ބަންދުގައި ހުރި މީހަކު މަރުވި މައްސަލަ ޕީޖީން ބަލަން ފަށައިފި
8 އޮކްޓޯބަރު 2021 | ހުކުރު 03:50ނިޔާވީ މ. މަލަސް، 46 އަހަރުގެ އިސްމާއީލް ޝަބީން
އައިޖީއެމްއެޗް ހޮސްޕިޓަލް
ޝަރީއަތް ނިމެންދެން ބަންދުގައި ހުރި މީހަކަށް ފަރުވާދެމުން ދަނިކޮށް ނިޔާވި މައްސަލަ ޕްރޮސެކިއުޓަރ ޖެނެރަލް އޮފީހުން ބަލަން ފަށައިފިއެވެ.
ޝަރީއަތް ނިމެންދެން މާލެ ޖަލުގައި ބަންދުކޮށްފައި ހުރި މީހަކު އައިޖީއެމްއެޗްގައި ފަރުވާ ދެމުންދަނިކޮށް ނިޔާވެފައިވަނީ އަންގާރަ ދުވަހުގެ ރޭ 7:00ހާއިރުއެވެ. ޕީޖީ އޮފީހުން ބުނީ އެމީހާއަށް ފަރުވާ ދެމުންދަނިކޮށް ނިޔާވި މައްސަލާގައި ކަންވީގޮތް ބެލުމުގެ މަސައްކަތް މިހާރު ފަށާފައިވާ ކަމަށެވެ. ކަންހިނގައިދިޔަގޮތް ބެލުމަށްފަހު އަޅަންޖެހޭ ފިޔަވަޅުތައް އަޅާނެ ކަމަށް ޕީޖީ އޮފީހުން ވަނީ ބުނެފައެވެ.
މޯލްޑިވްސް ކަރެކްޝަނަލް ސަރވިސްއިން ބުނީ ޝަރީއަތް ނިމެންދެން ބަންދުގައި ބަހައްޓައިގެން ފަރުވާ ދެމުންދަނިކޮށް ނިޔާވީ ކ.މާލެ މ. މަލަސް، 46 އަހަރުގެ އިސްމާއީލް ޝަބީން ކަމަށެވެ. އޭނާ އައިޖީއެމްއެޗަށް ގެންގޮސްފައިވަނީ ނޭވާ ލުމަށް އުނދަގޫތަކެއް ހުރުމުން ކަމަށް ކަރެކްޝަންސްއިން ބުނެފައިވެއެވެ. އަދި ފަރުވާ ދެމުންދަނިކޮށް ހާލު ދެރަވެ އައިސީޔޫއަށް ބަދަލުކުރި ކަމަށް ކަރެކްޝަންސްއިން ވަނީ ބުނެފައެވެ.
ކަރެކްޝަންސް އިން ބުނީ އޭނާއަކީ ހަކުރު ބައްޔަށް ބޭސްކުރަމުންދިޔަ މީހެއް ކަމަށެވެ.
އިސްމާއީލް ޝަބީންއަކީ މަސްތުވާތަކެތި ބޭނުންކޮށް، ގެންގުޅެ އަދި ވިއްކިކަމަށް ކުރާ ދައުވާގެ ޝަރީއަތް ނިމެންދެން މާލޭ ޖަލުގައި ބަންދުކޮށްފައިހުރި މީހެކެވެ.
އޭނާ ހޮސްޕިޓަލަށް ގެންދިއުމާ ގުޅިގެން ކަރެކްޝަންސްއިން ވަނީ އެކަން އިންސްޕެކްޓަރ އޮފް ކަރެކްޝަނަލް ސަރވިސް، މޯލްޑިވްސް ޕޮލިސް ސަރވިސް އަދި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށް އަންގާފައެވެ.
