ކިނޮޅަހުގެ ބަނދަރަށް ދިމާވެފައިވާ މައްސަލަ ހައްލު ކުރުމަށް އެމްޓީސީސީއަށް
އަލުން ޑިޒައިން ބަދަލުކުރުމަށްފަހު ބީލަން ހުށަހެޅުނީ 13 ޖުލައި 2021ގައި
ކިނޮޅަހުގެ ބަނދަރަށް ވެލި އަރާފައި
ރ. ކިނޮޅަހުގެ ބަނދަރަށް ދިމާވެފައިވާ މައްސަލަ ހައްލުކުރުމަށް މޯލްޑިވްސް ޓްރާންސްޕޯޓް އެެންޑް ކޮންޓްރެކްޓިންގ ކޮމްޕެނީން މަސައްކަތް ފަށާފައިވާ ކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ބުނެފިއެވެ
މިނިސްޓްރީން ބުނީ، އެރަށުގެ ބަނދަރަށް ދިމާވެފައިވާ މައްސަލަ ހައްލުކުރުމަށް މަޝްރޫޢުގެ ޑިޒައިން މައްސަލަ މިހާރު ނިމިފައިވާކަމަށެވެ. އެ މަސައްކަތް ހަވާލުކުރާނެ ފަރާތެއް ހޯދުމަށް ބީލަން ހުށަހެޅުމަށް ފިނޭންސް މިނިސްޓްރީން 2 މާރޗު 2021ގައި ހުޅުވަލިއެވެ. އެހެންނަމަވެސް ކުރިން ކައުންސިލުން ފާސްކޮށްފައިވާ ޑިޒައިނަށް އިތުރު ބަދަލު ގެނައުމަށް ކައުންސިލުން އެދުމުން، ބީލަން މަރުހަލާ ލަސްވާނެކަން ފާހަގަކޮށް، އަލުން ޑިޒައިން ބަދަލުކުރުމަށްފަހު ބީލަން ހުށަހެޅުނީ 13 ޖުލައި 2021ގައި ކަމަށެވެ.
ބީލަމަށް ހުޅުވާލުމުން، ބީލަން ހުށަހެޅި އެއްވެސް ފަރާތަކަށް ބީލަން ކާމިޔާބު ކުރެވިފައި ނުވާކަމަށް މިނިސްްޓްރީން މައުލޫމާތުދެއެވެ. ފިނޭންސުން އެކަން އަންގާފައިވަނީ 27 ސެޕްޓެމްބަރ 2021 ގައި ކަމަށްވެސް މިނިސްޓްރީން މައުލޫމާތުދެއެވެ. އޭގެފަހުން އެރަށުގެ ބަނދަރު ހެދުމުގެ މަސައްކަތް މިހާރު ސީދާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީއަށް ހަވާލުކުރުމުގެ މަސައްކަތް މިނިސްޓްރީން ކުރަމުން އަންނަ ކަމަށެވެ. އަދި މި ވަގުތު އެރަށުގެ ބަނދަރަށް ދިމާވެފައިވާ މައްސަލަ ހައްލުކުރުމަށް 10 އޮކްޓޯބަރ 2021ގައި އެމްޓީސީސީން އެ ރަށަށް ދިއުމަށް ހަމަޖެހިފައިވާ ކަމަށްވެސް މިނިސްޓްރީން ބުންޏެވެ.
ކިނޮޅަހުގެ ބަނދަރަށް ވެލި އެޅުމުގެ މައްސަލަ ދިމާވަމުން އަންނަތާ އެތައް އަހަރެއް ވެފައިވާ ކަމަށް އެ ރަށު ކައުންސިލުން ވަނީ ބުނެފައެވެ. ކިނޮޅަހުގެ އުތުރު ފަރާތުގައި ބަނދަރު ހަދާފައި ވަނީ 2010 ވަނަ އަހަރުއެވެ. މި ބަނދަރު ހެދީ އެ ރަށުގެ އުތުރު ފަރާތުގައި އޮންނަ ބޮޑު ދޮންވެލިގަނޑުން ބައެއް ނެގުމަށް ފަހު، ބަނދަރާއި ދޮންވެލިގަނޑު ވަކިކުރުމަށްޓަކައި, އެ ދެމެދުގައި އިންފާރެއްގެ ގޮތުގައި ހިލަ ޖެހުމަށް ފަހުގައެވެ. އެކަމަކު އޭގެ އަހަރެއްހާ ދުވަސް ފަހުން އެ އިންފާރު ހަލާކުވެ، ފަޅަށް ވެލި ވަންނަން ފެށިކަމަށް ކައުންސިލުން ބުނެއެވެ. އަދި 2012 ވަނަ އަހަރު ފެށިގެން މި މައްސަލަ ހައްލުކޮށްދޭން އެ ރަށުގެ ކައުންސިލުން ސަރުކާރުގައި ގެންދަނީ އެދެމުންނެވެ.
