ތިމަރަފުށީ ޓެރަރިޒަމްގެ މައްސަލައިގައި ހައްޔަރުކުރި މުނީޒުގެ ސިއްހީ ފަރުވާގެ ކަންކަން ގާތުން މިއަންނަނީ ބަލަމުން: އިމްރާން
ސިއްހީ ފަރުވާ ދިނުމުގެ މައްސަލައިގައި އިންސްޕެކްޓަރ އޮފް ކަރެކްޝަންސްއާ ވާހަކަދައްކަން
ތިމަރަފުށި ޓެރަރިސްޓް މައްސަލާގައި ހައްޔަރުކުރި މީހުން،
ތ. ތިމަރަފުށީގައި ޓެރަރިސްޓް ހަމަލާއެއް ދޭން އުޅޭކަމުގެ ތުހުމަތުގައި ހައްޔަރުކޮށްފައިވާ ތ. ތިމަރަފުށީ ކެނެރީގެ އަލީ މުނީޒުގެ ސިއްހީ ފަރުވާގެ ކަންކަން ގާތުން ބަލަމުން އަންނަކަމަށް ހޯމް މިނިސްޓަރ އައްޝައިޚް އިމްރާން އަބްދުﷲ ވިދާޅުވެއްޖެއެވެ.
ހޯމަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގައި ވަޒީރުންނާ ސުވާލުކުރުމުގެ އެޖެންޑާގެ ދަށުން ތިމަރަފުށީ ދާއިރާގެ މެމްބަރ އަބްދުﷲ ރިޔާޒު ވަނީ އަލީ މުނީޒުގެ ސިއްހީ ހާލަތު ސީރިއަސްކަމަށާއި އެކަމާ ގުޅިގެން އޭނާ ގެއަށް ބަދަލުކޮށްދިނުމަށް އެދި އާއިލާގެ ފަރާތުން އެތައް ސިޓީއެއް ފޮނުވާފައިވާއިރުވެސް މިނިސްޓްރީން ޖަވާބު ނުދޭކަމަށް ވިދާޅުވެ އެކަމާ ގުޅޭގޮތުން މިނިސްޓަރ އަރިހުން ސުވާލުކުރައްވާފައެވެ. އެސުވާލަށް ޖަވާބު ދެއްވަމުން މިނިސްޓަރ ވިދާޅުވީ ޓެރަރިޒަމްގެ މައްސަލަތަކުގައި ޖަލުގައި ބަންދުކުރެވޭ ފަރާތްތައް އެކި ސަބަބުތަކާހުރެ ޖަލުން މިނިވަން ވެގެންދާ ދިޔުމަކީ ދައުލަތުގެ ހުރިހާ މުއައްސަސާތަކެއް ކަންބޮޑުވާކަމެއް ކަމަށެވެ. އެކަމާ ގުޅޭގޮތުން މިދިޔަ ހަފްތާގައި ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީގައި ވެސް ވާހަކަދެކެވިފައިވާކަމަށް މިނިސްޓަރ ވިދާޅުވިއެވެ. ޓެރަރިޒަމްގެ މައްސަލަތަކުގައި ބަންދުކުރެވޭ މީހުންގެ ޝަރީއަތް ކުރިޔަށް ގެންދާ ގޮތާއި އަދި ވާނުވާގައި ތިބޭ މީހުންގެ މުއްދަތާއި މިކަންކަމަކީ އެންމެން ވެސް ވިސްނަންޖެހޭކަމެއް ކަމަށް ދެކެވަޑައިގަންނަވާކަމަށް މިނިސްޓަރ ވިދާޅުވިއެވެ.
އެހެންނަމަވެސް އެފަދަ ފަރާތްތަކުގެ ސިއްހީ ފަރުވާ ކަށަވަރުކުރުންމަކީ ކުރަންޖެހޭނެކަމެއް ކަމަށް ހިތުގެ އަޑިން ގަބޫލުކުރައްވާކަމަށް މިނިސްޓަރ ވިދާޅުވިއެވެ. އަދި އެކަމުގައި މުނީޒުގެ އާއިލާއާ ވެސް މުއާމަލާތްކުރައްވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އެފަދަ ހާލަތްތަކުގައި ޖަލުގައި އެންމެ ރަނގަޅަށް ސިއްހީ ފަރުވާނުދެވެމުން ގެއަށް ބަދަލުކުރާނީތޯ ނުވަތަ މިކަމަށް ދެން ގެނެވޭ ބަދަލަކުން ދެން ދިމާވާނީ ކޮން މައްސަލައެއްތޯ ވެސް ވިސްނަންޖެހޭކަމަށެވެ. ޖަލުގައި ބަހައްޓައިގެން ފަރުވާދޭތޯ ކަށަވަރުކުރާކަމަށް މިނިސްޓަރ ވިދާޅުވިއެވެ. އަދި ކުރިޔަށް އޮތްތަނުގައި ވެސް އެކަމަށް މަސައްކަތްކުރައްވާނެކަމަށް މިނިސްޓަރ ވިދާޅުވިއެވެ.
