ފުރިހަމަ ކާމިޔާބީއަކަށްޓަކައި ޤުރުބާނީތަކެއް ވާންޖެހޭ، ބޮޑުތަކުރުފާނުގެ ޖިހާދުންވެސް ދައްކައިދެނީ މި ނަމޫނާ: ޢިމްރާން
ޤައުމެއް ޤައުމެއްގެ ގޮތުގައި ދެމި އޮންނަން ކާބަފައިންގެ ޤުރުބާނީތަކަށް ފަޚުރުވެރިވާ ބަޔަކު އުޅެންޖެހޭ
ގައުމީ ދުވަހާ ގުޅިގެން އުތީމުގައި ބޭއްވި ޚާއްސަ ޖަލްސާގެ ތެރެއިން
ފުރިހަމަ ބޮޑު ކާމިޔާބީއެއް ގެނެވޭނީ އަމިއްލަ ނަފުސުން ޤުރުބާނީތަކެއް ވެގެން ކަމަށާއި, ބޮޑުތަކުރުފާނުގެ ޖިހާދުންވެސް ފެންނަން އޮތް ޙަޤީޤަތަކީ އެއީކަމަށް ހޯމް މިނިސްޓަރ ޢިމްރާން ޢަބްދުﷲ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ ޤައުމީ ދުވަހުގެ މުނާސަބަތުގައި, ބޮޑުތަކުރުފާނު ނިސްބަތްވެވަޑައިގަންނަވާ ހއ. އުތީމުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.
މިނިސްޓަރ ވިދާޅުވީ ފުރިހަމަ ބޮޑު ކާމިޔާބީއެއް ގެނެވޭނީ އަމިއްލަ ނަފުސުން ޤުރުބާނީތަކެއް ވެގެން ކަމީ ދުނިޔޭގެ ފެންވަރުގެ ކާމިޔާބީތައް ހޯދާފައިވާ މީހުންވެސް އެއްބަސްވެވަޑައިގަންނަވާ ހަގީގަތެއް ކަމަށެވެ. ބޮޑުތަކުރުފާނުގެ މުޅި ވާހަކައަށް ބަލާއިރުވެސް ފެންނަނީ ވެވަޑައިގެންނެވި ބޮޑު ޤުރުބާނީކަމަށް ވިދާޅުވިއެވެ. މާތްވެގެންވާ އިސްލާމް ދީނާއި, ދިވެހި ޤައުމަށްޓަކައި އެވަޑައިގެންނެވި މަތިވެރި ޤުރުބާނީ ފާހަގަކުރައްވައި މިނިސްޓަރ ވިދާޅުވީ, އިންސާނަކަށް ތައްޔާރުވެވަޑައިގެންނެވޭނީ އެހާވަރެއްގެ ޤުރުބާނީއަކަށް ކަމަށެވެ.
މިނިސްޓަރ ވިދާޅުވީ ޤައުމެއް ޤައުމެއްގެ ގޮތުގައި ދެމިއޮންނާނީ ޤައުމަށްޓައި ކާބަފައިން ވެވަޑައިގެންފައިވާ ބޮޑެތި ޤުރުބާނީތަކާއި ޒިކުރާ އާކޮށް, އެޤުރުބާނީ ތަކަށް ފަޚުރުވެރިވާ ބަޔަކު ޤައުމުގައި ދެމިތިބެގެންކަމަށެވެ. އަދި ކާބަފައިން ހިފަހައްޓާފައިވާ މަތިވެރި ހަމަތަކާއި, ސިފަތައް ބަލައިގަނެ ދަމަހައްޓައިގެންކަމަށެވެ. ކާބަފައިންގެ ފުށުން ވާރުތަކޮށްފައިވާ ހިތްވަރާއި ޢަޒުމާއި, ރިވެތި އަޚުލާޤީ ސިފަތަކުގެ މައްޗަށް ހެދިބޮޑުވާ ޖީލުތައް ބިނާކޮށް ތަރުބިއްޔަތުކޮށްގެންކަންވެސް އެމަނިކުފާނު ފާހަގަކުރެއްވިއެވެ.
މިނިސްޓަރ ވިދާޅުވީ ޤައުމަށްޓަކައި ޤުރުބާންވާން ތައްޔާރަށްތިބި އެތައް ދަރިންތަކެއް އެބަތިބިކަމަށާއި, އެކަމަކު އެދަރިން ދަރިންނަށް ހަދަންޖެހޭކަމަށެވެ. މިނިސްޓަރ މިސާލު ނެންގެވީ "މީހުން މީހުނަށް ވާނީ މީހުނަށް ހެދީމާ" ކަމަށް މުޙައްމަދު ތަކުރުފާނު ވިދާޅުވެ އަމަލުން ދެއްކެވި މިސާލުންނެވެ. މިނިސްޓަރ ޢިމްރާން ވިދާޅުވީ އަޅުގަނޑުމެންގެ މިއަދުގެ ހާލަތާމެދު ވިސްނާ ފިކުރުކޮށް, އަޅުގަނޑުމެންގެ ޤައުމައިގެން ކުރިއަށްދިއުމަށް މުހިންމު މަސައްކަތްތަކެއް ކުރަންޖެހޭކަމަށެވެ. އަދި އަޅުގަނޑުމެންގެ ދަރިން އެގޮތުގައި ބިނާކޮށް ތަރުބިއްޔަތުކުރަން ޖެހޭކަމަށެވެ.
7 އޮކްޓޯބަރަކީ ދިވެހިރާއްޖޭގެ ތާރީޚުގެ ފަތްފުށްތަކަށް ރަނގަޅަށް ނަޒަރު ހިންގާލާއިރު އެތާރީޚުގެ ފަށްފުށްތަކުގެ ތެރޭގައި އެންމެ ވިދާ އެންމެ ބަބުޅާ އެންމެ އުޖާލާ އެއްދުވަސްކަންވެސް މިނިސްޓަރ ފާހަގަކުރެއްވިއެވެ. އަދި މިއީ 15 އަހަރާއި 6 މަސްދުވަހާއި 14 ދުވަހުގެ އަޅުވެތިކަމުގެ ވޭނާ ކެކުޅުމާއި, ވޭނާއި, ހިތާމަ އާހުގެ އަޑުތަކުން މިންޖުވެ މިނިވަން ދިވެހި އިސްލާމީ ޖައްވަކަށް އަލުން އާރޯކަމާއެކު ނޭވާލާން ފެށިތާ 462 ނުވަތަ 448 އަހަރު ފުރޭ ދުވަސްކަމަށް އެމަނިކުފާނު ވިދާޅުވިއެވެ. 1946 ވަނަ އަހަރުން ފެށިގެން މެދުކެނޑުމެއްނެތި ޤައުމީ ދުވަހުގެ ގޮތުގައި ރަބީޢަލްއައްވަލު މަހުގެ އެއްވަނަ ދުވަސް ފާހަގަކުރަނީ މާތްވެގެންވާ އިސްލާމް ދީނާއި, ދިވެހި ޤައުމުގެ މިނިވަންކަމާއި އިސްތިޤުލާލު ދެމެހެއްޓުމުގައި ދެގޮތެއްނުވެ ދިވެހިން ސާބިތުވެ ތިބޭނެކަމުގެ ރަމްޒެއްގެ ގޮތުގައިކަމަށްވެސް ވިދާޅުވިއެވެ.
