ރައީސް ސޯލިހު މިހުރިހާ ކަމެއް ބަލައިގެންނެވުމުން ވަރަށް އުފާވޭ: ޝާހިދު
ރާއްޖެ އދ. ގައި ބައިވެރިވިތާ 56 އަހަރު ވަނީ ފުރިފައި
ޝާހިދަށް ނިޝާން ޢިއްޒުއްދީންގެ ޢިއްޒަތުގެ ވެރިކަމުގެ ލަޤަބު އަރުއްވި ރަސްމިއްޔާތުގެ ތެރެއިން،
އދ.ގެ އާންމު މަޖިލީހުގެ 76 ވަނަ ސެޝަންގެ ރައީސްގެ ހައިސިއްޔަތުން ރާއްޖެ ވަޑައިގެންނެވުމާއެކު، ދައުލަތު އެންމެ މަތީވެރިޔާ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެކަން ޝަރަފުވެރިކަމާއެކު ގަބޫލުފުޅު ކުރައްވައި ބަލައިގެންނެވުމުން އާދަޔާ ޚިލާފު އުފާވެރިކަމުގެ އިހުސާސެއް ކުރެވުނު ކަމަށް އަބްދުﷲ ޝާހިދު ވިދާޅުވެއްޖެއެވެ.
ބުރާސްފަތި ދުވަހުގެ ރާއްޖެޓީވީގެ ފަށާއިރު ޕްރޮގްރާމްގައި ޝާހިދު ވިދާޅުވީ އދ.އަކީ ދުނިޔޭގެ 193 ގައުމު ބައިވެރިވާ ޖަމުޢިއްޔާއެއް ކަމަށެވެ. ރާއްޖެ އދ. ގައި ބައިވެރިވުމަށް ކުރި މަސައްކަތް ވަރަށް ގާތުން ފެނުނު ކަމަށާއި، އެ މަސައްކަތް ފެށި ހިސާބުން ބައެއް މީހުން ސުވާލު އުފެއްދި ކަމަށް ޝާހިދު ވިދާޅުވިއެވެ. ނަމަވެސް އެކަން ކާމިޔާބު ކުރެވި، އދ. ގައި ބައިވެރިވިތާ 56 އަހަރުވެފައިވާކަން ޝާހިދު ފާހަގަކުރެއްވިއެވެ.
ޝާހިދު ވިދާޅުވީ އދ.ގެ އާންމު މަޖިލީހުގެ 76 ވަނަ ސެޝަންގެ ރައީސްގެ ހައިސިއްޔަތުން ރާއްޖެ ވަޑައިގެންނެވުމާއެކު، ދައުލަތުގެ އެންމެ މަތީވެރިޔާ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެކަން ބަލައިގެންނެވުމުން އާދަޔާ ޚިލާފު އެހެން ކަހަލަ އިހުސާސަތަކެއް ކުރި ކަމަށެވެ.
ރައީސް ސޯލިހުގެ ދައުވަތަކަށް ޝާހިދު ރާއްޖެ ވަޑައިގެންނެވީ މި މަހުގެ 6 ވީ ބުދަ ދުވަހުގެ ވަގުތެއްގައެވެ. މި ދަތުރުފުޅުގައި ރައީސް ސޯލިހުއާ ބައްދަލުކުރައްވާފައިވެއެވެ.
އދ. ގެ 76 ވަނަ އާންމު މަޖިލީހުގެ ރައީސްގެ ހައިސިއްޔަތުން ޝާހިދު ރާއްޖެވަޑައިގަތުމަށް ދައުވަތު ދެއްވީ އދ.ގެ އާންމު މަޖިލީހުގައި ތަގުރީރު ކުރެއްވުމަށް އެމެރިކާއަށް ރައީސް ސޯލިހު މި ދިޔަ މަހު ކުރެއްވި ދަތުރުފުޅުގައި ޝާހިދާއެކު ބޭއްވި ބައްދަލުކުރެއްވުމުގައެވެ. އދ. ގެ 76 ވަނަ އާންމު މަޖިލީހުގެ ރައީސްގެ މަގާމަށް ޝާހިދު ހޮވިވަޑައިގަތީ މި އަހަރުގެ ޖޫން މަހުގައެވެ.
އާއްމު މަޖިލީހުގެ ރިޔާސަތާ އެމަނިކުފާނު ހަވާލުވެވަޑައިގެންނެވީ ސެޕްޓެމްބަރު މަހުގެ 15 ވަނަ ދުވަހުއެވެ.
އދ. ގެ އާންމު މަޖިލީހުގެ ރައީސް ކަމުގެ އިންތިޚާބު, މިނިސްޓަރ ޝާހިދު ކާމިޔާބު ކުރައްވާފައިވަނީ 143 ވޯޓުންނެވެ. މެންބަރު 193 ގައުމުން ބައިވެރިވި މި ވޯޓުގައި ރައީސަކު ހޮވާފައި މިވަނީ ސިއްރު ވޯޓަކުންނެވެ.
