ބަރަހަނާ ފޮޓޯ އަޅައިގެން ގްރޫޕްތައް ހިންގި މައްސަލަ ސިއްރު
ޒާތީ މުއާމަލާތް ހިމެނޭ އެކައުންޓްތައް މަސާއިދު ވަނީ ހެކް ކޮށްފައި
ކްރިމިނަލް ކޯޓް- މި މައްސަލަ ކްރިމިނަލް ކޯޓުގައި ތާވަލު ކޮށްފައި އޮތީ ބުދަ ދުވަހުގެ ހެނދުނު 09:30 އަށް
މީހުންގެ ބަރަހަނާ ފޮޓޯތައް އަޅައިގެން ޓެލެގްރާމްގައި ގްރޫޕްތައް ހިންގި މައްސަލައިގައި ދައުވާ އުފުލާފައިވާ މއ. އިސްޕަންޖުގެ، މުހައްމަދު މަސާއިދު ބިން ސަމީއުގެ ޝަރީއަތް ސިއްރުކޮށްފިއެވެ.
މި މައްސަލަ ކްރިމިނަލް ކޯޓުގައި ތާވަލު ކޮށްފައި އޮތީ ބުދަ ދުވަހުގެ ހެނދުނު 09:30 އަށެވެ. ނަމަވެސް މައްސަލައިގައި ހިމެނޭ ފަރާތްތަކުގެ މަސްލަޙަތަށް ބަލައި، މި މައްސަލަ އާންމުކޮށް ހުޅުވާނުލައި ކުރިއަށް ގެންދިއުމަށް ކޯޓުން ވަނީ ނިންމާފައެވެ.
މި މައްސަލައިގެ ދައުވާ އުފުލައި ޕްރޮސިކިއުޓާ ޖެނަރަލްގެ އޮފީހުން ބުނި ގޮތުގައި އެކިދުވަސްމަތިން އެކި މީހުންގެ ސޯޝަލް މީޑިއާ އެކައުންޓްތަކާއި، ޒާތީ މުއާމަލާތް ހިމެނޭ އެހެނިހެން އެކައުންޓްތައް މަސާއިދު ވަނީ ހެކް ކޮށްފައެވެ. އަދި, އެކި މީހުންގެ ޒާތީ މައުލޫމާތާއި އެމީހުންގެ ބަރަހަނާ މަންޒަރު ދައްކުވައިދޭ ފޮޓޯ އަދި ވީޑިއޯ ނެގުމަށްފަހު ޓެލެގްރާމް އާއި އެހެނިހެން ސޯޝަލް މީޑިއާގެ ޕްލެޓްފޯމްތަކުގައި ވެސް ވަނީ ހާމަކޮށްފައެވެ.
މަސާއިދުގެ މައްޗަށް އުފުލާފައިވާ ދައުވާތައް
މީގެ އިތުރުން ބުދަ ދުވަހުގެ އަޑު އެހުމުގައި ވަނީ ޝަރީއަތް ނިމެންދެން މަސާއިދު ބަންދުކޮށްފައި ބެހެއްޓުމަށް ވެސް އަމުރުކޮށްފައެވެ.
މަސާއިދުގެ ބަންދުގެ މަޖިލީހުގައި ފުލުހުން ބުނެފައިވަނީ އޭނާ ގެންގުޅުނު ހާޑްޑްރައިވަކުން މިލިއަނެއްހާ ފޮޓޯ ފެނިފައިވާ ކަމަށެވެ. މި މައްސަލައިގައި ގިނަ އަދަދެއްގެ ބަޔަކު ވިކްޓިމުންގެ ގޮތުގައި ފާހަގަވެފައިވާއިރު، މަސާއިދުގެ އަތުން ޖުމްލަ 10 ހާޑްޑްރައިވް ހޯދިއެވެ.
