ޕާކިސްތާންގެ ހުޅަނގުދެކުނު ޕްރޮވިންސަށް އައި ބިންހެލުމެއްގައި 20 މީހުން މަރުވެއްޖެ
7 އޮކްޓޯބަރު 2021 | ބުރާސްފަތި 05:5420 މީހުން މަރުވެ 100 މީހުންނަށްވަނީ އަނިޔާވެފައި
ބިން ހެލުމުގައި އަސަރުކުރި އާއިލާއެއް މަގުމަތީގައި
ޕާކިސްތާނުގެ ހުޅަނގުދެކުނު ޕްރޮވިންސަށް އައި ބިންހެލުމެއްގައި ގެތައް ވެއްޓުމުގެ ސަބަބުން 20 މީހުން މަރުވެއްޖެއެވެ.
މީހުން ސަލާމަތްކުރުމުގައި ހަރަކާތްތެރިވާ ޓީމުން އެސަރަހައްދު ސާފުކޮށް އެސަރަހައްދަށް ވަދެވޭނެ ގޮތެއް ހޯދުމުގެ މަސައްކަތްވަނީ ފަށާފައެވެ.
ޔުނައިޓެޑް ސްޓޭޓްސް ޖިއޮލޮޖިކަލް ސާރވޭ ޑޭޓާއިން އެނގިފައިވާ ގޮތުގައި ހަރްނާއި ޑިސްޓްރިކްއަށް 5.7 މެގްނިޓިއުޑްގެ މި ބިންހެލުން އައި އިރު، އެސަރަހައްދުގެ މީހުން ތިބީ ނިދާފައެވެ.
ޕްރޮވިޝަނަލް މިނިސްޓަރ ޒިއާ ލަންގޫވްއާ ހަވާލާދި ރިޕޯޓުކޮށްފައިވާ ގޮތުން މި ހާދިސާގައި، 20 މީހުން މަރުވެ 100 މީހުންނަށްވަނީ އަނިޔާވެފައެވެ. ބިންހެލުމުގެ ސަބަބުން މަގުތައް ބްލޮކްވުމާއި، ބިންގަނޑު ކަނޑައިގެން ގޮސްފައިވާތީ މީހުން ސަލާމަތްކުރުމުގައި ހަރަކާތްތެރިވާ ޓީމުތަކަށްވަނީ ދަތިތަކާ ކުރިމަތިވެފައެވެ.
ހަރްނާއި ސަރަހައްދުގައިވާ ގެތަކަކީ ކުދިގަލާއި، ޗަކަ ބޭނުން ކޮށްގެން ރާނާފައިވާ ގެތަކެކެވެ. އެހެންކަމުން، ކޮންކްރީޓް ނުވަތަ ގަލުން އިމާރާތް ކޮށްފައިވާ ގެތަކާ އަޅާބަލާއިރު ބިން ހެލުމުގައި އެންމެ ފަސޭހައިން ހަލާކުވެގެން ދާނީ މިފަދަ ގެތަކެވެ. އެ ގެތަކުގެ ފުރާޅާއި ފާރު ހަލާކުވިއިރު، ވަރަށް ގިނަ މީހުން ވަނީ މަރުވެފައެވެ. މީގެ ތެރޭގައި އަންހެނަކާއި 6 ކުޑަކުދިން ހިމެނެއެވެ.
