ނަފްސާނީ ބަލި ތަހައްމަލު ކުރަމުންދާ މީހުން އާއިލާގެ ތެރެއިންނާއި ރަހުމަތްތެރިންގެ ފަރާތުންނާއި މުޖުތަމައުގެ ތެރެއިން އެމީހުން ބާކީ ނުކުރުމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ބުނެފިއެވެ.

ވާރލްޑް މެންޓަލް ހެލްތް ޑޭ އާ ގުޅިގެން ނެރުނު ނޫސްބަޔާނެއްގައި އެ މިނިސްޓްރީން ބުނީ ރާއްޖޭގައި ނަފްސާނީ ބަލި ތަހައްމަލު ކުރަމުންދާ މީހުންގެ އަދަދުތައް އިތުރުވަމުންދާ ކަމަށެވެ. އެގޮތުން ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒުގައި 161 ނަފްސާނީ ބަލި މީހުން ބަލަހައްޓަމުން މިހާރު ވެސް ދާ ކަމަށެވެ.

ކޮވިޑުގެ ފުރަތަމަ ފުރަބަންދަށްފަހު ފުރަބަންދުގެ ހާލަތު އުވާލުމާ ގުޅިގެން ދުނިޔޭގެ އެހެން ޤައުމުތަކެކޭ އެއްފަދައިން ރާއްޖޭގައި ވެސް ގެވެށި އަނިޔާގެ މައްސަލަތައް އިތުރުވެ، ގެވެށި އަނިޔާ ލިބުނު މީހުންގެ ނަފްސާނީ ދުޅަހެޔޮކަމަށް އިތުރު އުނދަގޫތަކެއް ކުރިމަތިވި ކަމަށް ވަނީ ބުނެފައެވެ. އަދި ނަފްސާނީ ގޮތުން އެހީތެރިކަމަށް އެދެމުންދާ މީހުންގެ އަދަދު އިތުރުވަމުން ދިޔުމުން ފަރުވާ ދިނުމަށް ގޮންޖެހުންތަކާއި ކުރިމަތިވި ކަމަށާއި މިހާލަތުގައި މިނިސްޓްރީން ސައިކޯ ސޯޝަލް ސަޕޯޓް ފޯރުކޮށްދީފައިވާ ކަމަށް ވަނީ ބުނެފައެވެ. އަދި ކަމާ ގުޅޭ ދާއިރާތަކުން، ނަފްސާނީ ބަލި ހުންނަ މީހުންނާއެކު ދިރިއުޅުމުގެ ކަންކަން މެނޭޖް ކުރާނެ ގޮތްތަކާ ބެހޭގޮތުން އާއިލާތަކަށް އެހީތެރިވުން އެއީ މުހިންމު ކަމެއްގެ ގޮތުގައި ފާހަގަކުރެވިފައިވާ ކަމަށް ޖެންޑަރ މިނިސްޓްރީން ބުންޏެވެ.

ރާއްޖެއިން އެކުލަވާލި ސްޓްރެޓީޖިކް އެކްޝަން ޕްލޭންގެ ދަށުން އާސަންދަ މެދުވެރިކޮށް މެންޓަލް ހެލްތާ ގުޅުން ހުރި އިންތިޒާމު ހަމަޖެއްސުމުގެ މަސައްކަތް ކުރަމުންދާ ކަމަށް އެ މިނިސްޓްރީން ބުންޏެވެ. ނަފްސާނީ ބަލިކަމަކީ ކޮންމެ މީހަކަށް ވެސް، ކޮންމެ ވަގުތެއްގައި ވެސް އަދި ކޮންމެ ތަނެއްގައި ހުރިކަމުގައި ވިޔަސް ކުރިމަތި ވެދާނެ ކަމެކެވެ.

އަދި އެއީ ކުއްލިއަކަށް ދިމާވާނެ ކަމެއް ނޫންކަމާއި ނަފްސާނީ ބައްޔަކީ މަޑުމަޑުން ނޭނގިހުރެ ވެސް ވެދާނެކަމެއްކަން ދެނެގަތުން މުހިންމެވެ. ދުނިޔޭގައި 1 ބިލިއަންއާ ކައިރި ކުރާ ޢަދަދަކަށް މިބަލި ތަޙައްމަލު ކުރާ އިރު ޑިޕްރެޝަންއަކީ ނަފްސާނީ ބަލިތަކުގެ ތެރެއިން ބޮޑެތި މީހުންނަށް އެންމެ ގިނައިން ކުރިމަތިވާ އެއް ބަލިކަން ޑަބް.ލިއު.އެޗް.އޯ އިން ވަނީ ހާމަކޮށްފައެވެ.

މުޅި ދުނިޔޭގައި ނަފްސާނީ ބަލީގެ ތަފާސް ހިސާބުތަކަށް ބަލާއިރު، 10 އަހަރާއި 19 އަހަރާ ދެމެދުގެ ކުދިންނަށް ވަނީ ނަފްސާނީ ބަލީގެ ކޮންމެވެސް އެއް ކަމެއް ތަހައްމަލު ކުރަންޖެހިފައެވެ. އަދި ދުނިޔޭގައި ރިކޯޑުކުރެވޭ ކޮންމެ 100 އަކުން 1 މަރަކީ ސޫސައިޑް ނުވަތަ އަމިއްލައަށް މަރުވުމެވެ.