ދެކުނު ކޮރެއާ އާއި އެމެރިކާ އިން ދެކޮރެެއާ ސަރަހައްދުގައި އަސްކަރީ ތަމްރީންތައް ބާއްވައިފި

ދެކޮރެއާ ސަރަހައްދުގައި ދެކުނު ކޮރެއާ އާއި އެެެމެރިކާ ގުޅިގެން ޖޮއިންޓް އަސްކަރީ ތަމްރީންތައް ބާއްވައިފިއެވެ.

އެގޮތުން އެެމެރިކާ އާއި ދެކުނު ކޮރެއާގެ ހަނގުރާމަތީ މަތިންދާ ބޯޓުތައް ބޭނުންކޮށްގެން އެއާ-ޓު-ގްރައުންޑް މިސައިލް ޑްރިލްތައް ދެކުނު ކޮރެއާގެ ކަނޑުގެ ސަރަހައްދުގައި ބާއްވާފައި ވެއެވެ.

އެމެރިކާގެ ހަނގުރާމަމަތީ މަތިންދާ ބޯޓުތައް ޑްރިލްތަކުގައި ބައިވެރިވާން ދިޔައީ އެމެރިކާގެ ބާރުގެ ދަށުގައި އޮންނަ ސަރަހައްދެއް ކަމަށްވާ ގުއާމް އިން އަންގާރަ ދުވަހުގެ ރެއެވެ.

އެެމެރިކާ އިން ބުނެފައި ވަނީ ޖަޕާނުގެ އެއާ ފޯސް ވެސް ޑްރިލްތަކުގައި ބައިވެރިވި ކަމަށެވެ. ދެކުނު ކޮރެއާގެ އަސްކަރިއްޔާ އިން ބުނެފައި ވަނީ ދެކުނު ކޮރެއާ އާއި އެމެރިކާ އިން ގެންދިޔަ އަސްކަރީ ތަމްރީންތަކަކީ "އުތުރު ކޮރެއާގެ ނުރައްކަލަކުން" ސަލާމަތްވުމަށް ކުރިއަށް ގެންދާ ޕްރޮގްރާމެއް ކަމަށެވެ.

ބައިނަލްއަގްވާމީ ދުނިޔެއިން ތަކުރާރުކޮށް އުުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެން ނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. އުތުރު ކޮރެއާގެ އަމަލުތަކާ ހެދި ބައިނަލްއަގްވާމީ ދުނިޔެ އާއި އެގައުމާ މެދު ވަނީ ވަރަށް ބޮޑަށް ނުތަނަވަސްކަން އުފެދިފައެވެ.