ދުނިޔެއާ ވަކިވެގެން އުޅެންޖެހޭ ކަމަށް ވަކާލާތުކުރާ މީހުން ވަކާލާތު އެކުރަނީ ބޮޑުތަކުރުފާނު އުފެއްދެވި ގައުމިއްޔަތާއި ދެކޮޅަށް: އަބްދުﷲ ޝާހިދު
ޕޯޗުގީޒުންގެ އަތުން ރާއްޖެ މިނިވަންކުރެއްވުމުގައި ބޮޑުތަކުރުފާނު ރާއްޖެއިން ބޭރުގެ ފަރާތްތަކުގެ ޚިޔާލާއި އެހީތެރިކަން ހޯއްދެވި
އދ.ގެ 76ވަނަ އާންމު މަޖިލީހުގެ ރައީސް އަބްދުﷲ ޝާހިދު
ރާއްޖެއަކީ ދުނިޔެއާ ވަކިވެގެން އުޅެންޖެހޭނެ ބައެއް ކަަމަށް ވަކާލާތު ކުރާ މީހުން އެވަކާލާތު ކުރަނީ ބޮޑުތަކުރުފާނު ރާއްޖޭގައި އުފެއްދެވި ގައުމިއްޔަތާއި ދިމާ އިދިކޮޅަށް ރާއްޖެ ބަލިކަށިކޮށްލުމަށް ކަމަށް އދގެ އާންމު މަޖިލީހުގެ 76 ވަނަ ސެޝަންގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ގައުމީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ޝާހިދު ވިދާޅުވީ އެފަދަ ވާހަކަތަކަކީ ގަބޫލުކުރަންޖެހޭ ވާހަކަތަކެއް ނޫންކަމަށެވެ. ގައުމީ ދުވަސް އެބޭފުޅަކަށް ނިސްބަތްވާ ބޮޑުތަކުރުފާނުގެ އަމަލުފުޅުތަކުން މިސާލު ނަންގަވަމުން ޝާހިދު ވިދާޅުވީ ޕޯޗުގީޒުންގެ އަތުން ރާއްޖެ މިނިވަންކުރުމުގައި ބޮޑުތަކުރުފާނު ރާއްޖެއިން ބޭރުގެ ފަރާތްތަކުގެ ޚިޔާލާއި އެހީތެރިކަން ހޯއްދެވި ކަމަށެވެ. އެމަހާރަދުން ގައުމިއްޔަތު ބިނާކުރައްވާފައިވަނީ މުހިންމު ގައުމީ އަސާސްތަކުގެ މަތީގައި ކަމަށް ޝާހިދު ވިދާޅުވިއެވެ.
އުތީމު މަހާރަދުން ގައުމިއްޔަތު ބިނާކޮށްދެއްވާފައި އޮތީ ބޭރުގެ ފަރާތްތަކާއި އެކުވެރިވެ އެކަތިގަނޑަކަށްވެ ގުޅުން ބާއްވައިގެން ކަމަށް ޝާހިދު ވިދާޅުވިއެވެ. މިއަދު ވަކިވެގަތުމަށް ރާއްޖެ ވަށާ ފަންފުޅަފި ޖަހައިގެން ތިބެން ބޭނުންވާ ބަޔަކު ވާހަކަދެއްކިޔަސް ދިވެހިރާއްޖޭގެ ހަގީގީ ގައުމިއްޔަތުގެ ބާނީގެ ޒިކުރާ އާކުރާއިރު ފެނިގެންދަނީ އެމަހާރަދުން އުޅުއްވި އަވައްޓެރި ގައުމުތަކާއެކު އެކުވެރިކަމާއެކު މަސައްކަތް ކުރެއްވުން ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ރައީސް ސާލިހުގެ ޚާރިޖީ ސިޔާސަތަކީ ބޮޑުތަކުރުފާނުގެ އަސާސްތަކުގެ މަތީގައި ބިނާކުރައްވާފައިވާ ސިޔާސަތެއް ކަމަށެވެ. އދގެ އާންމު މަޖިލީހުގެ ރިޔާސަތާއި ހަމައަށް ރާއްޖެއަށް ދެވިފައިވަނީ 56 އަހަރު ދުވަހުގެ ތެރޭގައި ރާއްޖޭގެ ރައްޔިތުން ކުރި ބުރަ މަސައްކަތުގެ ސަބަބުން ކަމަށް ޝާހިދު ވިދާޅުވިއެވެ. އެކާމިޔާބީގެ ފަހަތުގައިވަނީ ރާއްޖޭގެ އެކިއެކި ސަރުކާރުތަކުން ކުރައްވާފައިވާ ބޮޑެތި މަސައްކަތްތައް ކަމަށް ޝާހިދު ވިދާޅުވިއެވެ. ރައީސް ސާލިހުގެ ޒައާމަތުގައި ކުރައްވަމުން ގެންދަވަނީ ދުނިޔެއާ ގުޅި ލާމެހުމުގެ މަސައްކަތް ކަމަށާއި އެކަމުގެ ނަތީޖާ ފެންނަމުންދާ ކަމަށް ޝާހިދު ވިދާޅުވިއެވެ.
ރައީސް ސާލިހު ވެރިކަމާއި ހަވާލުވެވަޑައިގެންނެވިއިރު ރާއްޖެއަކީ ބިކަވެ ބާކީވެ އެކަހެރިވެފައިވާ ގައުމެއްކަމަށް ޝާހިދުވިއެވެ.
