ފުވައްމުލަކުގެ އައު އިންޖީނުގޭގެ އީއައިއޭ މަސައްކަތް މި ހަފްތާގައި ނިމޭނެ
10 އޮކްޓޯބަރު 2021 | އާދީއްތަ 08:06އޮގަސްޓް މަހު ފުވައްމުލަކުގެ ގާތްގަނޑަކަށް 80 އިންސައްތަ ސަރަހަައްދުން ވަނީ ކަރަންޓް ކެނޑިފައި
ފުވައްމުލައް އައު އިންޖީނުގޭގެ ބިންގާ އަޅާފައިވާ ސަރަހައްދު
ފުވައްމުލަކު އައު އިންޖީނުގޭގެ އީއައިއޭ މަސައްކަތް މިހަފްތާގައި ނިމޭނެ ކަމަށް ފެނަކަ ކޯޕަރޭޝަނުން ބުނެފިއެވެ.
ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު މުހައްމަދު ވިދާޅުވީ، އީއައިއޭ މަސައްކަތް ނިމުމާއެކު ކޮންޓްރެކްޓަރ އެ ސައިޓުގައި މޮބިލައިޒްކޮށް އަމަލީ މަސައްކަތް ފެށޭނެ ކަމަށެވެ. ފުވައްމުލަކުގެ ކަރަންޓަށް ދިމާވެފައިވާ މައްސަލަ ހައްލުކުރުމަށް އައު އިންޖީނުގެ އެޅުމަށް ހަވާލުކޮށްފައިވަނީ މި އަހަރުގެ އެޕްރީލް މަހުއެވެ. އެމަސައްކަތް ނުފެށި ލަސްވަމުންދާތީ އެ ރަށުގެ ރައްޔިތުންދަނީ ކަންބޮޑުވުން ފާޅުކުރަމުންނެވެ.
އައު އިންޖީނުގޭގެ ބިންގާ އެޅުމުގެ ރަސްމިއްޔާތުގައި ވާހަކަދައްކަވަމުން ނާއިބުރައީސް ފައިސަލް ނަސީމް ވިދާޅުވެފައިވަނީ، އައު އިންޖީނުގެއާއެކު ރައްޔިތުންނަށް ފަސޭހަކަން ލިބިގެންދާނެ ކަމަށެވެ. ހަމައެއާއެކު އިންޖީނުގޭގެ މައްސަލަތަކަކީ، މި ސަރުކާރު އައުމުގެ ކުރިން ވަރަށް ބޮޑަށް އުނދަގޫވެފައި އޮތް ކަމެއް ކަމަށާއި، މި ސަރުކާރު އައުމާއެކު، ކޮންމެވެސް މިންވަރެއްގެ ހައްލެއް އެކަމަށް ލިބި، މިހާރު ދާއިމީ ހައްލަކާ ދިމާއަށް މިސްރާބު ޖަހާފައިވާ ކަމަށެވެ.
މެއިން ޓްރާންސްފޯމަރަށް މައްސަލައެއް ދިމާވެ، އޮގަސްޓް މަހު ފުވައްމުލަކުގެ ގާތްގަނޑަކަށް 80 އިންސައްތަ ސަރަހަައްދުން ވަނީ ކަރަންޓް ކެނޑިފައެވެ. އެ މައްސަލައަށް ވަގުތީ ހައްލެއް ހޯދުމުގެ ގޮތުން އައްޑޫ ސިޓީން ޓްރާންސްފޯމަރެއް ގެންގޮސް ކަރަންޓް ފޯރުކޮށްދީފައިވެއެވެ.
ފުވައްމުލަކު ސިޓީގެ އައު އިންޖީނުގޭގެ މަޝްރޫޢާއެކު އެ ރަށަށް ކަރަންޓުގެ ޚިދުމަތް ފޯރުކޮށްދިނުމުގައި މިހާރު ކުރިމަތިވާ މައްސަލަތައް ޙައްލުވެ، ތަނުގެ ހިންގުމުގެ ޚަރަދުތަކަށް ވެސް ލުއިކަން ލިބިގެންދާނެކަމަށް ސަރުކާރުން ވަނީ ފާހަގަކޮށްފައެވެ. ފުވައްމުލަކު ސިޓީގެ މިހާރުގެ އިންޖީނުގޭގެ ޖުމްލަ ކެޕޭސިޓީއަކީ 5.4 މެގަވޮޓެވެ. އައު އިންޖީނުގެ ގާއިމުކުރަނީ 4 މެގަވޮޓްގެ 5 ޖަނަރޭޓަރު ސެޓްގެ ޖާގަ ހިމެނޭގޮތަށް ޖުމްލަ 20 މެގަވޮޓްގެ ކެޕޭސިޓީ ގާއިމުކުރެވޭގޮތަށެވެ. އެއާއެކު މި މަޝްރޫޢުގެ ދަށުން 8 ޓްރާންސްފޯމަރު ބެހެއްޓުމާއި، ޖުމްލަ 21 ކިލޯމީޓަރުގެ މީޑިއަމް ވޯލްޓޭޖުގެ ކޭބަލް އެޅުމާއި، އައު ފިއުލް ސްޓޯރޭޖް ޓޭންކުތައް ގާއިމުކުރުމަށް ވަނީ ހަމަޖެހިފައިވެއެވެ.
މަސައްކަތް ފަށާތާ 18 މަސްދުވަހުގެ ތެރޭގައި މަސައްކަތް ނިންމުމަށް ހަމަޖެހިފައިވާ މި މަޝްރޫޢުގެ މަސައްކަތްތައް ނިމޭއިރު ފުވައްމުލަކު ސިޓީއަށް ކުރިޔަށް އޮތް 30 ނުވަތަ 40 އަހަރަށް ދަތިނުވެ ބޭނުންވާ ވަރަށް ކަރަންޓުގެ ޚިދުމަތް ދިނުމުގެ ޤާބިލުކަން ހުންނާނެކަމަށް ސަރުކާރުންވަނީ ބުނެފައެވެ.
