުރެވޭ ކަމަށެވެ. އަދި ވިދާޅުވީ 2:55 ހާއިރު ބަނދަރު މަގުގެ މެދަކާ ހަމާގައި ގުދުވެގެން އޮތުމަށްފަހު އޭގެ ކުޑައިރުކޮޅެއް ފަހުން މުހައްމަދު ހަސަން މޫދުގައި އޮއްވާ ފެނުނު ދިމާލުން ވާޓަރު މައްޗަށް ހިނގާފައިދާ ކަން ފާހަގަކުރެވިފައިވާ ކަމަށާއި، ވާޓަރު މަތީގައި ހުއްޓާ ކުއްލިއަކަށް ވާޓަރު މައްޗަށް ވެއްޓެމުން ދިޔަ ކަމަށެވެ. ދެން ވެސް ތެދުވެގެން އެދިމާލުން ވާޓަރުމަތީގައި މަޑުކޮށްގެން ހުރިކަން ފާހަގަކުރެވުނު ކަމަށް ސާމިހު ވިދާޅުވިއެވެ. ނަމަވެސް އެ ގޮތަށް ފެނިފައިވަނީ 2:57 ހާއިރު ކަމަށާއި، އޭގެފަހުން މުހައްމަދު ހަސަން އެއްގަމާ ދިމާލަށް އައިކަން ފާހަގަކުރެވިފައިނުވާ ކަމަށް ސާމިހު ވިދާޅުވިއެވެ.
މީގެ އިތުރުން ސާމިހު ވިދާޅުވީ މުހައްމަދު ހަސަންގެ ހަރަކާތްތައް ފެނުނު ފަހުން އޭނާގެ ހަށިގަނޑު މޫދުން ފެނުމާ ހަމައަށް އެދިމާލުން އިތުރު އެއްވެސް މީހެއްގެ ހަރަކާތެއް ފެނިފައިނުވާ ކަމަށާއި، ފޫޓޭޖުން ފެނުނު ކަންކަމަށް ރިޔާއަތް ކުރާއިރު، 2:57 ހާއިރު މުހައްމަދު ހަސަން އެދިމާލުން މޫދަށް ވެއްޓުނު ކަމަށް ބެލެވޭ ކަމަށެވެ.
ސާމިހު ވިދާޅުވީ މި މައްސަލާގެ މުޅި ތަހުގީގު ފުރިހަމަ ކުރެވޭނީ އޮޓޮޕްސީ ދާއިމީ ނަތީޖާ ލިބިގެން ކަމަށްވާއިރު، މިއަދާ ހަމައަށް ދާއިމީ ނަތީޖާ ލިބިފައިނުވާ ކަމަށެވެ. ނަމަވެސް މިހާތަނަށް ކުރެވުނު ތަހުގީގުތަކުން މުހައްމަދު ހަސަން މަރުވުމުގައި އިތުރު ފަރާތެއްގެ ބައިވެރިވުމެއް އޮތް ކަމަކަށް ތަހުގީގަކަށް ނުބެލެވޭ ކަމަށް އޭނާ ވިދާޅުވިއެވެ.