2020 ވަނަ އަހަރުގެ ނޮވެމްބަރ މަހު ތ. ތިމަރަފުއްޓާއި މާލޭގައި އަދި ކަނޑުމަތީގައި ފުލުހުން ހިންގި ޚާއްސަ އޮޕަރޭޝަނާ ގުޅިގެން 8 މީހަކު ވަނީ ހައްޔަރުކޮށްފައެވެ. އެ އޮޕަރޭޝަންގައި ހައްޔަރުކުރީ 8 މީހުންނަކީ ތ. އަތޮޅު ތަޢުލީމީ މަރުކަޒުގައި އޯލެވެލް އިމްތިހާނު ހަދަމުންދާ ވަގުތާ ދިމާކޮށް، އެ ސްކޫލުގެ ލެބޯޓަރީ ގޮއްވައިލުމަށް ރޭވިބައެއްކަން ފާހަގަކުރެވޭކަމަށް ފުލުހުން ވަނީ ބުނެފައެވެ. މިމައްސަލާގައި ފުލުހުން އާންމުކޮށްފައިވާ މައުލޫމާތުތަކަށް ބަލާއިރު ތިމަރަފުށީގައި ހަރުކަށި ފިކުރުގެ މީހުން އޮޕަރޭޓްކުރާކަމަށް ބެލެވޭ ”ނަސާހު-3“ ނަމަކަށް ކިޔާ ހުއިފިލަނޑާ ދޯންޏެއް ބަލައި ފާސްކުރިއިރު، އެ ދޯނިން އައިއީޑީއެއް ހަދަން ބޭނުންކުރެވިދާނެކަމަށް ބެލެވޭ ބައެއް ޢާލާތްތައް ފެނިފައިވެއެވެ.
އެ ދޯނި އަޅާފައި އޮތް ސަރަހައްދުގެ 10 މީޓަރު މޫދު އަޑިން ބަޑިބޭސް އެކުލެވޭ ކާޓްރިޖްތަކެއް ވެސް ހޯދާފައިވާކަމަށް ފުލުހުން ބުނެއެވެ. މީގެއިތުރުން ތިމަރަފުށިން ފާސްކުރި ގެއަކުން ވެސް އައިއީޑީއެއް ހެދުމަށް ބޭނުންކުރެވިދާނެކަމަށް ބެލެވޭ ބައެއް އާލާތްތައް ތައްޔާރުކުރުމާގުޅޭ މެނުއަލްފަދަ ލިޔުންތައް ހުރި ޑިވައިސްތައް ފެނިފައިވާކަމަށް ވެސް ފުލުހުން ބުނެފައިވެއެވެ. އަދި މި މައްސަލައިގައި ހައްޔަރުކުރި މީހަކު އެކްސްޕްލޯސިވްއެއް ތައްޔާރުކުރަން ބޭނުންވާ ކެމިކަލް ހޯދާފައިވާކަން ތަހުގީގަށް ހާމަވެފައިވާ ކަމަށް ވެސް ފުލުހުން ބުނެއެވެ.
މި މައްސަލައިގައި ހައްޔަރުކޮށްފައިވަނީ، ތ. ތިމަރަފުށި، އަސުރުމާގެ، މުޙައްމަދު އާސިރުއާއި، ތ. ތިމަރަފުށި، އަސްރަފީވިލާ، އަޙްސަން މުހައްމަދުއާއި، ތ. ތިމަރަފުށި، ފެހިވިދުވަރުގެ، އަބްދުﷲ ޝަރީފްއާއި، ތ. ތިމަރަފުށި، ކެނެރީގެ، ޢަލީ މުނީޒުއާއި، ތ. ތިމަރަފުށި، ސައިމާ، ޝަމާހު ޝަރީފްއާއި، ނ. ކުޑަފަރި، ރޯޒްމީޑު، އިބްރާހިމް ލޫތުއާއި، ރ. މަޑުއްވަރި، ބީޗްހައުސް ޢަބްދުﷲ އިމާދުއާއި، ރ. ކަނދޮޅުދޫ، ފެހިވިލާ، އަލީ އަރުހަމް މުހައްމަދުއެވެ.
މި މައްސަލައިގައި ހައްޔަރުކޮށްފައިވާ އަލީ މުނީޒުގެ މައްޗަށް އުފުލާފައިވާ ދައުވާތަކަކީ :
ހައްޔަރުކުރި މީހުންގެ ޝަރީއަތް ނިމެންދެން ބަންދު ކުރުމަށް ނިންމި ނިންމުން ކްރިމިނަލް ކޯޓުން ވަނީ ޖުލައި މަހު ދަމަހައްޓާފައެވެ.
