ދެ ކޮރެއާ ގުޅޭ ސަރަހައްދުގައި އޮންނަ ޕަންމުންޖޮމް އިން ހަތިޔާރުތައްް ނަގަން ދެ ގައުމުން އެއްބަސްވެއްޖެ

ދެ ކޮރެއާ ދެމެދު އޮންނަ ހަނގުރާމަ ނުކުރާ ސަރަހައްދު، ޕަންމުންޖޮމްގައި ހުރި ބަޑި އާއި ގާޑް ޕޯސްޓްތައް ނަގަން އުތުރު ކޮރެއާ އާއި ދެކުނު ކޮރެއާ އިން އެއްބަސްވެއްޖެއެވެ.

ދެ ގައުމުގެ ސަލާމަތީ ސަރަހައްދެއްގެ ގޮތުގައި ކަނޑައަޅާފައިވާ ހަމައެކަނި ސަރަހައްދު ކަމަށްވާ ޕަންމުންޖޮމްއަކީ ދެކޮރެއާގެ ފައުޖުތަކުން ބައްދަލުކުރާ ހަމައެކަނި ސަރަހައްދެވެ.

މި ފިޔަވަޅުގެ ބޭނުމަކީ ދެ ގައުމުގެ މެދުގައި އުފެދިފައިވާ ނުތަނަވަސްކަން ކުޑަކުރުމެވެ.

މި މަހުގެ ކުރީކޮޅު ދެ ގައުމުން ވަނީ ސަރަހައްދީ ރޮނގުގައި ވަޅުލާފައިވާ މައިންތައް ނެގުމުގެ މަަސައްކަތް ފަށާފައެވެ.

ދެ ކޮރެއާ ދެމެދު 1953 ވަނަ އަހަރު ކުރެވުނު ހަނގުރާމަ ނިމުނު ނަމަވެސް، ދެ ޤައުމުން ސުލްހައިގެ އެއްބަސްވުމެއް އެކުލަވާލާފައި ނުވާތީ ދެ ޤައުމު އަދިވެސް އޮތީ ހަޤީޤަތުގައި ހަނގުރާމައިގެ ޙާލަތުގައެވެ. އެހެންކަމުން ދެ ޤައުމުން ރަސްމީ ސުލްހައިގެ އެއްބަސްވުމެއް އެކުލަވާލުމުގެ މަސައްކަތް ކުރުމަށް ދެ ލީޑަރުން ވަނީ ކުރިން މަޝްވަރާ ކުރައްވާފައެވެ.

ތާރީޚީ ދަތުރުފުޅެއްގައި ދެކުނު ކޮރެއާގެ ރައީސް މޫން ޖެއި-އިންވަނީ މިދިޔަ ސެޕްޓެމްބަރ މަހު އުތުރު ކޮރެއާއަށް ވަޑައިގެންފައެވެ.

މިއީ ފާއިތުވި 10 އަހަރު ތެރޭގައި ދެކުނު ކޮރެއާގެ ލީޑަރަކު ޕިޔޮންގްޔަންގްއަށް ވަޑައިގެންނެވި ފުރަތަމަ ދަތުރުފުޅެވެ. ތިން ދުވަހުގެ މި ދަތުރުފުޅަކީ ކޮރެއާ ސަރަހައްދަކީ ނިއުކްލިއަރ ހަތިޔާރު ނެތް ސަރަހައްދަކަށް ހަދަން ކުރެވެމުންދާ މަޝްވަރާތަކުގެ ބައެކެވެ.